Read Rongmei Naga JOSHUA 21 Bible Online

JOSHUA 21 - Rongmei Naga bible

JOSHUA 21

¹Mi tangv Levi kaikhwang tuang gaanvthaih nunc tei Amuh Eleazar, Joshua khatni Isaraelmei gaanvthaic nunc daeng khou guang khwan e.

²“Aniw lungc bam khang kaidai tiilou nina e, kumna aniw tuang khouringh nunc byn khang ramv tiilou nina e twna RINGHPOUC rui Mousi khou latdanv tiilou kan e”, twna Isaraelmei nunc Kanaan kandic Shilo khou bammei ganv khou tei sa the.

³Kumna RINGHPOUC tuang latdanv theilayna Isaraelmei nunc rui Levimei khang kaidai asaekc khatni kaniw ramv khou rui ramv langv asaekc khouringh byn bamv khang baengc patlou khwan e.

⁴Levi kaikhwangmei pang khou Kohat puinacmei khang nzanhlou rey liang the. Juda, Simeon, khatni Benjamin kaikhwang kathumh tuang ramv lungc khou rui kaidai 13 amuh Aron khou rui lungc guangmei kikta khang nzanhlou the.

⁵Baihmei Kohat puinacmei khang Ephraim, Dan khatni neihkey biak Manase tuang ramv khou rui kaidai ruh tiilou the.

⁶Gershon puinacmei khang Isakar, Aser, Naphtali, khatni Neihpat Manase ramv khou rui kaidai 13 tiilou the.

⁷Merari puinacmei khang Reuben, Gad, khatni Zebulun ramv khou rui kaidai 12 tiilou the.

⁸San zaucna, Isaraelmei nunc rui mi kaidai guay hei khatni khouringh byn guay, RINGHPOUC rui Mousi khou saloumei theilayna Levimei khang tii the.

⁹Juda khatni Simeon tuang kaikhwang khou rui mi kaidai guay hei kaniw zanc ntana tiilou the.

¹⁰Kohat puinacmei Levi rui puanhmei Aron kikta nunc khou san khou patmei theilayna rey liangna nzanhlou the.

¹¹Kaniw khang tei Juda tuang chyngramv khou naimei mi douc tei Anak pu Arba zanc khou phuakloumei Arba twna kawmei Hebron kaidai khatni mi daeng khou naimei khouringh byn ramv tei tiilou the.

¹²Mi kaidai ramv khatni mi tuang namvdai guay tei Jephunne rui puanhmei Kaleb khang tiilou tangmei ramv the.

¹³Paklouna duploumei kaidai Hebron tei amuh Aron kikitamei nunc khang tiilou the. Heina hamhna kaniw rui Libna,

¹⁴Jattir, Eshtemoa

¹⁵Holon, Debir

¹⁶Ain, Jutta, akhatni Beth Shemes kaidai nunc chakiu akhatni kadaeng daeng khou naimei khouringh byn guay ni tiilou the.

¹⁷Kaniw khang Benjamin puinacmei ramv khou rui ni kaidai padeih: Gibeon, Geba,

¹⁸Anathot, khatni Almon lev mi kaidai guay tuang khouringh byn guay ni tiilou khwan e.

¹⁹Mi kaidai 13 hei kadaeng daeng khou naimei khouringh byn lev twna Aron kiktamei amuh nunc khang tiilou the.

²⁰Levi khou rui keymei Kohat kaikhwangmei baihmei gaanvsaekc khang rui Ephraimmei ramv khou rui tiilou the.

²¹Ephraim tuang chyngramv khou rui paklouna duploumei kaidai sw bammei Sekem akhatni Gezer,

²²Kibzaim akhatni Horon lev twna khouringh byn khang ni twna kaidai padeih hei tiilou the.

²³Kaniw khang Dan ramv khou kaidai padeih khatni mi guay tuang khouringh byn ramv tiilou khwan e. Mi nunc kiu thu: Elteke, Gibbethon,

²⁴Aijalon, khatni Gathrimmon mi guay hei e.

²⁵Neihkey Manase ramv khou rui ni kaidai kanei mi tuang khouringh byn lev twna tiilou khwan e. Mi kiu thu: Taanak, khatni Gathrimmon hei e.

²⁶Kohat puinacmei kaikhunc guay khang kaguayna kaidai ruh lev khouringh byn bamv tiilou e.

²⁷Levimei kang akhat, Gershon puinacmei khang neihpat, Manase ramv khou rui kaidai kanei mikiu Bashan ramv khou Golanv akhatni Beeshtera kaidai hei the, kumna khouringh byn guay ni kazauh e. Golanv hei paklouna duploumei kaidai akhat muay e.

²⁸Kaniw khang Isakar tuang ramv khou rui kaidai padeih khatni mi tuang khouringh byn guay tiilou khwan e. Mi guay kiu thu: Kishion, Daberat,

²⁹Jarmut, khatni Engannim hei e.

³⁰Aser tuang ramv khou rui kaidai padeih khatni mi guay tuang khouringh byn guay kaniw khang tiilou khwan e. Mi guay kiu thu: Mishal, Abdon,

³¹Helkat, khatni Rehob hei guay hei e.

³²Naphtali tuang ramv khou rui kaidai kathumh khatni mi guay tuang khouringh byn guay kaniw khang tiilou khwan e. Mi guay kiu thu: Galili khou rui Kedes, Hammot Dor, khatni Kartan e. Kedes hei duplou nimei kaidai akhat re.

³³Gershon puinacmei khang kaguayna kaidai 13 tiilou e.

³⁴Levimei baihmei guay, Merari puinacmei khang Zebulun tuang ramv khou rui kaidai padeih khatni mi guay tuang khouringh byn guay tiilou khwan e. Mi guay kiu thu: Jokneam, Karta,

³⁵Dimna khatni Nahalal hei e.

³⁶Reuben tuang ramv khou rui kaniw khang kaidai padeih khatni mi tuang khouringh byn guay tiilou khwan e. Mi guay kiu thu: Bezer, Jahaz,

³⁷Kedemot, khatni Mephaat hei e.

³⁸Gad kaikhwang khou rui kaniw khang kaidai padeih khatni mi guay tuang khouringh byn guay tiilou khwan e. Mi guay kiu thu: Gilead khou rui Ramot, Mahanaim,

³⁹Heshbon, khatni Jazer hei e. Ramot hei paklouna dup nimei kaidai akhat re.

⁴⁰Kumna Merari puinacmei khang kaguayna kaidai 12 tiilou the.

⁴¹Levimei kiktamei khang Isaraelmei nunc rui kaidai 48 khatni khouringh byn kazauhna tiilou the.

⁴²Kaidai kathuic tei Khouringh byn kazauhmei rana re.

⁴³RINGHPOUC kamei rui kaniw pupouc nunc khou nrianhloumei kandic tei Isaraelmei nunc khou tiilou the. Kaniw rui mi kandic tei laana khou tei lungc the.

⁴⁴RINGHPOUC rui kaniw pupouc nunc khou nrianhloumei kumcna kaniw ta nchu-nzaenghna tilungclou the. Kaniw ta zauczihmei gaanv khat na sini dingda ngam mak khwan e, kalam thu RINGHPOUC rui kaniw ta rih tingamlou the.

⁴⁵RINGHPOUC rui Isaraelmei khou swloumei latdyng kaguayna tei suai zat makna tiguang tangclou khwan e.