Read Rongmei Naga JOSHUA 24 Bible Online

JOSHUA 24 - Rongmei Naga bible

JOSHUA 24

¹Joshua rui Isaraelmei kaikhwang guay ta Sekem kaidai khou kaw guang kaduaina, kamei rui gaanvthaih guay, kapy guay, latzanpouc guay, khatni meicdaihmei guay ta RINGHPOUC tuang latdyng khuk daeng khou kaw guang kaduai the.

²Joshua rui meic guayna khou tei sa the, RINGHPOUC Isarael Racguangc rui nangniw khou heikumna sa e, “Reydouc nangniw pupouc nunc Euphratis duithuak paengc thangc lungcna rav baihmei ta kalum bam khwan e. Abraham lev Nahor kaney ta puanhmei Tera hei ni khwan the.”

³Hei kandic khou tei rui ai rui nangniw pupouc Abraham ta kaw patna Kanaan kandic kapwm khou zay ruan liklou the. Ai rui kakhang Isak ta tiilouna, Isak khou rui kakik kata tikingc nkiuclou the.

⁴Ai rui Isak khou nah mpouh gaanv nei, Jakob khatni Esau ta tiilou the. Ai rui Esau khang Edom tuang chyngramv tiilou the tiki nang pu nangpouc Jakob thu Izip kandic thangc key khwan e.

⁵Katang thangc ai rui Mousi lev Aron ta thouc guangna Izipmei nunc ta tiryanra kasic karouclou khwan e. Tiki ai rui nangniw ta thu Izip khou rui zaypatlou khwan e.

⁶Nangniw pupouc nunc ta Izip khou rui zay pat kanmei ta tei Izipmei nunc rui takuanh ricmei khatni takuanh gari nduanghna nthau the. Nangniw pupouc nunc tei Ntou duipui khou tei key tangc pwkhou

⁷nkhavlou khang kaniw rui ata kauc the kumna ai rui kaniw lev Izipmei nunc kak khou tizingclou the, ai rui duipui tei rui Izipmei nunc ta tiliak bin the kumna kaniw ta ti-alip luailou the. Ai rui heikumna Izipmei nunc khou swlou kanmei tei nangniw mik kahak rui how kan the. “‘Nangniw tazikramv khou kaganv tingsaengcna lungc tat bam khwan e.

⁸Hei tangv tei ai rui nangniw ta Amormei kandic, Jordan neihpat ramv khou tei zay guanglou khwan e. Kaniw rui nangniw ta adow khwan e, tiki ai rui nangniw khang adowlouna ai rui kaniw ta swmutlou the, kumna nangniw rui kaniw tuang kandic tei laa the.

⁹Khoutei Moabmei guangc, Zippor rui puanhmei Balak rui nangniw ta rih akhangv khwan e. Nangniw ta sianglou khang kamei rui Beor nac mpouh Balaam khou sa khwan e.

¹⁰Tiki ai rui Balaam lat tei chulou mak ge, kumtina kamei rui nangniw ta suaihiamlou dat the. Heikumna ai rui nangniw ta Balak baanc khou rui kanlou the.

¹¹Mi tangv tei nangniw Jordan kaan patna Jeriko khou guang the. Jerikomei rihphyan nunc rui nangniw ta adow the. Heina hamhna Amormei, Perizimei, Kanaanmei, Hittimei, Girgasmei, Hivimei, khatni Jebusimei rui ni nangniw ta adow khwan e. Tiki ai rui nangniw ta kaniw ruc khou rih tingamlou the.

¹²Nangniw hu khou, ai rui kaniw ta tiping kadunhlouna Amormei guangc gaanv nei ta alay ganclou the. Hei tei nangniw tuang buy-baeng rui hamh e.

¹³Nangniw rui taanclou makmei ramv ai rui nangniw khang tiilou the khatni nangniw rui kasiamhlou makmei kaidai pang nangniw khang tiilou the. Nangniw rui lingc keylou makmei drakha thai khatni Olive thai rei tuna khou tei lungc the.

¹⁴“Hei zaeng rui, RINGHPOUC ta pingna lungc o khatni lungning nthanna khatni lwm nuhmei swna kasiamruai sw o. Nangniw pupouc nunc rui Mesopotamia khatni Izip khou kalum bammei rav nunc tei ducna laa ganc kan o, kumna RINGHPOUC na ta kalum o.

¹⁵Nangniw rui kata kalum nii mak ge thei, aseic nangniw kapah tho nangniw pupouc nunc rui Mesopotamia khou kalum bammei rav nunc ta kalum ni ny hamh e thei Amormei rav nunc ta kalum ni cho? Ai khatni akai kaikhuncmei thu RINGHPOUC ta kalum kan ni the.”

