Read Rongmei Naga 2 TIMOTHI 3 Bible Online

2 TIMOTHI 3 - Rongmei Naga bible

2 TIMOTHI 3

¹Nkhamhpui ganv khou kungc sihpui tuang ganv guang puni twmei thay o.

²Meic guay lwnlung tei mi kum puni: kakhang khang na ningmei, syanlanv agaamvmei, gaenghswmei, daihriw swmei, meickai ta swzakmei, pui pu lat liammei, thuancku thay makmei, ravning makmei,

³meic nzian thay makmei, kuaklou thay makmei, meickai ta sw kasic khang swmei, sw kasic karoucmei, meic nzimei, gaymei ta karaengmei,

⁴lwmnuh makmei, sinriap nuh makmei, kanga kaliangmei, Ravguangc ta suangc meic pumc rui kahawmei ta laa niimei,

⁵mpaeng khou thu ravningmei khe sw lana, mi tuang pumtan ta tei thu nuh makmei. Mi kumhmei nunc khou tei rui mpaanna bam o.

⁶Kaniw gaanvsaekc kai kai khou tiapgutna, paapc puatrith phungc bammei khatni meic pumc tuang kahawmei zaat guay rui phungc pat phungc gut tat bammei, ncham bam sini nchumhmei ta thay zat makmei suanmei ntumei nunc ta kaniw sinsw e.

⁸Janni lev Jambri rui Mousi ta nuh mak kanmei kumcna, kaniw lungning nkhuai kanmei khatni lwm makmei kaniw hei rui nchumhmei ta nuh mak ge.

⁹Kaniw asaanh tatlou ni tu hamh e. Kaniw rampang tei meic guayna rui thay pat puni de. Janni lev Jambri tei ni mi kum kan tuang e.

¹⁰Nang thu atuang latdyn, akheiliak, atuang tamhmei, aram lum, aram khaengthay, aram zian, aram khaengtan thay kan the.

¹¹Ata raikasicmei khatni ai ryanramei ariw kanmei— Antiokh khou, Ikonium khou khatni Lustra khou taraina makmei ramrianra ai ariw kanmei tei nang thay e. Tiki mi guay khou tei rui Poubauhmei rui ata kanlou the.

¹²Khrista Jisu khou ravningmei panty khou lungc niimei guay ta thu rairiu puni tina di the.

¹³Meicgay makmei nunc khatni gaypui khe swmei nunc tei thu meickai ta khatni kaniw rana kaniw ta guatna si hay hay tat kan ni tuang di the.

¹⁴Tiki nang thu, nang khou dinclou kanmei khatni nang ntipna lwm kanmei nchumhmei tei sin ntip bam o. Nang ta thow thow rui nchamlou tu cho twmei nang thay e,

¹⁵khatni Khrista Jisu khou lwmmei paan rui ringhbamv khou zaylou nimei ningting nang khou tiiloumei Nthanmei Latrik tei nang alauc khou rui thay the twmei nang thay e.

¹⁶Nthanmei Latrik kapwm hei Ravguangc khou rui guang tuang e, kumna mi hei nchamlou khang, luhlou khang, sw ntwnlou khang, khatni ravchap tat khang nchamlou khang gaeng e.[2]

¹⁷Mi kumna, mi hei rui Ravguangc siamruaimei ta kathouc taanh khang biuhpui mei khatni gaymei taanv kathuic taanc ngampui mei tiswlou e.