Read Rongmei Naga JOSHUA 8 Bible Online

JOSHUA 8 - Rongmei Naga bible

JOSHUA 8

¹RINGHPOUC rui Joshua khou sa the, “Rihmei guay ta nduangh lana Ai thangc ngangh tho. Ping dat ri tho khatni nangniw lung tangkhyn ri tho. Ai mei guangc ta ai rui nang baanc khou tiilou puni, kamei nunc, katuang kaidai, khatni kakandih nang tuang sw puni.

²Nang rui Jeriko khatni mi kaidai tuang guangc khou swlou kanmei tei kumcna Ai khatni mi kaidai tuang guangc khou swlou puni. Ntaw thu Ai kaidai tuang puat khatni khouringh khounah guay nangniw khang laa nuh the. Mi kaidai ta tei thay mak daekna nthei biak rui adow gut khang chamdaanv o.”

³Kumna Joshua karihmei nunc ta nduanghna Ai thangc tat khang chamdaanv the. Kamei rui gay liangmei ricphyan 30,000 kadahpatna kaniw ta zingbangc thouclou the.

⁴Kumna kaniw khou salou the, “Mi kaidai thei thangc tei dup bam o, tiki duclangvna tat riu,chamdaanvna bam tho.

⁵Amei nunc ta nduanghna ai mi kadai khou tei guang puni. Ai kaidaimei nunc tei aniu ta nthau pat pwkhou, reymei luan khou tei kumcna aniu pak puni.

⁶Aniu rui kaniw ta kaidai khou rui duc nganv thangc nduangh ganclou mak saanv kaniw aniu ta nthau tat puni the. Reymei luan khou tei kumcna kaniw ta pingna pak tat tw e twmei kaniw ning puni.

⁷Khoutei nangniw dup bammei bamv khou tei rui patna kaidai tei gut laa tho. RINGHPOUC nangniw Racguangc rui mi kaidai tei nangniw khou tiilou puni.

⁸Mi kaidai tei nangniw laa tang pwkhou, RINGHPOUC rui samei kumcna, hei tei mai thoulou tho. Mi hei nangniw khang tiimei latdanv the.”

⁹Kumna Joshua rui kaniw ta thouc pat the, kaniw rui Ai tuang neihkey biak thangc Ai lev Bethel kak khou tatna dup the. Joshua thu zingbangc tei meic nunc lev zypui kai khou zip the.

¹⁰Joshua rui lauthwan thwanzingh zipthauna rihmei nunc ta kaw kaduai the. Khoutei kamei lev Isaraelmei gaanvthaih nunc rui kaniw hu khou tatna Ai thangc ngangh the.

¹¹Joshua tei kamei rui nduangh tatmei rihmei nunc lev twna kaidai tuang raengcmun daihmei lev puanc achowmei dihpy biak thangc zypui sw the. Ai kaidai lev kaniw kak khou nzaengc baek akhat nai e.

¹²Kamei rui rihmei 5000 dou nduanghna neihkey biak thangc, Ai kaidai lev Bethel kanei kak khou tiduplou the.

¹³Rihmei nunc tei zypui daihmei rui mi kaidai tuang dihpy biak thangc khatni baihmei guay rui neihkey biak thangc bam lana adow khang chamdaanv the. Mi nungc zingbangc tei Joshua nzaengc baek khou tei bam the.

¹⁴Joshua mei nunc ta tei Ai mei guangc rui how pwkhou, katumcna kamei khatni kamei nunc Isaraelmei nunc ta adow reymei bamv khou tei adow khang Jordan nzaengc biak thangc pak pat the. Kata thei thangc rui adow puni twmei kamei thay mak khwan e.

¹⁵Joshua khatni kamei nunc tei pakmei thak sw the, kumna tazikramv biak thangc pak tat the.

¹⁶Kaniw ta tei nthau tat khang kaidai khou bammei rihphyan guay ta kabai guang the, kumna kaniw rui Joshua ta nthauna kaidai khou rui duc sih thangc nthau tat the.

¹⁷Ai kaidaimei rihphyan guay tei Isaraelmei ta nthau tat kan the, kumna mi kaidai tei gaek nimei maekna raenghmun laanc daicna laanclou the.

¹⁸Khoutei RINGHPOUC rui Joshua khou sa the, “Nang tuang buypaanv tei Ai biak thangc souc karih tho, ai rui mi kaidai hei nang baanc khou tiilou the.” Joshua rui katuang buypaanv tei Ai biak souc karihlou the.

