Read Rongmei Naga JOSHUA 5 Bible Online

JOSHUA 5 - Rongmei Naga bible

JOSHUA 5

¹Isaraelmei nunc tei Jordan duithuak tei kaanpat ngam kan mak saanv dui tei luangc nthaekclou the twmei chamv hei Jordan neihkey biak thangc bammei Amormei guangc nunc khatni Mediterranean duipui daeng khou lungc bammei Kanaanmei guangh nunc rui chu the. Kumna kaniw Isaraelmei ta ping the kumna nchyanlou bauh mak khe.

²Hei khoutei RINGHPOUC rui Joshua khou sa the, “Maidow tauh rui baengsic kasiamhna Isaraelmei nunc ta kaneimei swna gihruamc o.”

³RINGHPOUC latdanv theilayna Joshua taanc the. Gihruamh Chyng twna kawmei bamv khou tei kamei rui Isaraelmei nunc ta gihruamc the.

⁴Joshua rui nggaanvmei guay ta gihruamc datmei lam kiu thu Izip khou rui tat thau pui ganv khou rihphyan sw nuhmei nggaanvmei guay tei tazikramv khou theic ngam khwan e.

⁵Izip khou rui kaamc thaumei nggaanvmei guay tei thu gihruamc khwan e, tiki tazikramv khou rui puanc datmei guay tei thu gihruamc dat mak khwan e.

⁶Isaraelmei guay rui tazikramv khou tingkwm 40 ruan tat khwan e, mi ganv khou tei kaniw RINGHPOUC lat liampui zaeng rui Izip khou rui kaamc thaumei rihphyan guay tei theic ngam khwan e. Kamei rui latdyng swkanmei kumcna kaniw rui kaniw pupouc khou nrianhloumei ramv gaymei kandic ta tei kaniw ta tihow tangc kan mak khe.

⁷Kaniw nac nunc ta tei gihruamclou mak khe, kumna mi meickin kathanc ti hei Joshua rui gihruamclou the.

⁸Gihruamc luaimei tangv, kazam gay dat mak saanv kaniw meic kapwmna zypuikai khou bam khwan e.

⁹RINGHPOUC rui Joshua khou sa the, “Izip khou bangh sw bammei tuang zakmei tei aseic hei ai rui nangniw khou rui laa ganclou kan the.” Hei zaeng rui mi bamv zanc tei Gilgal twna kaw the. Mi zanc hei ntaw ni kawna bam e.

¹⁰Isaraelmei nunc Jeriko nzaengc ramv Gilgal khou zypuikai swna bam khou, mi bw tuang zaeng 14 nungc tingzyn kaniw kaanpatmei ngai ngay the.

¹¹Kaanpatpui ngai nthuanh thaupui lev mi bamv khou tei thau bammei tunuhmei phunling kabicna khatni khay lou makmei ntyan kasiamhna tu the.

¹²Mi khou tei rui thauna manna key nthaekc kan the, kumna Isaraelmei nunc tei manna akhat na sini tutow dat kan mak khe. Mi tangv tei rui thauna Kanaan khou lingc keymei phunling phunlu rui tu dat kan the.

¹³Joshua Jeriko daeng khou guang pwkhou, meic gaanv khat baengsaeng sinna kahu khou ding bammei ta tamthuang the. Joshua kadaeng khou guangna kumna thanv the, “Nang hei aniw tuang ricmei ny hamh e thei zauczihmei cho?”

¹⁴“Kiuc hamh e,” “Ai hei RINGHPOUC tuang ricmei nunc tuang rihpy e,” twna mipu tei rui daw the. Joshua rui kandih khou sow nkhum keyna kalum the, “Nangbangcpu khang tabui lat salou khang naina cho twna thanv the.”

¹⁵RINGHPOUC tuang ricpy tei rui kakhou sa the, “Nang tuang phaythuapc luak pat ro, mi hei nthanmei bamv e.” Kumna Joshua kaphaythuapc luak pat the.