Read Rongmei Naga 2 TIMOTHI 4 Bible Online

2 TIMOTHI 4 - Rongmei Naga bible

2 TIMOTHI 4

¹Ravguangc khatni theihmei ta ni ringhmei ta ni latzan sw nimei Khrista Jisu hu khou mi hei sa tuang e. Khrista Jisu guangh swna guang puni. Hei zaeng rui ai nang ta katiupui tuang e:

²kakwm kaganv maekna gaychamv hei dinc o; kabah tithaylouna, luhlouna, katiulouna, khaengvthayna, taek makna nchamlou o.

³Meic nunc tei nchumhmei riakdyn tei nking nii makna, kaniw rui kahaw hawmei tei dinhmei nunc ta kaw lana, chu nii nthakna nking tat kanmei ganv guang puni.

⁴Kaniw nchumhmei lat ta nking makna, damc duanhpui pary khou lungh gut tat kan puni.

⁵Tiki nang thu kaganv kathuic nang lung ding ntip bo; ryanramei khaengv o; gaychamv dinc bam o; kumna Ravguangc bangc akhat swmei tuang nang thouc guay tei taanc o.

⁶Akhang thu, ata khaenglou nipui ganv tangc the; mi panty hei mpatlou nipui ganv tangc the.

⁷Ai pak nimei lauluangc hei ai ngammei kasang karamcna pak suaklou kan the. Atuang latryan ngaeklou kan the.[3]

⁸Ntaw thu, Poubauhmei nchumhmei Latzanpouc rui mi latzan Tingmik nungc kiu tii nimei ravchaptatmei tuang swan pyrun akhang chamdaanvlou bam the. Hei tei akhang na hamh e; kamei guangmei ta rigwnna nkhwan bammei guay khang tii puni.

⁹Ngampui kamv katumcna adaeng khou guang khang karamc o.

¹⁰Dema thu mi mbaanv ta nzianna ata ganclouna Thessalonika kaidai thangc tat kan the. Kresken rui Galati thangc khatni Tita rui Dalmatia thangc tat kan the.

¹¹Adaeng khou bammei Luk na di the. Nang Mark ta nduangh guang o, kamei ataanv nkhavlou khang kage nai e.

¹²Tukhika ta ai rui Ephisia thangc ndiulou kan the.

¹³Nang guang pwkhou, Troa khou Karpa daeng khou lou duc kanmei pheychuanh tei phungc guang nzut ro. Latrik guay tei, nthukna ramhgic tuang tei ni phungc guang o.

¹⁴Kuanri maanv Alekzandar rui ata sw kasic sihna swlou the. Poubauhmei rui kataanv thei layna khangclou dat pungh the.

¹⁵Nang ni kakhou rui ramhthay o. Kamei aniu tuang latdyn ta khat sini nuh makpui mei e.

¹⁶Ai latzan bamv khou ding rey khou tei, meic gaanv khat na sini ata ding nduanghlou mak ge. Kaniw guayna ata mpatlouna tat ngam kan de. Hei tei Ravguangc rui kaniw ruc khou chaklou makmei sw kan diu!

¹⁷Tiki Poubauhmei rui ata ding nduanghlou de, kumna kamei rui akhou pumtan tiilouna, chamv tei dinclou tina Zentelmei guay ni chu kan the; khatni ata kamangliangpui mwang khou rui kanlou the.

¹⁸Ata sw kasic nimei guay khou rui Poubauhmei rui kanlou puni de, kumna tingkauh Guangcdic khou gayna nduangh guang tangclou puni de. Hymdaihmei hei kakhang tingsaeng sw diu! Amen

¹⁹Priskilla lev Akuila khatni Onesiphora kai kaikhunc khang dwan gay kady e.

²⁰Erasta Korin khou bam kan the, kumna Trophima ta nnauna Milita khou ganclou duc kan the.

²¹Nang tingsei pat mak khou guang khang karamc o. Eubula, Puden, Lina, Klaudia khatni chana guay rui nang khang dwan gay kady e.

²²Poubauhmei rui nang ta nduanghlou diu! Nang khou zauzian naimei sw diu!