Read Rongmei Naga IBRIMEI 11 Bible Online

IBRIMEI 11 - Rongmei Naga bible

IBRIMEI 11

¹Aniu rui rigwn bammei tei suai mak khe twna laamei, aniu mik rui how makmei puat ta tei nai e twna laamei hei lwmmei kiu the.

²Reynungc mei guay tei kaniw ramlum khou rui Ravguangc rui kaniw ta kwmlou kan tuang e.

³Mi mbaanv hei Ravguangc lat rui damclou tuang e; aniu how bammei hei how makmei khou rui damclou tuang e twmei lwmmei paan rui aniu thay e.

⁴Lwmmei paan rui Abel tei Kain tuang khang suangc gaymei puatkat Ravguangc khang kat khwan e. Kumna Ravguangc rui kata ravchaptatmeipu e twna laaloumei hei karam lum paan rui kamei laatow tuang e. Kalam thu Ravguangc rui katuang puatkat tei laalou the. Kamei theic kan sini katuang lwmmei taanv tei rui kamei aniu khou sa bam e.

⁵Lwmmei paan rui Enok ta tei laa thau kan the. Kamei theic kan mak khe. Kata ariw dat mak khe; kalam thu Ravguangc rui laathau kan the. Kata laathau makmei hu khou kamei rui Ravguangc ta tipianlou the twna nthanmei latrik rui sa e.

⁶Lwmmei maekna thu Ravguangc ta tipian ngam mak ge. Ravguangc daeng khou guang nimei guay, Ravguangc nai e khatni kakhou guangmei guay khang tiilou e twmei lwm nina e.

⁷Guang punimei kamut kamaimei khou rui chamdaanv khang Ravguangc rui sapui ganv khou, Nouha tei kamik rui how mak sini, lwmmei paan rui hidai kasiamhna kakai kaikhunc ta gulou kan e. Mi kumna mbaanv ruc khou nkhuaimei latzan keylou kan the. Kumna lwmpui paan rui tiiloumei ravchaptatmei tei kakhang laa kan the.

⁸Kakhang tii nimei kandic thangc tei tat khang Ravguangc rui kaw pwkhou, lwmpui paan rui Abraham hei tei piuna tabui thangc tat nina cho twmei thay makna kamei tat pat khwan e.

⁹Kakhang tii puni twna nrianhloumei kandic khou tei lwmpui paan rui kamei gin swna, mi kandic tei laa nimei Isak khatni Jakob lev pheykai khou lungc bam khwan e.

¹⁰Abraham tei Ravguangc rui kamaengc rangcna kasiamhloumei kaidai, kachac dat lakmei kaidai ta nkhwan bam khwan e.

¹¹Abraham tei lwmpui paan rui pu akhat sw khwan e. Sara tei katingkwm kagat ri khou lwmpui paan rui kapumc nrit khwan e. Ravguangc thu kalatryan suai ni tu hamh e twmei kamei lwm khwan e.

¹²Kumna kapumc theic tangmei kumhmei Abraham khou rui kakikta gaanchuangcna zu khatni kasing thay makmei duipui syniang zu cha pat khwan e.

¹³Kaniw hei Ravguangc rui nrianhloumei tei laatow kan mak ge. Tiki duh thangc rui kaniw hei tei phaengc howna riulouna, kaniw mi kandic khou thu gin swna bam tuang de twna salouna lwmna theic kan the.

¹⁴Mi kumna saloumei nunc hei rui kaniw lungc nimei kandic ta nzwan tat bam e twmei nthanna lyan e.

¹⁵Kaniw tat patmei kandic ta tei kaniw tuang e twna ning bam khwan e thei, hanc dat khang kadouchamei ariw kan ni tuang de.

¹⁶Tiki kaniw gay ranvmei kandic, tingkauh kandic ta kahaw the. Mi zaeng rui Ravguangc rui kata kaniw tuang Racguangc e twna kaw khang zak mak khe. Kumna kaniw khang kaidai akhat chamdaanvlou the.

¹⁷Abraham tei Ravguangc rui kata nchanv pwkhou, kakhou swloumei latryan tei nai sini, lwmmei paan rui kanac mpouh akhat namei Isak ta khaeng the.

¹⁸“Isak khou rui nang kikta cha pat puni,” twna nrianhlou khwan sini, kamei Isak ta khaeng khang nuh the.

¹⁹Ravguangc thu theihmei ta tiringcthaulou dat ngam de twmei Abraham lwm khwan e, kumna Isak ta theihmei khou rui laatow dat changh kan the.

