Read Rongmei Naga IBRIMEI 10 Bible Online

IBRIMEI 10 - Rongmei Naga bible

IBRIMEI 10

¹Jihudimei tuang Riakdanv hei guang punimei kalingmei tuang maengc tei e; kalingmei thu hamh e. Hei zaeng rui kanganv maekna tingkwm pum khaeng kaluaih kaluaih bammei tei rui Ravguangc daeng khou guangmei nunc ta tei ti-nthuihlou ngam mak ge.

²Ravguangc ta kalum bammei nunc ta tei khaenglou guaimei rui sw nthanlou khwan e thei, kaniw khou paapc nai e twmei kaniw ning dat bam lak ni tuang e, kumna khaeng kaluaih dat dat bam lak ni tuang e.

³Tiki tingkwm pum khaeng bammei hei rui kaniw paap nai bam e twmei tining tow bam e.

⁴Kalam thu guaituamchic khatni lauziu zei rui paapc laa ganclou ngam mak ge.

⁵Hei zaeng rui Khrista kamei mbaanv khou guang ni khou, kamei rui sa e: “Puatkat katmei khatni khaengmei ta nang kahaw mak ge, tiki nang rui akhang meic pumc tiilou the.

⁶Kiruai kapumc pwm nteina khaengmei khatni paapc khang khaeng bammei guay tei rui nang ta tipian ngam mak ge.

⁷Kum thena ai rui sa the, ‘Zauclo, Riakdanv zy khou alam khou hylou bammei tei kumcna, nang ningmei taanclou khang ai guang the.’ ”

⁸Mi guay hei Riakdanv thei layna kat bam tuang khwan sini, “Khaengmei khatni katmei, mai nteina katmei khatni paapc khang katmei, mi guay hei nang kahaw mak ge, khatni hei tei rui nang ta tipian ngam mak ge,” twna reymei khou tei sa kan the.

⁹Kumna, “Zauclo, nang ningmei taanclou khang ai guang the,” twna kamei rui sa the. Kumna kamei rui karaanmei khaengmei riak guay tei ganc lana Khrista ta khaengloumei rui mi guay phaan tei lynlou the.

¹⁰Ravguangc rui ningmei tei Jisu Khrista rui taanclouna, luan guayna kapumc kahak paapc khang khaengloumei tei rui aniu ta paapc khou rui sw nthanlou the.

¹¹Amuh guay tei kaniw thouc taancna, dingna tingmik pum kazaat akhat na kaluaih phikna, paapc kuaklou ngam lakmei ramkhaeng tei khaeng bam e.

¹²Tiki Khrista thu tingsaeng khang khaenglou guai tang lana Ravguangc tuang baanzat thangc dungckey kan the.

¹³Kumna katuang zauczihmei ta kaphaypav bangc khou tiniibinlou mak saanv kamei mi khou tei nkhwan bam e.

¹⁴Kalam thu sw nthanlou kanmei nunc ta tei, khaenglou guaimei tei rui tingsaeng khang sw nthuihlou the.

¹⁵Bumaengh Nthanmei rui ni aniu khou sa e:

¹⁶“Thei thangc ai rui kaniw khou swlou nimei latdyng kiu mi hei e, twna Poubauhmei rui mi kumna sa e: Ai rui atuang latdanv guay kaniw lung khou lou puni, khatni kaniw lungning khou hylou puni.”

¹⁷“Kaniw paap guay khatni kaniw tuang simei taanv guay ai ningtow dat lak khe.” twna kamei rui sa e.

¹⁸Kumna mi guay hei kuaklou kan thena, paapc kuaklou khang khaeng dat bam khang kage maek khe.

¹⁹Hei zaeng rui, chanathiu, aniu Nthan Liangmei Bamv khou gut khang Jisu zei paan rui khamv namv tuang nai dat mak khe.

