Read Rongmei Naga PHILEMON 1 Bible Online

PHILEMON 1 - Rongmei Naga bible

PHILEMON 1

¹Khrista Jisu khang rui kang bammei Paul khatni aniu chana Timothi rui — Aniw nzianmei taanv taanc nchamcmei Philemon,

²aniu tanpui Alphia, aniu rihmei sw nchamcmei Arkhippa, khatni nang kai khou kariu bammei phwamling khang hymei:

³Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiilou diu o.

⁴Ai huayneymei kathuic nang ta ningtowna, ai aRacguangc ta thuancku bam e.

⁵Kalam thu nang rui Ravguangc mei guay ta nzianmei ramzian khatni Poubauhmei Jisu khou lwmmei ramlum tei ai chu the.

⁶Khrista khou lwmmei khou nang ni aniw lev kadam laa nchamcmei paan rui Khrista khou bammei aniu khang naimei suaihiam guay tei thay diangh khang ai huayney bam e.

⁷Achanale, nang ramzian tei rui ata mpeyna tineihlalou e khatni katiu thaulou e. Nang rui Ravguangc mei guay ta chaengh tiringclou e.

⁸Hei zaeng rui, nang rui sw nimei tei mi kumcna sw o twna Khrista khou nang chana akhat swna latdanv tii nuh de;

⁹tiki ai nang ta nzianpui zaeng rui, gaanvthaih khatni ntaw Khrista Jisu khang kangkai khou bammei Paul ai rui nang khou zaenghuay e.

¹⁰Kangkai khou rui anac swmei Onesima lam khou ai nang khou zaenghuay e.

¹¹Kahunungc nang khang gaeng makmei mei sw bam khwanmei kamei hei ntaw thu nang khang ni akhang ni gaengmei mei di the.

¹²Alungthw swmei kata ai rui nang khou ndiu guang dat tuang the.

¹³Ai gaychamv khang kang bam bam khou hei, kamei rui nang phaan asiamruai sw bam khang ai kata adaeng khou tibam nii e;

¹⁴tiki ai nang chwn thay makna hei tei sw nii mak ge. Nang rui taanclou niina taancloumei hamhna, nang chwn hamhmei khou titaanc nii mak ge.

¹⁵Kamei nang daeng khou tingsaeng bam dat khang rui, kamei nang khou rui matak khat tat pat tu khuangh the.

¹⁶Ntaw thu kamei bangh na hamh the; bangh khang suangc mbuna, akhang ni, nang khang ni, pumh khou ni, Khrista khou ni nzianmei chana di the.

¹⁷Nang rui ata nang lev akhat namei e twna ning e thei, ata laalou tu kumcna kata laalou o.

¹⁸Kamei rui nang khou nkhuailou tuang nai e thei, hamh e thei tabui pw ni kamei rui laalou tuang nai e thei, hei tei akhou chaklou tho.

¹⁹Mi hei ai rui abaanc kahak rui hy tuang e: Paul, ai rui khangclou puni. Nang kahak hei akhou pow phunghmei e twmei hei sa nii makna sa tuang e.

²⁰Hei zaeng rui, achanale, Poubauhmei khou nang mi hei akhang taanclou o— ata tineihlalou o.

²¹Ai rui samei nang piulou puni twmei lwmna, ai rui samei suangc sini mbuna taanclou puni twmei thayna ai mi hei hy tuang e.

²²Akhang bangvbamv chamdaanvlou o; nang rui huayneymei Ravguangc rui dawlouna, ai nangniw daeng khou guang dat khang lwmgayna bam e.

²³Khrista Jisu khang rui ai lev kangkai khou bam nchamcmei Epaphra rui nangniw khang dwan gay kady e.

²⁴Ai lev taanv sw nchamcmei Mark, Aristarkha, Dema, khatni Luk rui ni dwan gay kady e.

²⁵Poubauhmei Jisu Khrista tuang zauzian nangniw khou nai diu!