Read Rongmei Naga JOSHUA 7 Bible Online

JOSHUA 7 - Rongmei Naga bible

JOSHUA 7

¹Jeriko khou naimei ramv akhat na sini laa thau nuh mak ge twna RINGHPOUC rui Isaraelmei khou tiiloumei latdanv tei piu mak khe. Kalam thu Akaan twna kawmeipu gaanv khat rui puatc asaekc laa the, Akaan hei Karmi nac mpouh Zabdi tou Juda kaikhwangmei Zera kikmei e, Kum tina RINGHPOUC rui Isaraelmei ta lunghpuamc maithau the.

²Bethel tuang neihpat biak, Bethaven daeng khou naimei Ai kaidai ta gwanrum tat ro twna Joshua rui Jeriko kaidai khou rui meic thouclou the. Kaniw tatna zauc lana,

³kaniw rui Joshua khou kumna guang sa dat the, “Ai namv tei meic kaguayna rui adow bam khang maek ge. Meic ching nei ching thumh dou na thouclou rap bo. Rihmei kapwmna thouc ngangh bam nangh e; mi hei daic sihmei kaidai hamh e.”

⁴Isaraelmei 3000 dou rui adow the, tiki kaniw ta nthau hanc pat dat the.

⁵Ai namvmei nunc rui raenghkat khou rui nthau thauna Shebarim nganv nthau key the, kumna kanganv keymei bamv khou tei gaanv 36 dou ta dowluai the. Khoutei Isaraelmei nunc ping the, bauc ngam mak khe.

⁶Joshua khatni Isaraelmei tuang gaanvsuh gaanvthaih nunc lung kabiuna kaniw tuang pheybaan siat kaekna, kaniw py khou mbut ruailouna RINGHPOUC tuang Latdyng Khuk mav khou sow nkhum khuakh khuak keyna tingzyn nganvna zipna bam the.

⁷Joshua rui sa the, “He RINGHPOUC Ravguangc, tabui swna aniw ta Jordan paengc khou nduangh patlou tu cho? Aniw ta Amormei baanc khou tiilouna sw kamut kamailou khang cho? Tabui swna aniw ta Jordan paengc thangc tei tibam rap mak tu cho?

⁸Tabui lat ai sa ni na tha? He RINGHPOUC, ntaw thu Isaraelmei hei zauczihmei rui alayna pak the.

⁹Kanaanmei khatni mi kandic khou bammei guay rui chamv hei chu puni the. Kaniw rui aniw ta ding nkuayna kandih ramc khou aniw zanc chudat mak khang swluai ngam puni the. Nangzanc hym kachanh mak khang nang tabui swlou ni cho?”

¹⁰RINGHPOUC rui Joshua khou sa the, Thau tho! Nang tabui swna kandih khou heikumna aliau bam tu cho?

¹¹Isaraelmei paapc taanc the! Ai rui kaniw khou tiiloumei latdanv tei kaniw piu mak khe. Swmaan ganc nimei puat kaniw laalou the. Kaniw hei tei houc the, mi lam khou tei saraamcna sa the, kumna kaniw tuang puat pang khou lou the.

¹²Hei zaeng rui Isaraelmei kaniw zauczihmei ta dingda ngam mak tuang e. Kaniw tei zauczihmei nunc khou rui pak the, kalam thu kaniw rana kaniw ta swkamut kamailou khang swlou the! Ai rui laa riu twna samei puat tei swmaan ganh mak ge thei ai nangniw ta nkhavlou dat lak khe!

¹³Thau tho! meic nunc ta sw nthanmei taanv taanc tho, khatni kaniw rana ni nthuanh khang rui sw nthanpat khang sa o, kalam thu RINGHPOUC Isarael Racguangc rui sa e, “Sw kamut kamai o twna saloumei puat tei nangniw pang khou meic gaanvsaekc rui laa gutna rylou bammei nai the, he Isarael; mi puat guay tei gancpat mak saanv zauczihmei ta nangniw ngam dat ni tuang hamh the.

¹⁴Kumna nthuanh lauthwan kaniw ta kaikhwang kaikhwang swna zay pat puni the. Ai rui ntw patmei khwang tei puinac puinac swna pat dat puni the. Ai rui ntw patmei puinac tei kaikhunh kaikhunh swna phungc pat dat puni the. Ai rui ntw patmei kaikhunc tei gaanv khat gaanv khat swna guang ding puni the.

¹⁵Ai rui ntw patmei khatni laa nuh makmei puat phu patmeipu ta tei kakaikhunc khatni katuang puat guay lev kazauhna mai ntei puni, kalam thu kamei rui Isaraelmei ta tizak kasiclou the khatni atuang latdanv kalyan the.”

¹⁶Nthuanh lauthwan zaicna Joshua rui thauna kaikhwang kaikhwang phu thauna Juda kaikhwang ta ntw pat the.

¹⁷Kamei rui Juda kaikhwang ta puinac puinac swna nduangh guang the, kumna Zera puinac ta ntw pat the. Mi tangv tei kamei rui Zera puinac ta kaikhunh kaikhunh swna phu pat the, kumna Zabdi kaikhunc ta ntw pat the.

¹⁸Kamei rui Zabdi kaikhwangmei nggaanvmei guay ta kaw guangna Zabdi tou, Karmi nac Akaan ta ntw pat the.

¹⁹Joshua rui kakhou kumna sa the, “Anacpule RINGHPOUC, Isaraelmei Racguangc hu khou nchumhna sana nang khuay kalauh o. Nang taanc kanmei tei akhou sa tho. Hei tei akhou nkamh khang sw riu.”

²⁰Akaan rui daw the, “Hei tei nchumh the,” RINGHPOUC Isaraelmei Racguangc hu khou ai paapc taanc the.

²¹Aniu rui asut guangmei puat pang khou gay sihmei Babilonmei thiula daihmei akhat, daandi kilogram kanei dou, khatni kilogram paek dou nritmei kachaekc dwm akhat ai laa nii langvna houc the. Hei tei atuang pheykai bangc khou daandi tei lev mphumhlou kan the.

²²Kumna Joshua rui meic gaanvsaekc ta thouclou tina kaniw pheykai thangc kiu pak tat the kumna laa lak nimei puat daandi tei lev kabangc khou mphumhlou bam changh khwan the.

²³Kaniw rui hei tei pheykai khou tei rui laa patna Joshua khatni Isaraelmei guayna hu khou laaguang the, kumna hei tei RINGHPOUC mav khou lou key the.

²⁴Joshua khatni Isaraelmei guay rui Akaan ta kamei rui houc guangmei daandi, thiula, kachaekc dwm, kanac mpouh nunc, kanac aluh nunc, kuanniam, lauziu guay khatni katuang pheykai, katuang naimei kaguayna ta nym lana ryanramei nzaengc thangc zaykey the.

²⁵Joshua rui sa the, “Tabui swna nang rui aniw ta heidi tiryanralou bam tu cho? Ntaw thu RINGHPOUC rui nang ta tiryanralou puni the!” khou tei Isaraelmei guay rui Akaan ta ntauh nkwam luai the; khatni kaikhunhmei guay ta ni ntauh nkwamluaina naimei puat guay ta lev mai ntei the.

²⁶Kaniw rui karuc khou taukhuan dai khuanlou the, hei tei ntaw ni nai bam e. Hei zaeng rui mi bamv tei ntaw nganv ryanramei nzaengc twna kaw bam e. Mi tangv tei RINGHPOUC lungpuam nthaekc the.