²⁰Lwmmei paan rui, Isak rui Jakob khatni Isau khou thei thangc guang nimei khang suaihiamlou khwan e.

²¹Jakob kamei theic zaic ni khou, lwmpui paan rui Josep nac mpouh nei khou suaihiamlou khwan e, kumna katuang builwang nsunna Ravguangc ta kalum khwan e.

²²Josep kamei theic zaic ni khou, lwmpui paan rui Isaraelmei nunc Izip khou rui tat pat nimei lam khou sana, kaniw karou phungc tat khang kadylou khwan e.

²³Mousi ta puanclou pwkhou, lwmpui paan rui kapui kapu rui guangh tuang latdanv ta ping makna, kalwn kachav gaymei angana ta tei bw thumh nkamhlou khwan e.

²⁴Mousi kamei daicthau pwkhou, lwmpui paan rui kamei guangh nac aluhpui nac mpouh sw nii mak khe.

²⁵Matak khat na paapc khou amanvmei suangc, Ravguangc mei nunc lev ryanra nchamcmei tei kamei kahaw khwan e.

²⁶Messia khang rui zakmei khaengvloumei hei Izip tuang lanv guay suangc nthukmei e twmei kamei laa e. Kalam thu thei thangc naimei swan ta kamei zauc khwan e.

²⁷Mousi lwmpui paan rui guangh lungpuam ta ping makna, Izip mpatlouna tat pat the. How makmei Racguangc ta how kumcna kamei hanc dat mak khe.

²⁸Lwmpui paan rui Kaanpatpui Ngai tei lingc thau the, kumna mpouh nareimei ta swluaimei baanchara tei rui Isaraelmei ta kahi mak khang zei kazinhlou khang latdanv pat the.

²⁹Lwmpui paan rui Isaraelmei Ntou Duipui khou ramkiang khou kumc kaan pat khwan e. Kaniw thei lay nzwan gutmei Izipmei nunc thu dui rui liakbinna theic ngam khwan e.

³⁰Jeriko kaidai raengc tei Isaraelmei rui zaeng chanei tat haengvlou pwkhou pangv kanmei tei lwmpui paan rui e.

³¹Ravguangc lat liammei guay ta swluaimei khou, mangcsangmeiluc Rehab duak kanmei tei lwmmei paan rui e. Kalam thu kamei rui Isaraelmei gwanrummei nunc ta laalou khwan e.

³²Lwmmei lam khou sa bam kho twna cho? Gideon, Barak, Semsan, Jeptha, David, Samuel, khatni muhzwng nunc mpeyna nai e. Tiki kaniw lam khou sa bam khang kaganv maek khe.

³³Lwmpui paan rui kaniw rihngamna guanghdic laa khwan e, nchumhna dihsin khwan e, Ravguangc rui nrianhloumei laatow khwan e. Kaniw kamangliangpui mwang kakaplou khwan e,

³⁴maipui maidai swmit khwan e, baengsaeng mun khou rui duak khwan e. Suan bam khwanmei khou rui tancthau lana baengtanc rihlianghmei sw khwan e, kumna Zentelmei ricmei nunc ta alay ganclou khwan e.

³⁵Ntumei nunc kaniw lwmmei paan rui kaniw kai kaikhuncmei ta tiringclou dat kanmei nai e. Gaanvsaekc rui gay ranmei panty khou ringcthau dat khang, nyngswmei suangc rairiu khaengvna theic kan the.

³⁶Gaanvsaekc rui sinnuimei, bairaimei, kangriang rui bangcloumei, khatni kangkai khou bangcloumei khaengv kan the.

³⁷Kaniw ta ntauh kwamluai kan the, kapaek saat kan the, kaniw ta baengsaeng rui swluai kan the. Kaniw ta rai kasic karouclou tina, lungcsi lungcrouna, lauziu gic khatni ziuh gic runna ruan tat bam khwan e.

³⁸Mi mbaanv hei kaniw khang biuh mak ge! Kaniw kai lau maekna tazikramv khou khatni chyngramv khou ruanna khowlang khatni khunhkai khou lungc tat bam khwan e.

³⁹Kaniw mi kumhmei chaklou nuhmei taanv taancloumei hei lwmpui paan rui e. Kum khwan sini, Ravguangc rui nrianhloumei tei thu kaniw laatow kan mak ge.

⁴⁰Kalam thu Ravguangc rui aniu khang gay ranvmei chamdaanvlou bam e. Mi kiu aniu kazauhna ti-nthuihlou khang rui e.