Read Rongmei Naga JOSHUA 6 Bible Online

JOSHUA 6 - Rongmei Naga bible

JOSHUA 6

¹Isaraelmei nunc gut nuh mak khang Jeriko raengckat taan tiph tiplouna rigaanv bam khwan e. Meic gaanv khat na sini mi kaidai khou tei pat ni pat nuh mak gut ni gut nuh mak khwan e.

²RINGHPOUC rui Joshua khou sa the, “Ai rui Jeriko kaidai hei kaguangc khatni katuang bauhmei ricmei guay lev twna nang baanc khou tiilou kan the.

³Nang khatni nang tuang ricmei guay mi kaidai ti hei zaeng neihkhat khou tat nkuay guay guayna zaeng charuk tat nkuay o.

⁴Amuh gaanv chanei ziuchic chei akhat akhat sinna Latdyng Khuk hu khou tat nina e. Zaeng chaneimei nungc thu amuh nunc rui bianggun tei amuanna mi kaidai tei tat nkuay liang chanei nina e.

⁵Mi tangv tei kaniw kakhwan zay saengcna amuan nina e. Mi khwan tei nangniw chu rappui lev, meic guayna kauc ranvna kauc thau nina e, kum e thei kaidai raengc tei pangv key puni. Khoutei rihmei guay tei kaidai lungc khou tei gut nina the.”

⁶Joshua rui amuh nunc ta kaw guang kaduaina kumna kaniw khou sa the, “Nangniw Latdyng Khuk tei puancna tat nina the, kumna mi hu khou tei nangniw gaanv chanei bianggun sinna tat nina the.”

⁷RINGHPOUC tuang Latdyng Khuk puanhmei nunc hu khou tei rihtiumei nunc tat huna mi kaidai tei tat nkuay khang Joshua rui kamei nunc khou latdanv tii the.

⁸Joshua tuang latdanv thei layna amuh nunc gaanv chanei rui ziuchic chei tuang bianggun chanei amuanna RINGHPOUC mav khou tat gut the, kumna Poubauhmei tuang latdyng khuk puanhmei nunc tei lay gut the.

⁹Amuh nunc hu khou tei rihtiumei nunc rui bianggun amuanna tat the, bianggun tei amuan nthaekc makna bam khou rigaanvmei nunc latdyng khuk thei khou tat gut the.

¹⁰Tiki kamei rui latdanv pat mak saanv kauh mak khang, lat akhat na sini sa mak khang Joshua rui latdanv tii khwan e.

¹¹Kumna mi nunc tei RINGHPOUC tuang Latdyng Khuk puancna mi kaidai ta tei tat nkuay guai khang sa the. Mi tangv tei kaniw guang datna zingbangc zypui khou ziplou the.

¹²Joshua tei lauthwan thwanzingh zipthau dat khwan e, kumna amuh nunc tei rui RINGHPOUC tuang Latdyng Khuk tei puancna tat dat muay the.

¹³Amuh nunc gaanv chanei tei ziuchic chei bianggun chanei tei amuan dat muayna RINGHPOUC Latdyng Khuk puanhmei hu khou tei tat thau dat the. Rihtiumei nunc tei rui kaniw hu khou tei tat the kumna rigaanvmei nunc rui Latdyng Khuk puanhmei thei khou tat dat muay the, kumna kaniw tat saanv bianggun amuanna kaidai tei tat nkuay the.

¹⁴Mi kaneimei nungc hei kaniw kaidai tei nkuaylou guay dat lana zypui khou hanc guang dat the. Kaniw hei tei kumcna zaeng charuk sw the.

¹⁵Zaeng chaneimei nungc lauthwan thwanzingh na zip thauna mi thiak tei kumcna kaidai tei tat nkuayliang chanei the. Mi kaidai ta tei kaniw tat nkuayliang chaneimei thu mi nungc tei na de.

¹⁶Tat nkuay guang chanei pwkhou, amuh nunc rui bianggun amuan the mi tangv Joshua rui meic nunc khou latdanv tiina kumna sa the, “Ntaw thu khwm diauh diau thau tho RINGHPOUC rui mi kaidai hei nangniw khang tiilou kan the.

¹⁷RINGHPOUC khang katmei swna mi kaidai khatni mi lungc khou naimei kaguayna hei swmaan mutsutlou nina e. Mangcsangmei luc Rahab lev kakai khou bammei nunc na ta daeklou nina e, kalam thu kamei rui aniu rui ndiuloumei gwanrummei nei ta nkamhlou the.

¹⁸Nangniw ramh akhat na sini laa thau nuh mak ge. Nangniw hei tei laa e thei nangniw rui Isaraelmei ta tiryanralou puni khatni tiswkamut kamailou puni.

¹⁹Daandi, kachaekc, tanzinc, ntanh rui swmei puat kaguay RINGHPOUC khang e. Hei tei RINGHPOUC tuang lanv kai khou lou nina e.”

²⁰Khoutei amuh nunc rui bianggun amuan the. Hei tei meic nunc rui chu rappui lev, kaniw kauc ranvna khwm the, kumna raengh guay pangv key the. Mi khou tei rihmei guay kaidai khou tei pak nzutphut kuna mi kaidai tei laa the.

²¹Kaniw baengsaeng zay thauna kaidai khou bammei ntumei, nggaanvmei, alauc gaanvthaih, meic katana ta dow luai the. Kaniw rui guaih, lauziu, kuanniam kaguay tei ni dow luai the.

²²Gwanrummeipu nei khou tei Joshua rui kumna sa the, “Nang nei rui nrianhlou kanmei kumcna mangcsangmei luc kai khou tei gutna kamei lev kakai kaikhuncmei kariang kaluaic guay ta nduangh pat tho.”

²³Kumna nggaanv nac nei tei tatna Rahab ta, kapui kapu, kachaic kakainac nunc khatni kakai kaikhuncmei khatni kariang kaluaic guay ta nduangh guang the. Kamei rui kakai kaikhuncmei kaguayna ta kaw guangna Isaraelmei zypui daeng khou tibamlou the.

²⁴Mi tangv kaniw rui mi kaidai tei mai thow kan the. Kaniw rui RINGHPOUC tuang lanv kai khou phungc guangloumei kachaekc, daandi, tanzinc khatni ntanh rui kasiamhmei puat guay tei hamhna baihmei mi kaidai khou naimei ramh kaguayna rawna mbut mbaih ngam kan the.

²⁵Tiki Joshua rui mangcsangmei luc Rahab khatni kariang kaluaic guay panty thu kanlou the, kalam thu kamei rui thoucloumei gwanrummeipu nei ta kamei rui nkamhlou the. (Kariang kaluaic aseic nganv Isaraelmei pang khou lungc bam e.)

²⁶Mi ganv khou tei Joshua rui tanhmei latdanv tiina sa the, “Thow pwni Jeriko kasiamh thau dat khang swpui mei khou tei RINGHPOUC tuang syang keylou puni. Thow pwni kaiphwn thwan thau datpui mei tei kanac mpouh gaanvthaih liangmei theic puni; thow pwni mi raengckat guay kasiamh thau datpui mei tei kanac alauc liangmei theic puni.”

²⁷Kumna RINGHPOUC rui Joshua ta lamluailou tina kazanc tei kandih kapwm khou zinlik kan the.