¹⁶Meic nunc tei rui kumna daw the, “Aniw RINGHPOUC ta ganclouna rav baihmei ta kalum lak ge!

¹⁷RINGHPOUC aniu Racguangc rui aniu pupouc nunc khatni aniu ta Izip khou bangh sw bammei khou rui zay patlou the. Kamei rui taanclou kanmei charynmei taanv guay aniu how the. Aniu zaatc mpeyna tuang kandic tat ruanna tat guang the, tiki RINGHPOUC rui gaeklouna ramhsw ramhdaeng makna guang the.

¹⁸Aniu rui mi kandic khou gut pwkhou, hei khou lungc bammei Amormei guayna ta alay ganclou the. Hei zaeng rui aniw ni RINGHPOUC ta kalum ni de; kamei hei aniu Racguangc de.”

¹⁹Joshua rui meic nunc khou sa the, “RINGHPOUC ta kalummei hei chalahmei tuang hamh e. Kamei hei nthanmei Racguangc e, nangniw rav baihmei ta kalum tina kamei nuh ni tuang hamh e, mi paap tei kamei rui kuaklou ni tuang hamh e.

²⁰Nangniw rui kata ganclouna rav baihmei ta kalum tat re thei kamei rui nangniw ta dandi tii puni. Kamei hei kahu nungc tei nangniw ta gayna swlou bam sini, kamei rui nangniw ta swkamut kamailou puni.”

²¹Meic nunc tei rui Joshua khou sa the, “Kiuc hamh e! Aniw RINGHPOUC ta kalum ni the.”

²²Joshua rui kaniw khou sa the, “RINGHPOUC ta kalum ni the twna nangniw kadah kan the twmei hei nangniw rana sakhi di the.” “Ngguay,” “Aniw hei sakhi di the,” twna kaniw rui daw the.

²³Joshua rui kumna kaling the, “Kum e thei nangniw khou nai bammei rav baihmei guay tei swmaan o. RINGHPOUC Isaraelmei Racguangc ta na ningna lungc ni twmei latdyng sw o.”

²⁴Meic nunc rui Joshua khou kumna daw the, “Aniw RINGHPOUC aniu Racguangc ta kalumna lungc ni the. Aniw kalatryan piu ni the.”

²⁵Kumna Joshua rui mi nungc tei Sekem khou meic nunc phaan swna RINGHPOUC khou latdyng sw the. Kumna kaniw rui taanc nimei taanc lak nimei riak guay tei ni meic nunc khou tei tiilou the.

²⁶Joshua rui mi latdanv guay tei Ravguangc tuang Riakdyn buk khou hylou the. RINGHPOUC tuang Ravkai daeng khou naimei mphauh bang bangc khou tausuam daihmei suamclou the.

²⁷Kumna kamei rui kaniw khou sa the, “Mi tausuam hei rui aniu tuang sakhi the. RINGHPOUC rui aniu khou samei lat kaguayna tei mi hei rui chu kan the. Heikumna nangniw RINGHPOUC khou rui twan lyamna tat mak khang nangniw ruc khou sakhi sw bam puni the.”

²⁸Mi tangv tei Joshua rui meic nunc ta tei thouc hanclou dat tina meic kathuicna kabamv kabamv thangc hanc dat kan the.

²⁹Mi tangv tei RINGHPOUC bangc Joshua katingkwm 110 tangcna theic kan the.

³⁰Ephraim tuang chyngramv khou Gaas Chyng daeng khou katuang ramv Timnat Sera khou mbeihlou kan the.

³¹Joshua ringc bam saanv Isaraelmei nunc tei RINGHPOUC tuang siamruai sw bam khwan e, kamei theihmei tangv nganvna, RINGHPOUC rui Isaraelmei khang taancloumei taanv tei howmei gaanvthaih nunc lungc bam saanv thu kaniw kata kalumna bam khwan e.

³²Isaraelmei nunc rui Izip thangc rui phungc guangmei Josep tuang rou tei, Jakob rui Sekem pu, Hamor nac nunc khou rui daandi paek 100 khang liuloumei Sekem ramv khou tei mbeihlou the. Mi ramv tei Josep kikta khang tiilou the.

³³Aron rui puanhmei Eleazar ni theic the kumna kanac mpouh Phinehas khang tiiloumei, Ephraim tuang chyngramv khou naimei Gibea kaidai khou mbeihlou the.