Read Rongmei Naga 1 TIMOTHI 6 Bible Online

1 TIMOTHI 6 - Rongmei Naga bible

1 TIMOTHI 6

¹Ravguangc zanc khatni aniw tuang latdyn ta sakasic mak khang, bangh sw bammei kaniw ni kaniw kaipouc nunc ta chakhwang sw nina e.

²Lwmloumeipu akhat bangc nunc tei kakaipouc ta chana de twna ramh sak mak tuang sw lak nina e. Mi phaan tei kaniw taanc chuylou ranv nina e. Kalam thu kaniw rui taanclou nimei tei kaniw rui nzianmei lwmmei nchamc khang e. Mi lat guay hei dinclou o khatni piu khang katiulou o.

³Aniu Poubauhmei Jisu Khrista tuang kalingmei lat khatni ravningmei tuang latdyn ta nuh makna baihmei riakdyn dinhpui mei tei,

⁴daihriw swmei rui khungcna kamei ramhkhat sini thay mak ge. Kakhou simei tipat khang lat lam khou agay agi niimei lungning rui padik ge. Mi khou tei rui patmei thu mamavmei, tamramei, sakasicmei, ningkasicmei,

⁵kalungning khou nchumhmei maekmei mei nunc pang khou agay agi bammei hei the. Ravningmei hei thu lungcgay nipui chaeng e twna kaniw ning e.

⁶Ngguay, ravningmei tuang lunggai kiu thu, kakhou nai naimei tei pian rapmei tei the.

⁷Kalam thu aniu mbaanv khou ramhkhat na sini phungc guang mak ge; ramhkhat na sini phungc tat ni tu hamh e.

⁸Hei zaeng rui, tu zangv khang nai, pheybaan nai tw e thei, aniu hei tei rui pianmei sw nina e.

⁹Tiki lungcgay niimei nunc tei nthiammei khou keylouna mpangmei tuang kaniw ta sw kasic nimei ta kahawmei phac khou keylouna maan kanmei mpeyna nai the.

¹⁰Kalam thu syan agaamvmei hei simei guay tuang bangbi e. Syan kahaw khou rui meic gaanvsaekc thu lwmmei khou rui tat pat lana lungh ryanramei rui kaniw lungthw sauh biw kumc bam geic e.

¹¹Tiki, Ravguangc tuang mei nang thu, mi guay khou rui rei pat ro; kumna ravchaptatmei, ravningchuymei, lwmmei, nzianmei, khaengvthaymei, khatni lungh zaenghmei nang khou nai khang karamc o.

¹²Lwmmei tuang lauluangc hei pak ranvna pak tho, kumna ringcsuangmei tei laa tho. Nang lwmlou the twna meic mpeyna hu khou sa ndauh khou tei, nang ta kawloumei hei mi ringhmei hei tiilou khang e.

¹³Ramh guayna khou ringhmei tiiloumei Racguangc hu khou, Pontia Pilat hu khou sa ndauhlou kanmei Khrista Jisu hu khou, ai rui nang khou mi latdanv hei tii guang e.

¹⁴Mi hei aniu Poubauhmei Jisu Khrista guang mak saanv piuna tat bam khang e.

¹⁵Mi tingmik kiu hymdaihmei, kanei makmei ngamv Kaipouc, guangh guay Guangc khatni kaipouc guay Kaipouc, Ravguangc rui kating tangc pwkhou tii guang puni.

¹⁶Kamei hei theih makmeipu e, meic guang tuanc ngam makmei riw khou bammeipu e; kata meic gaanv khat na sini how kan mak ge khatni how ngam mak ge. Chakhwang champouhmei khatni pumtan tingsaengzaeng kakhang sw diu! Amen

¹⁷Mi mbaanv tuang lungcgaymei nunc ta daihriw sw mak khang sa o. Kadyng maekmei lunggai khou tei hamhna, gaat tuang maekna ramh katana sakbi sakba makna tiiloumei Racguangc khou ngangvlou khang sa o.

¹⁸Kaniw gaytaanv khou lungcgay khang, lungning daicna khatni baanh daicna tii pat khang sa o.

¹⁹Mi kumna kaniw khang lanv lou kaduaina thei thangc khang ntipmei phayding kasiamh lana kalingmei ringcpaan tei kaniw laa ngam khang e.

²⁰Timothi, nang khou nsinlou kanmei tei swmaan mak khang singaek chuy o. Kiuc hamhmei “Thaymei” twmei tuang, Ravguangc tuang hamhmei agi agamei khou tei nang thu lay kazauh riu.

²¹Kalam thu meic gaanvsaekc kaniw khou mi “Thaymei” tei nai the twna sana lwmmei khou rui tat pat kan the. Zauzian nangniw khou naimei sw di tho.