Read Rongmei Naga JOSHUA 23 Bible Online

JOSHUA 23 - Rongmei Naga bible

JOSHUA 23

¹RINGHPOUC rui Isaraelmei nunc ta kaniw daeng khou bam nkuay bammei zauczihmei nunc khou rui nchu-nzaenghna tilungcloumei tangv tei Joshua tei tingkwm geic sih khwan the khatni gaanvthaih sih khwan the.

²Kumna kamei rui Isaraelmei guay ta, gaanvthaih nunc, kapy nunc, latzanpouc nunc, khatni meicdaihmei guay ta kaw kaduaina kumna sa the, “Ntaw thu ai hei karapouc di the.

³RINGHPOUC aniu Racguangc rui nangniw khang rui zaatc baihmei guay ta tei adowna swlou kanmei guay tei nangniw how the.

⁴Neihpat thangc Jordan duithuak khou rui neihkey thangc Mediterranean duipui nganvmei ramv kaguayna hei nangniw khang tiiloumei tuang the. Aniu rui laagut tangmei zaat guay tuang ramv guay tei ni khatni laagut makmei zaat guay tuang ramv guay tei ni ai rui nangniw khang tiilou kan the.

⁵RINGHPOUC aniu Racguangc kamei rui ‘Ai rui nangniw tuang suc-rih guay ta nangniw khou rui alay ganc puni. Nangniw tat gut pwkhou ai rui kaniw ta alay ganc puni, kumna nangniw kaniw kandic tei laa puni,’ twna latdyng swlou kanmei tei tiguang tangclou puni.

⁶Kumhpui zaeng rui Mousi tuang Riakdyn khou hyloumei guay tei piu chuyna piu khang sw o. Hei tei kakiak kalei na sini ntaamvlou gay mak ge.

⁷Nangniw pang khou ganclou duhmei nunc hei lev nowkaw nahlaana lungc nuh mak ge. Kaniw tuang rav ta kalum riu, mi khou tei huayney rio khatni mi rav nunc zanc tei saancna syangdyng sw riu.

⁸Nangniw ntaw RINGHPOUC khou ntipna bammei kumcna bam tanh tan o.

⁹Nangniw rui gut pwkhou daihmei khatni tancbauhmei zaatc mpeyna ta RINGHPOUC kamei rui alay ganclou kan the. Gaanv khat na rui sini nangniw ta ding ada ngam mak kan the.

¹⁰RINGHPOUC nangniw Racguangc rui kalatdyng theilayna nangniw khang adowlou timei zaeng rui nangniw thow thow rui pwni meic aching aching ta alay ganc ngam the.

¹¹Hei zaeng rui RINGHPOUC aniu Racguangc ta nzian taan maanv lam e.

¹²Nangniw rui kakhou ntipna bam makna nangniw pang khou ganclou duhmei nunc lev giang swna nowkaw nahlaana lungc bam ti thei

¹³mi zaat guay ti hei RINGHPOUC rui alay ganclou dat ni tuang hamh the. Mi phaan tei kaniw tei rui nangniw khang phah kumc khatni kwam kumc puni the. Kaniw tei nangniw khang nangniw nam khou kathamv kumc khatni nangniw mik khou sauh swn kumc puni the. RINGHPOUC aniu Racguangc rui tiiloumei gaymei kandic khou hei rui nangniw mutsutlou mak saanv hei tei kumc bam puni the.

¹⁴“Ntaw hei akhang thu apanty luai khang asaanh mak khe. RINGHPOUC kamei rui nrianhloumei gaymei dam kaguayna tei kamei rui nangniw khang tiilou the twmei nangniw meic kathuicna nthanna thay the. Kamei rui nrianhloumei kaguayna tei khat na sini zuanhmei tuang maekna tiguang tangclou the.

¹⁵Kamei rui nrianhloumei guayna tei taancloumei kumcna, kalat liammei guay khou taanclou puni twna samei guay tei taanclou rap puni.

¹⁶RINGHPOUC aniu Racguangc lev nangniw kak khou sw kanmei latdyng tei nangniw ngaek makna, nangniw rui kata mpatlouna rav baihmei ta kalum tat dat kan e thei, kamei rui kalungpuamcna nangniw ta riap puni. Kamei rui tiiloumei gaymei kandic khou hei nangniw lungc ngam mak nuangc puni.”