Read Rongmei Naga JOSHUA 4 Bible Online

JOSHUA 4 - Rongmei Naga bible

JOSHUA 4

¹Kaniw kapwmna tei kaanpat luai pwkhou RINGHPOUC rui Joshua khou sa the,

²“Kaikhwang kathuic khou rui gaanv khat gaanv khat laana gaanv 12 kadah pat ro,

³kumna Jordan chung khou amuh nunc ding bammei bamv khou tei rui ntauh 12 laa pat ro twna sa o. Mi tauc guay tei kaniw phungc lana nangniw aseic zingbangc zypui sw nimei bamv khou hei khuan lou khang sa tho.”

⁴Khoutei Joshua rui kamei rui kadahloumei gaanv 12 ta tei kaw guangna

⁵“RINGHPOUC nangniw Racguangc tuang latdyng khuk hu khou tat kaan lana Jordan lungc khou tei gut tho. Nangniw kathuicna ntauh akhat khat, Isaraelmei kaikhwang sing thei layna puanc tho.

⁶Mi tauc guay tei rui guang nimei ganv khou RINGHPOUC rui taanclou kanmei taanv tei meic nunc khou tiningtow bam khang e. Nthei thangc nangniw tounac nunc rui mi taukhuan hei tabui taukhuan cho twna thanv pwkhou,

⁷RINGHPOUC tuang Latdyng Khuk puanc kaanpat pwkhou Jordan luangc nthaekc kanmei ta ningtowmei tuang e twna nangniw tounac nunc khou raclou tio. Mi taukhuan hei rui mi bamv khou pat kanmei tei Isaraelmei nunc khou tiningtow tanh tan bam khang e,” twna sa the.

⁸Meic nunc tei Joshua tuang latdanv tei piuna taanc the. RINGHPOUC rui Joshua khou latdanv tiiloumei kumcna, kaniw rui Jordan chung khou rui, Isaraelmei kaikhwang sing ntauh 12 laana, kaniw tuang zypui bamv thangc phungc guangna hei khou tei khuanlou the.

⁹Latdyng Khuk puanhmei amuh nunc ding bammei bamv Jordan chung khou tei ni Joshua rui ntauh 12 khuan thaulou the. (Mi taukhuan tei ntaw nganvna nai bam di he.)

¹⁰Meic nunc ta tei RINGHPOUC rui Joshua khou taanh khang sa o twna latdanv tiimei guay tei taanc luai mak saanv amuh tei Jordan chung khou ding bam the, mi guay hei Mousi rui Joshua khou dinclou khwan e. Isaraelmei tei katumcna Jordan kaanpat the.

¹¹Kaniw kaguayna kaan pat ngam kan pwkhou amuh nunc tei RINGHPOUC tuang Latdyng Khuk puancna kaanpat the kumna meic nunc hu khou tat the.

¹²Mousi rui salou duhmei kumcna Reuben khwang, Gad khwang khatni Manase khwang kapaek tuang nggaanvmei guay, rih khang chamdaanvna meic guayna hu khou kaanpat rey the.

¹³Kaniw rihphyan meic 40,000 dou tei Jeriko daeng khou naimei nzaengc khou kaanpatna rihpwan piuna RINGHPOUC hu khou bam the.

¹⁴Mi nungc tei RINGHPOUC rui taanclou kanmei taanv tei rui Joshua ta tei Isaraelmei nunc hu khou tidaiclou kan the. Kaniw rui Mousi ta chakhwang swmei kumcna Joshua ta ni kapanty saanvsaengh khang chakhwang champouh sw kan the.

¹⁵Khoutei RINGHPOUC rui Joshua khou sa the,

¹⁶“Latdyng Khuk puanhmei amuh nunc ta tei Jordan khou rui pat dat khang latdanv tii tho.”

¹⁷Joshua rui latdanv tei tii the.

¹⁸Amuh nunc tei duikhuangc pat tangc pwkhou dui tei luangc key dat the kumna duikhuangc daiclyam key dat the.

¹⁹Reymei bw tuang zaeng ruhpui neic kaniw tei Jordan kaanpat the kumna Jeriko tuang neihpat biak Gilgal kaidai khou zypui swlou the.

²⁰Jordan khou rui puanc guangmei ntauh 12 tei mi khou tei khuanlou the.

²¹Kamei rui Isaraelmei nunc khou kumna sa the, “Nthei thangc, mi taukhuan hei tabui tuang cho twna nangniw nac nunc rui thanv pw e thei,

²²Isaraelmei nunc Jordan khou ramvkiang swna kaanpatmei ta tiningtowmei tuang e twna kaniw khou raclou tio.

²³Aniu pupouc nunc tei Ntou duipui kaanpat ngam kan mak saanv RINGHPOUC aniu Ravguangc kamei rui dui tei tikakhakclou kanmei kumcna aniu Jordan kaanpat ngam kan mak saanv dui tei kamei rui ti-ntamvlou the twna kaniw khou raclou tio.

²⁴Mi paan tei rui kandih khou lungc bammei meic katana rui RINGHPOUC tuang ngamv hei adih daic cho twmei thay puni the, kumna RINGHPOUC aniu Racguangc ta tingsaeng chakhwang champouhna bam puni the.”