Read Rongmei Naga JOSHUA 22 Bible Online

JOSHUA 22 - Rongmei Naga bible

JOSHUA 22

¹Hei tangv tei Joshua rui Reuben, Gad, khatni Neihpat Manasemei nunc ta kaw guang kaduaina

²kamei rui kaniw khou sa the, “RINGHPOUC bangc Mousi rui nangniw ta taanc o twna samei kaguayna tei nangniw taanc dyng the, khatni nangniw alatdanv kaguayna piu dyng the,

³Hei saanmei hei nangniw rui nangniw chana punav Isaraelmei nunc ti hei ganclou zat mak dyng the. RINGHPOUC nangniw Racguangc latdanv nangniw piu chuyna piu dyng the.

⁴Ntaw thu, RINGHPOUC aniu Ravguangc rui kalatdyng theilayna nangniw chana punav nunc ti hei nchu nrina tilungclou the. Kum thena ntaw thu Mousi rui nangniw khang tiiloumei, nangniw rui laaloumei Jordan neihpat kandic thangc tei tat dat tho.

⁵Mousi rui nangniw khou tiiloumei latdanv: RINGHPOUC nangniw Racguangc ta nzian o, kamei rui samei tei piu o, kakhou lwm nuhmei sw o, nangniw lung khatni nangdu kapwm rui kasiamruai sw o twna kadyloumei latdyn tei piu mak maanv lam e.”

⁶Joshua rui kaniw ta suaihiamlouna ndiu hanclou dat the kumna kaniw ni kaniw kai thangc hanc dat kan the.

⁷Manase kaikhwang paek khat khang Bashan khou lungc diu khang Mousi rui ramv nzanhlou the, kaikhwang paek akhat khang rui kaniw chana nunc lev lungchamc diu khang Jordan tuang neihkey biak thangc ramv nzanhlou the. Joshua rui kaniw bamv thangc ndiulou datmei ganv khou tei kaniw khou suaihiamlouna kumna kadylou the,

⁸“Nangniw khouringh khounah, daandi, kachaekc, tanzinc, ntanh akhatni pheybaan heizumei hei phungcna nangniw keydat tho. Suc-rih khou rui laaguangmei puat guay hei nangniw chana punav nunc lev nzanh o”.

⁹Kumna Reuben, Gad, khatni neihpat Manasemei nunc tei baihmei Isaraelmei nunc ta tei Kanaan kandic khou Shilo twna kawmei bamv khou ganclou ducna reydouc RINGHPOUC rui kaniw khang e twna Mousi khou kadyloumei neihpat ramv thangc kaniw kai thangc hanc dat kan the.

¹⁰Reuben, Gad, khatni neihpat Manasemei nunc tei Jordan paengc khou Gelilot kaidai guang tangc pwkhou, hei khou tei Jordan kaan pat mak khou ravchabamv daihmei akhat kasiamhlou the.

¹¹Kum tina “Zauc lo, Reuben, Gad, khatni neihpat Manasemei nunc rui Gelilot khou aniu biak thangc ravchabamv kasiamhlou bam the!” twna baihmei Isaraelmei nunc tei rui sa bam the.

¹²Mi chamv hei neihkey thangc bammei Isaraelmei nunc rui chu pwkhou neihpat thangc mei nunc ta sw khang rihphyan guay Shilo khou guang kaduai the.

¹³Heizaeng rui Isaraelmei nunc rui amuh Eleazar nac mpouh Phinehas ta Gilead ramv thangc Reuben, Gad akhatni Manase kaikhwang kapaek kaniw daeng thangc tei ndiu the.

¹⁴Tatmei chaenglwan khou tei kaikhwang kathuic tuang gaanvthaih akhat khat kapy swmei nunc gaanv ruh ta amuh Phinehas lev tat nchamc khang ndiulouna tat the.

¹⁵Kaniw rui Gilead ramv khou, Reuben, Gad, khatni neihpat Manasemei nunc khou guangna

¹⁶RINGHPOUC tuang mei nunc kapwm phaan swna kumna sa the, “Tabui swna nangniw Isaraelmei Racguangc tuang lat liamna mi ravchabamv hei kasiamh thau bam tu cho? Tabui swna nangniw Isaraelmei Racguangc theilay taanna hei kumhmei simei taanv hei taanc bam to cho?

¹⁷Aniu rui Peor khou taanc kanmei paap tei ningtow o, RINGHPOUC rui ravpyan tiguangna kamei nunc ta dandi tii kanmei tei ningtow o. Mi tangv tei aniu ntaw nganvna ryanrana bam the. Mi paap tei ruina biuh mak gena cho?

¹⁸Nangniw ntaw hei katheilay zihna hanc dat ni thena cho? Nangniw aseic hei kalat liam ti thei, nthuanh thu kamei rui Isaraelmei guayna ta lunghpuamc puni the.