¹⁹Joshua kabaanc zay thau rappui lev, dup bammei nunc tei ding palup palup thauna kaidai thangc tei pak gutna kaidai tei lai the. Katumcna mi kaidai tei kaniw rui mai thoulou the.

²⁰Ai kaidaimei nunc tei ziangrih pat pwki maikhou tingpuk khoutangc bammei how the.Tazikramv biak thangc paktat kanmei Isaraelmei nunc tei kaniw ta adow khang ngalanc pat dat the. Kaniw duak dat nimei chaeng maek khe.

²¹Kakang akhat tei rui kaidai tei laina mai thouloumei mai tei Joshua lev kamei nunc rui how pwkhou, kaniw nganlanc patna Ai kaidaimei nunc ta adow the.

²²Kaidai khou gutmei Isaraelmei nunc tei ni rih bamv khou tei key dat the. Kumna Ai mei ta tei Isaraelmei nunc rui ding haengv the, kumna kaniw kaguayna ta swluai ngam the. Meic gaanv khat na sini pak duak mak khe, meic gaanv khat na sini ringc pat mak khe.

²³Ai mei guangc ta na swluai nsaekclou the. Kata tei nym lana Joshua khou nduangh guang the.

²⁴Isaraelmei nunc rui kaniw ta nthau keymei tazikramv khou tei kaniw ta zauczihmei nunc ta tei dow luailou ngam kan the. Mi tangv tei kaniw Ai kaidai thangc guang dat lana khou tei bammei kaguayna ta dow luai the.

²⁵Mi nungc tei Ai mei ntumei nggaanvmei kaguayna maansei 12,000 baengmun khou theic the.

²⁶Kalam thu Joshua rui Ai mei maansei guayna ta swluaipary mak saanv katuang buypaanv tei Ai kaidai biak thangc souc karihlouna loukey zat makna bam khwan e.

²⁷RINGHPOUC rui Joshua khou saloumei theilayna mi kaidai khou rui laamei khouringh khounah khatni puatc guay tei kaniw khang laa the.

²⁸Joshua rui Ai kaidai tei mailouna swmutlou the. Ntaw nganv hei tei heikumna nai bam e.

²⁹Kaniw rui Ai mei guangc ta thingbang khou thaengclou the kumna kapumc tei neih key mak saanv thaengclou the. Kumna kapumc tei laa key khang Joshua rui neihkey pwkhou latdanv pat the, kumna hei tei kaidai raengckat khou ganclou the. Kaniw rui kapumc tei taukhuan daihmei rui khuan binlou the. Hei tei ntaw nganv nai bam e.

³⁰Mi tangv Joshua rui Ebal chyng khou RINGHPOUC khang ravchabamv akhat kasiamh thau the.

³¹RINGHPOUC bangc Mousi rui Isaraelmei guay khou latdanv tiimei khou piuna latdanv buk khou hyloumei theilayna ntanh rui kahilou makmei ntauh rui ravchabamv kasiamh the. Mi khou tei rawna khaeng the khatni alamvpuatkat ni khaeng the.

³²Khoutei Isaraelmei nunc hu khou, Mousi tuang Riakdanv tei ntauh ruc khou hylou the.

³³Isaraelmei nunc tei kaniw tuang gaanvthaih nunc, kapy nunc, latzanpouc nunc khatni kaniw pang khou lungc bammei gin nunc kazauhna Latdyng Khuk tuang baanzat baandau thangc dingna kaniw khat khat ta ding achowna ding bam the, kakang akhat rui Gerizim chyng biak thangc, kang akhat rui Ebal chyng biak thangc thei karihlouna ding bam the. Latdyng Khuk puanhmei amuh nunc ni kanaek kanei khou tei kabamv kabamv khou ding bam the. Suaihiam laa nimei ganv khou heikumna ding o twna RINGHPOUC bangc Mousi rui kaniw khou latdanv tiilou khwan e.

³⁴Khoutei Joshua rui Riakdanv kapwm tei pac ranvna pac pat the, suaihiam akhatni syang Riakdanv khou hyloumei kahak tei lev kazauhna pac pat the.

³⁵Mousi tuang latdanv kathuicna tei guang kariu bammei meic guay ntu pangna khatni kaniw pang khou lungc bammei gin-ga guay hu khou tei Joshua rui pac pat the.