Read Rongmei Naga JOSHUA 9 Bible Online

JOSHUA 9 - Rongmei Naga bible

JOSHUA 9

¹Jordan neihkey thangc chyngramv khou, chyngphay khou, Mediterranean duipui daeng khou dihpy biak Lebanon nganv lungc bammei Hittimei, Amormei, Kanaanmei, Perizimei, Hivimei, khatni Jebusimei guangc nunc rui Isaraelmei rui rih ngam guangmei chamv tei chu the.

²Kaniw guang kariuna lungh chamhna Joshua khatni Isaraelmei ta adow khang sw the.

³Tiki Gibeon kaidai khou bammei Hivimei nunc tei Joshua rui Jeriko lev Ai kaidai khou swlou kanmei chamv tei chu lana kata guat di kho twna ding the.

⁴Kaniw rui Isaraelmei nunc ta guat khang kathiak kasiamhna borackhau raan khou ntyan kanghmei samhtow katungh thungmei thimclouna, khuammei drakha dui khau raan khou drakha dui louna kaniw tuang kuanniam nunc khou puatc kasiamh the

⁵kaniw pheybaan karaan kariu piu the khatni phaythuapc karaan khuammei runlou the,

⁶Kumna Gilgal khou zypui kai bamv khou tei kaniw rui Joshua daeng khou guangna Joshua khatni Isaraelmei nunc khou kumna sa the, “Aniw hei kandih duh thangc rui nang lev aniw latdyng sw niina guang tuang e.”

⁷Khoutei Isaraelmei nunc tei rui Hivimei nunc khou kumna daw the, nangniw ana khou bammei nunc kan de tukumhna latdyng swbam nina cho?

⁸Kaniw rui Joshua khou sa the, “Aniw hei nang bangc nunc de.” Joshua rui kaniw khou thanv the, “Nangniw hei tabui kumhpui mei nunc cho? Nangniw tabui thangc rui guangmei nunc cho?”

⁹Kaniw rui mundaw the, “Aniw kandih duh thangc rui guangmei nangbangc nunc e, aniw guangmei hei thu, RINGHPOUC nangniw Racguangc zanc dinckauh bammei zaeng rui e, mikiu thu Izip khou charynmei taanv taanclou kanmei kaguayna tei aniw chu the twna kaniw daw the.

¹⁰Jordan neihpat biak thangc bammei Amormei guangc nei Ashtarot khou lungc bammei Heshbonmei guangc Sihon khatni Bashanmei Og khou taanclou kanmei ta ni aniw chu the.

¹¹Aniw tuang gaanvthaih nunc khatni meic guayna rui puktaek phungcna nang ta ariw tat tho twna thoucloumei tuang the. Nangniw tatna kaniw siamruai sw tho, kumna aniu lev latdyng sw khang sa tho twna thouclou the.

¹²Aniw tuang ntyan hei zauc tho. Mi hei aniw lumcgunh gunna phungc thaumei tuang e. Tiki zauc tho! ntaw thu kangc ngam the khatni samhtow nziuh thuth thut ngam the.

¹³Mi drakhadui khau guay hei kathanc thiangna phungc thaumei tuang e. Zauc tho, ntaw thu kaek ngam the. Chaeng saeng tat guang khou rui aniw tuang pheybaan khatni phaythuapc guay ni kaek ngam the.”

¹⁴Isaraelmei nunc tei RINGHPOUC khou tukumh kho cho twmei thanvlou makna kaniw tuang ntyan tei tu the.

¹⁵Joshua rui Gibeonmei nunc lev champanv swmei tuang latdyng sw the kumna kaniw ta kahi kaha lak khe twna salou the. Mi tuang latdyng tei ngaek ni the twna Isaraelmei tuang gaanvthaic nunc rui ntipmei latdyng swlou the.

¹⁶Mi nunc tei ana khou lungc bammei nunc de twmei mi latdyng tei swlou tangmei tangv neihthumh tangv thay pat the.

¹⁷Isaraelmei nunc tei kaamcthau the kumna zaeng neihthumh tangv kaniw tuang kaidai Gibeon, Khephira, Berot, khatni Kiriath Jearim guang tangc the.

¹⁸Tiki Isaraelmei nunc rui kaniw ta swluai dat ngam mak khe, kalam thu kaniw tuang gaanvthaic nunc rui RINGHPOUC Isaraelmei Racguangc zanc khou ntipmei latdyng swlou kan the. Kum tina Isaraelmei nunc rui gaanvthaih nunc khou mi lam tei sa tina

¹⁹kaniw rui kumna daw the, “RINGHPOUC Isaraelmei Racguangc zanc khou rui aniw rui ntipmei latdyng kaniw khou swlou kan the. Ntaw thu aniu rui kaniw ta kahi dat nuh mak khe.

²⁰Aniu tuang latdyng theilayna kaniw ta mpatlou nina di the; kum timak ge thei Ravguangc rui aniu ta dandi tii puni.

²¹Kaniw hei aniu khang thingriam duizuna lungc bam kan di tho.” gaanvthaih nunc rui heikumna salou the.

²²Joshua rui Gibeonmei ta kadaeng khou kaw guangna kaniw khou kumna sa the, “Nangniw hei khouna lungc bam lana tabui swna nangniw duh thangc rui guangmei de twna aniw ta guat bam tu cho?

²³Hei zaeng rui Ravguangc rui nangniw ta sianglou the. Nangniw hei bangh swna aRavguangc tuang Ravkai khou thingriam duizuna lungc bam nina the.”

²⁴Kaniw rui daw the, “Aniw theic pingmei zaeng rui hei tei kumna sw tina dyng the. Mi kandic kapwm hei laa tho kumna mi khou lungc bammei maansei katana ta swluai tho twna RINGHPOUC nangniw Racguangc rui kabangc Mousi khou kadylou the twmei hei kaling di the twmei aniw chu the.

²⁵Ntaw thu aniw hei nang baanh bangc khou nai the; nangniw rui aniw khou swlou nimei kiu swlou rap pu tho.”

²⁶Heikumna Joshua rui Gibeonmei ta kanlou the kumna kaniw ta tiswluai mak khe.

²⁷Tiki kamei rui kaniw ta bangh swna Isaraelmei nunc khang khatni RINGHPOUC tuang ravchapaeng khang thingriam khang khatni duizu khang swlou the. Aseic nganvna kaniw hei RINGHPOUC ta kalum khang kadahloumei bamv khou mi taanv hei taancna bam e.