Read Rongmei Naga JOSHUA 3 Bible Online

JOSHUA 3 - Rongmei Naga bible

JOSHUA 3

¹Nthuanh lauthwan Joshua khatni Isaraelmei guayna zipthau zaicna zipthau the, kumna Shittim zypui ganclouna Jordan biak thangc key the. Jordan kaanpat khang nkhwanna khou tei kaniw zypui sw khwan e.

²Zaeng neihthumh tangv taanvpy sinmei nunc zypui kai guay khou tatna

³meic nunc khou sa the, “Levimei amuh nunc rui RINGHPOUC nangniw Racguangc tuang latdyng khuk puanc tat kanmei ta how e thei zypui kai ra lana kaniw thei lay tho.

⁴Mi hei nangniw tatlou zat makmei bamv di he, kumna kaniw rui chaeng dinclou puni. Tiki Latdyng Khuk daeng khou thu guang tuanh riu, chowbuk 2000 dou tat nthei o.”

⁵Joshua rui meic nunc khou sa the, “nangniw pumc nthan o, kalam thu nthuanh kiu RINGHPOUC rui aniu khang charynmei taanv taanclou puni the.”

⁶Mi tangv tei amuh nunc rui latdyng khuk tei puanc lana meic nunc hu khou tat khang kamei rui latdanv tii the. Kamei rui samei kumcna kaniw taanc the.

⁷RINGHPOUC rui Joshua khou sa the, “Aseic ai rui taanclou nimei taanv paan rui Isaraelmei nunc rui nang ta kaniw tuang kapy daic liangmei e twna ngamvziw sw puni the, khatni ai rui Mousi ta nduanghloumei kumc nang ta nduanghlou bam e twmei kaniw nthanna thay puni the.

⁸Latdyng khuk puanc bammei amuh nunc ta tei kaniw duithuak key tangc pwkhou, dui khou tei tat gutna dui tin khou ding tho twna sa o.”

⁹Khoutei Joshua rui meic nunc khou tei sa the, “Khou hei RINGHPOUC nangniw Racguangc rui saloumei lat guangna nking o.”

¹⁰Nangniw tat gut pwkhou Kanaanmei, Hittimei, Hivimei, Perizimei, Girgasmei, Amormei, khatni Jebusimei ta kamei rui alay ganc puni the.

¹¹Kandih kapwm kaipouc tuang latdyng khuk tei nangniw hu khou ahuna Jordan kaanpat pwkhou ringc bammei Racguangc nangniw pang khou bam e twmei thay puni the.

¹²Isaraelmei kaikhwang kathuic khou rui gaanv khat gaanv khat laana gaanv 12 kapah pat ro.

¹³Kandih kapwm tuang RINGHPOUC tuang Latdyng Khuk puanhmei amuh nunc phay dui khou kahilou pui lev Jordan tei luangc nthaekc puni the, kumna luangc keymei dui guay tei kabamv akhat khou chungc kaduai bam kan ni the.

¹⁴Meic nunc tei Jordan kaanpat khang kaniw tuang zypui kai ganclouna, amuh nunc rui latdyng khuk tei meic nunc hu khou puancna tat thau the,

¹⁵Hei tei lau taymei ganv khwan e, kum tina dui daic khwan e. Amuh nunc tei rui dui khou backey pui lev,

¹⁶dui tei Adam kaidai kaanv khou rui chungcna Zarethan kaidai nganv chungc tangc kan the. Theihmei duipui khou luangc keymei dui tei nthaekcpary kan the, kumna meic nunc tei Jeriko khou kaanpat nuh khwan the.

¹⁷Meic nunc tei mi duithuak khou tei tat bam khou, meic guayna tat kaan pat ngam kan mak saanv amuh nunc tei RINGHPOUC tuang Latdyng Khuk puancna Jordan duithuak chung khou ding bam khwan the.