Read Rongmei Naga 2 TIMOTHI 1 Bible Online

2 TIMOTHI 1 - Rongmei Naga bible

2 TIMOTHI 1

¹Ravguangc rui ningmei thei layna Khrista Jisu tuang latdiutatmei swmei, Khrista Jisu khou naimei aniu khang nrianhloumei ringhmei tei dinc ndauh khang ndiuloumei Paul rui—

²Anac mpouh Timothi khang hymei: Pu Ravguangc khatni aniu Poubauhmei Khrista Jisu rui zauzian, nzianloumei khatni chuzaenghmei nang khou tiilou diu!

³Ai zingbangc kalaanv huayneypui ganv kathuic nang khang ningtowna, alungning khou lwmsi tuang maekna apu apouc nunc kumcna ai kasiamruai sw bammeipu Ravguangc ta ai thuancku bam e.

⁴Nang mikdui tei ai ningtowna, nang ta how dat pwkhou neihla dat punimei khang tei rui ai nang ta how dat niina bam e.

⁵Nang peic Loidi khou khatni nang pui Eunika khou naimei kalingmei lwmmei nang khou naimei tei ai ningtow e. Hei tei nang khou nai e twmei ai lwm e.

⁶Hei zaeng rui, abaanc sungclou khou tei nang khou tiilou kanmei Ravguangc tuang kaipat tei tichuangc bam khang ai nang ta tiningtowpui tuang e.

⁷Kalam thu Ravguangc rui aniu khou tiiloumei Bumaengc hei zammei Bumaengc hamh e; pumtan, nzianmei khatni meic pumc ta sinriapmei Bumaengc de.

⁸Hei zaeng rui, aniu Poubauhmei lam khou sa khang zak riu; Khrista khang kang bammei alam khou zak riu. Mi phaanv tei Gaychamv khang rui phungc nimei nang tuang ryanramei dam tei Ravguangc tuang pumtan paan rui phungc o.

⁹Kamei rui aniu ta, aniu taanv paan rui hamhna, kamei rui ningmei thei layna kazauzian paan rui kanlou the khatni katuang mei khang kawlou the. Mi zauzian hei mbaanv damh mak khou rui Khrista Jisu khou kamei rui aniu khang tiilou the.

¹⁰Tiki aniu ta kanloumeipu Khrista Jisu guang khou rui mi zauzian hei aniu khou ndauhlou the. Kamei rui theihmei ta swmaanlou the, kumna gaychamv paan rui theic dat makmei panty tiilou the.

¹¹Mi gaychamv hei dinc ndauh khang khatni nchamlou khang ata ndiulou the.

¹²Hei zaeng rui ai mi kumna ryanra khaengv bam tuang e. Ai lungh geic dat mak khe, kalam thu ai lwm bammeipu ta ai thay e. Kamei rui akhou nsinloumei[1] hei kapumtan rui mi Tingmik tei nganvna gaeklou puni twmei ai thay e.

¹³Nang ta zaylou khang ai rui nang khou dinclou kanmei nchumhmei lat tei ntipna sin o. Khrista Jisu khou bammei aniu khang tiiloumei lwmmei khatni nzianmei khou tei bam o.

¹⁴Nang khou nsinlou kanmei lanv tei, aniu khou bammei Bumaengh Nthanmei paan rui gaek chuyna sin bam o.

¹⁵Asia khou bammei guay, Phugelo lev Hermogene kazauhna ata mpatlou the twmei nang thay e.

¹⁶Onesiphora kai kaikhunc khou Poubauhmei rui suaihiamlou pw diu. Kalam thu kamei rui katupc sihna achaengc tiringclou e; ata kang bangclou bammei khou hei kamei zak mak ge.

¹⁷Kamei Rom khou guang rappui lev ata phuna adaeng khou guang e.

¹⁸Poubauhmei rui mi Tingmik nungc kiu kata zauc nzianlou pu di tho! Ephisia khou kamei rui akhang taanclou kanmei guay tei nang thay ranvna bammei tei the.