²⁰Kamei rui aniu khang chaeng thanh, ringhpui chaeng laanclou the—kapumc kahak rui khamthinghphey tei laanclou the.

²¹Ravguangc kai khou aniu khang taanvsw bammei amuh daihmei nai the.

²²Hei zaeng rui, paapc nai e twna khoukhaekna bammei lungning tei kazinh nthanlouna khatni aniu pumc nthanmei dui rui low nthan lana, lungning nthanna khatni lwm tiph tipna aniu Ravguangc daeng khou guang di kho.

²³Aniu pat pat gut gut tuang sw makna, aniw rigwnmei tei ntipna sin di kho. Kalam thu latryan swloumeipu hei kalat suaimeipu hamh e.

²⁴Nzian thay khang khatni gaytaanv taanc thay khang khat khat ta akumhna katiu thau kho cho twmei kakhanh kho.

²⁵Meic gaanvsaekc kaniw chav sw bammei tei kumcna, aniu guang kariumei khou ntaamv ri kho. Poubauhmei tuang Tingmik ana guang the twmei nangniw howpui thei layna aniu khat khat ta katiu thau mbu hay hay bam di kho.

²⁶Kalam thu nchumhmei tei thay tang lana aniu thayna thayna paapc taanc bam e thei, aniu paap khaeng kuak dat khang ramh baihmei maek khe.

²⁷Mi kumhmei nunc tei thu guang nimei latzan khatni Ravguangc ta nuh makmei nunc ta swmaan nimei mai ta tei pingna nkhwan bam khang na di the.

²⁸Mousi tuang Riakdanv twan lyampui mei ta tei thu, gaanv nei gaanv thumh mwang khou rui hei tei kiuc di the twmei nthan e thei, zauzian nai dat makna swluai tu di the.

²⁹Kum e thei, Ravguangc Nac Mpouh ta ni binpui mei, kata sw nthanloumei latryan tuang zei ta ramh sak makna swpui mei, zauzian tuang Bumaengc ta swzakpui mei ta tei thu akumh puni tha? Karuc khou keylou nimei dandi tei adih nthuk puni cho kakhanh zauc o.

³⁰“Ai rui khwm khangc puni, ai rui lauguat khangc puni,” twna khatni, “Poubauhmei rui kamei nunc ta latzan sw puni,” twna samei hei thow cho twmei aniu thay e.

³¹Ringhmei Racguangc baanc khou keyloumei hei meic pingpui tuang e.

³²Nangniw tuang tat kanmei ganv tei makumh zauc o. Nangniw ta tigaancloumei tangv tei nangniw ryanramei mpeyna ariw khwan sini ding ngamna ding khwan e.

³³Kaluan luan nangniw ta charuangc khou sakasicna swzaklou khwan e khatni sw kasicna swlou khwan e. Nangniw kaluan luan mi kumna swloumei nunc tei lev khaengv nchamc khwan e.

³⁴Nangniw kangkai khou bammei nunc lev ryanramei dam laa nchamc khwan e, khatni nangniw tuang guay asut ngam kan tisini, maan dat lakmei gay ranvmei nangniw khang nai de twmei thayna nangniw neihlana khaengvlou khwan e.

³⁵Hei zaeng rui, nangniw lwmmei tei ganc dat ri tho; mi khang tei swan daicna nai the.

³⁶Ravguangc rui ningmei taanh khang khatni kamei rui nrianhloumei tei laa khang nangniw khaengvthay khang kage nai e.

³⁷Nthanmei latrik rui sa e: “Guang nimeipu tei asaanh mak khou guang puni; kamei nyan ni tu hamh e.

³⁸Atuang ravchaptatmei nunc tei lwmmei paan rui ringc puni, tiki thei hanc kanpui mei ta tei ai karuc khou pianlou ni tu hamh e.”

³⁹Tiki aniu thu thei hancna maan kanmei nunc tei hamh e; lwmna ringhmei nunc tei de.