Read Rongmei Naga TITA 2 Bible Online

TITA 2 - Rongmei Naga bible

TITA 2

¹Tiki nang thu, riakdyn kalingmei tei dinc nina e.

²Gaanvthaih guay tei mba nlau mak khang, kachangc siph sip thay khang, kapumc sinriap thay khang; lwmmei khou, nzianmei khou khatni kadyng ntipmei khou kalingmei phaydyng ding ngam khang nchamlou o.

³Hei tei kumcna ntumei gaanvdaih guay tei ni, ravningmei pui akhat tuang ziapmei kheiliak khou lungh khang nchamlou o. Kaniw tei meickai ta nsuc nrauc tanhmei khatni zouh mbana lunghmei hamhna, gaymei lat nchamlouna lungc nina e.

⁴Kumna puiliauh nunc ta tei kaniw gaanv gaanv khatni kaniw nac nunc ta nzian thay khang,

⁵pumh sianriap khang, kheiliak nthanna lungh khang, kaikhunh phungc thay khang, zauzian thay khang khatni kaniw gaanv gaanv bangc khou bam thay khang kaniw rui nchamlou kan diu. Kum pwkhou Ravguangc lat ta meic nunc rui sakasic mak khang e.

⁶Hei tei kumcna, chabwan guay ta tei ni kaniw pumc sinriap thay khang nchamlou o.

⁷Nang rui kalam kathuicna khou gaymei kheiliak lungc lyanlou o. Lungning nthanna khatni kachangc siph sipna nchamlou o.

⁸Meic rui khiat dat ngam lakmei kalingmei lat tei sa o, kumna aniu ta zauczihmei nunc tei ramh sa kasicloumei bam maekna zak kan diu.

⁹Bangh guay tei ni kaniw tuang kaipouc guay bangc khou bam chuyna kalam kathuicna khou kaniw ta tipianna lungh khang, kaniw kaipouc nunc mwang daw mak khang,

¹⁰kaniw baanc saengh makna, kaniw tuang gaymei khatni lwmnuhmei tei lungc lyanna, kaniw rui taanhmei guay khou aniu ta Guloumeipu Ravguangc tuang latdyn tei tichingkhiuhlou khang nchamlou o.

¹¹Kalam thu maansei guayna kanloumei laa kan khang, Ravguangc rui kazauzian ndauhlou the.

¹²Aniu tuang daihmei Racguangc khatni Kanloumeipu Jisu Khrista[1] tuang hymdaihmei ndauhlou nimei suaihiam Tingmik ta rigwnna bammei dak khou, ravchap tat makmei lwnlung khatni mbaanv tuang kahawmei guay gancna, meic pumc sinriapna, nchumhna, khatni ravningmei panty khou mi mbaanv khou lungh khang, mi zauzian tei rui aniu ta nchamlou the.

¹⁴Aniu ta nkhuai mbamei kapwmna khou rui kanlou khang, aniu paap guay khou rui aniu ta sw nthanlouna, katuang mei nunc tiswlou khang khatni gaymei taanv khang lungh gutna bammei nunc tiswlou khang kamei rui aniu khang kapanty tiipatlou the.

¹⁵Mi guay hei dinclou o; ngamv sinna katiulou o khatni luhlou o. Meic gaanv khat na rui sini nang ta mala mak khang sw o.