Read Rongmei Naga IBRIMEI 12 Bible Online

IBRIMEI 12 - Rongmei Naga bible

IBRIMEI 12

¹Kumna heizumei sakhi pang muangh kumcna aniu daeng bam haengv bam khou hei, aniu ta swkhamv swnamv nimei guay khatni aniu khou khuap ntipna bammei paap guay ganc pat lana, aniu pak nimei lauluangc hei pak tangh khang lungkuat tancna pak di kho.

²Kahu khou naimei neihlamei ta tei zaucna, zakmei ta ping makna kros khou ryanra khaengvlouna, Ravguangc guangcbamvpaeng tuang baanzat thangc dungckey kanmeipu, kabangbi khou rui katwan nganv aniu lwmmei ngangvloupui bamv Jisu ta zaucna pak di kho.

³Nangniw lung nnau keyna mpat mak khang, paapcmei nunc rui heidi zauczihna sw kanmei ta kamei khaengv kanmei tei kakhanh o.

⁴Nangniw thu paapc ric adow khou theicloumei nganv khaengv kanmei tuang thu maek he.

⁵Ravguangc rui nangniw ta kanac nunc ta kumcna katiuloumei lat saloumei tei nangniw amuc dat the nah cho? Mi kumna sa e: “Anac mpouhle, Poubauhmei rui nang ta riapmei ta ramhsak mak tuang sw rio, khatni nang ta luh pwkhou lungh tangkhyn rio.

⁶Kalam thu Poubauhmei rui kamei nzianmei nunc ta riaplou e, khatni kanac swna laaloumei nunc ta bai luhlou e.”

⁷Nangniw ryanramei ariwmei tei bai luhlou tuang e twna khaengv o. Hei tei Ravguangc rui nangniw ta kanac nunc swna sw bam tuang e. Kapu rui bai luhlou makmei nac thow naina cho?

⁸Nah guay ta thu bai luhlou tuang de. Tiki nangniw ta bai luhloumei maek ge thei, nangniw kapu maekmei nkhahnanac nunc tina the.

⁹Kandih lwnlung khou sini, aniu pu nunc rui aniu ta bai luhlou e kumna aniu kaniw ta chakhwang sw e. Kum e thei bumaengh tuang pw ta thu aniu hei tei suangc mbuna kakut gutna ringc nina hamh nah cho?

¹⁰Aniu pu rui gay khang e twna aniw ta matak khat bai luhlou e; tiki Ravguangc rui thu kamei nthanmei kumcna nthan khang aniu khang gay khang bai luhlou e.

¹¹Baih luhloumei khou tei matak khat thu neihla mak khe, suc the; tiki laaloumei nunc khang thu mi thai tei ravchaptatmei khatni chuzaenghmei e.

¹²Hei zaeng rui, zay zuat bammei baanc tei zay thau tho, khatni kadunh bammei khubut tei titancthau tho.

¹³Suanmei phay tei titheih makna tigaylou khang, ntyngmei chaeng khou tat gut tho.

¹⁴Meic guayna chuzaenghna lungc bam khang khatni nthanmei panty khou lungh khang karamc o. Kalam thu mi kumcna lungh mak ge thei, gaanv khat na sini Poubauhmei ta how ngam mak ge.

¹⁵Ravguangc zauzian laatow mak pu ramc e twna kadan thay o. Nangniw khou nkhucmei maan zangc patna meic nunc ta sw katuakc mak khang khatni sw mphuam mak khang kadan thay o.

¹⁶Nangniw lungcmaanv lungcmowna khatni ravchaptat makna, Esau rui napkuak akhat na khang katuang nareimei dam zuanc tu kanmei tei kumh mak khang ramhthay o.

¹⁷Nangniw thay e, katangv thangc kamei kapu tuang suaihiam tei laa nii dat bam sini tii dat kan mak khe. Kamei mikdui keyna phu bam sini lungh laic dat nuhpui chaeng nai kan mak khe.

¹⁸Ntaw nangniw guangmei hei maibwang chuangc bammei, zingh zingmei, puanzingh kanut bammei kahitowmei chyngbut khou tei hamh e.

¹⁹Mi khou tei bianggun khwan khatni kauc patmei khwan tei chu pwkhou kaniw khou lat salou dat mak khang zaenghuay khwan e.

²⁰“Mi chyngbut tei kahimei khouringh ta nganvna ntauh kwamluai nina e,” twna samei latdanv tei kaniw khaengv ngam mak khwan e.

²¹Hei tei heidikamv meic pingmei lwn khwan e, twmei thu Mousi nganvna “Ai pingna kadunh the,” twna sa e.

²²Tiki nangniw guangmei hei thu ringhmei Racguangc kaidai, tingkauh Jerusalem, kasing kading thay makmei kauh baanchara guay bampui bamv Zaion Chyng khou e;

²³kaniw zanc tingkauh khou hyloumei Ravguangc nac nareimei nunc neihlana kaduai bampui phwam khou guang tuang e. Meic katana ta latzan sw nimei Racguangc khou, khatni ti-nthuihloumei ravchaptatmei guay bumaengc khou guang tuang e.

²⁴Abel zei suangc sini mbuna daic ranvmei lat samei zei rui kazinhlouna latdyng thanh swloumeipu Jisu khou guang tuang e.

²⁵Hei zaeng rui nangniw khou sa bammeipu lat tei nuh zih la rio. Kandih khou samei lat tei sini liammei guay ta tei nsa mpatlou mak ge thei, tingkauh thangc rui samei lat tei thu liamna akumhna duak ngam nina cho?

²⁶Mi ganv khou tei kakhwan rui kandih ta kanuk kan the; tiki “Kandih ta na hamhna tingkauh ta ni kanuk dat puni,” twna kamei rui samei hei rui kalung makmei puat guay tei nai bam duh khang, damcloumei puat guay hei kanuk ganc puni twmei tuang e.

²⁸Hei zaeng rui, kalung dat lakmei guangcdic aniu laatowmei khang hei rui thuancku bam kho, khatni ping kadanna kamei rui laalou nuhmei ramkalum Ravguangc ta thuanckuna kalum bam kho.

²⁹Kalam thu aniu Racguangc hei thu raw kamut kamaipui mai de.