¹⁹Nangniw kandic hei RINGHPOUC Ravguangc ta kalum khang mphuammei bamv sw thena cho? Kum e thei katuang ravchabamv naimei RINGHPOUC tuang ramv thangc tei pat tho. Aniu kadam laa nchamcna lungcbam dikho. Tiki RINGHPOUC aniu Racguangc tuang ravchabamv hamhna ravchabamv baihmei swpat lana RINGHPOUC lat liam riu akhatni aniw lat ni liam riu.

²⁰Swmaan kan o twna samei latdanv tei Zera rui puanhmei Akaan rui liammei zaeng rui, Isaraelmei kapwmna ta dandi tii kanmei tei ningtow o. Akaan tei kapaap zaeng rui karana theic kan mak khe, Isaraelmei mpeyna ni theic kazauh kan the.”

²¹Reuben, Gad, khatni neihpat biak bammei Manasemei nunc rui neihkey biak thangc mei gaanvthaih nunc khou tei kumna daw the:

²²“Ngammeipu hei Ravguangc e! kamei hei RINGHPOUC e. Aniw rui mi hei tabui khang sw bam tu cho twmei kamei thay e, kumna nangniw rui hei tei thaymei ta kahaw e! Aniw rui RINGHPOUC lat liamna kakhou lwmlou makna bam e thei aniw ta swluai tho.

²³Aniw rui RINGHPOUC lat liamna aniw rui ravkhaengmei bamv khang mi ravchabamv hei swloumei tuang khwan e thei RINGHPOUC kamei rui aniw ta dandi tii kan diu.

²⁴“Mi lam khang tei rui aniw kasiamh tuang hamh e. Neihkhat puinungc kiu nangniw tounac nunc rui aniw tounac nunc ta kaniw mei nunc e twna laalou makpui ganv guang puni, kumlana kaniw rui nangniw Isarael Racguangc ta kalum nuh mak ge twna sa nuh e,

²⁵RINGHPOUC rui aniw lev nangniw Reuben akhatni Gadmei nunc kak khou Jordan duithuak rui ramvrei tiswlou the, kumna RINGHPOUC Isarael Racguangc ta kalum nuh mak ge twna sa nuh e. Hei kumna nangniw tounac nunc rui aniw tounac nunc ta RINGHPOUC ta tikalum taan kanmei ta aniw pingpui zaeng rui de.

²⁶Hei zaeng rui aniw rui mi ravchabamv kasiamh thauloumei hei ravkhaengmei bamv khang hamh e.

²⁷Tiki aniw rui mi ravchabamv hei kasiamh thaumei lam kiu thu aniw rui RINGHPOUC tuang nthanmei pheykai mav khou khaeng nimei thouc guay khaengna kalum bam khwan e twmei aniw mei nunc khou ni nangniw mei nunc khou ni, kumlana thei thangc lungc guang pw nimei nunc khou nganvna lyan khang e. Mi hei nangniw tounac nunc rui aniw tounac nunc khou nangniw thu RINGHPOUC tuang mei nunc hamh e twna sa mak khang e.

²⁸Aniw rui mi kasiamhloumei lam kiu thu nangniw tounac nunc rui hei kumhmei lat hei sa pwkhou, aniw tounac nunc rui, ‘Zauc lo! Aniw pupouc nunc rui RINGHPOUC tuang ravchabamv kahakmei swlou bam e. Mi hei khaengmei bamv khang hamh e thei puatkat rawmei bamv khang hamh e, tiki aniw hei ni RINGHPOUC tuang e twmei nchin khang swloumei tuang e,’ twna daw khang e.

²⁹Aniw RINGHPOUC ta liamna ravchabamv baihmei kasiamh thauna khou tei khaengna khatni puatkat katna bam ni tuang hamh e. Katuang pheykai kaimav khou naimei RINGHPOUC aniu Racguangc tuang ravchabamv tei hamhna aniw ravchabamv baihmei kasiamh lak ge.”

³⁰Amuh Phinehas khatni kamei lev guang nchamcmei neihkey thangc mei kaikhwang guay tuang gaanvthaih ruh tei Reuben, Gad, khatni neihpat Manasemei nunc rui samei tei chu pwkhou pian the.

³¹Amuh Phinehas rui kaniw khou sa the, “Nangniw RINGHPOUC lat liammei tuang hamh bu the. Kumna RINGHPOUC rui aniu ta ganclou mak ge khatni kamei rui aniu ta dandi tii lak ge twmei thay the.”

³²Hei tangv tei Phinehas khatni gaanvthaih nunc tei rui Reuben, khatni Gad ta Gilead kandic khou ganclou ducna Kanaan kandic khou, Isaraelmei pang khou hanc guang dat lana mi lat tei kaniw khou raclou dat the.

³³Hei tei chu pwkhou kaniw tei pian the kumna Ravguangc ta thauncku the. Kaniw rui Reuben khatni Gad ruc khou rih keyna sw kasic karouclou ni twmei lat tei sa dat taan the.

³⁴“Mi ravchabamv hei rui aniu kaguay khou RINGHPOUC hei aniu Racguangc e twmei nchin khang nai bammei tuang the,” twna Reuben khatni Gadmei nunc rui sa the. Kumna kaniw rui mi zanc tei “Sakhi” twna phuaklou the.