Read Rongmei Naga IBRIMEI 2 Bible Online

IBRIMEI 2 - Rongmei Naga bible

IBRIMEI 2

¹Hei zaeng rui, aniu ta nzuan maanlou pw ramc e twna, aniu chu kanmei nchumhmei lat tei sin ntip ranv bam nina the.

²Kauh baanchara guay rui phungc guangmei lat tei kalingmei e, kumna hei tei twan lyammei, hamh e thei piu makpui mei ruc khou tei kakhuay thei layna dandi keylou e thei,

³aniu heidi daihmei kanloumei chaeng ti hei ntaamv lana akumhna duak ngam nina cho? Mi kanloumei chamv hei reymei khou Poubauhmei rui kauc ndauhlou the, kumna hei tei kakhou rui chumei guay rui nchumhmei the twmei nchinlou the.

⁴Ravguangc rui ni charynmei sw-nchinmei taanv kazaat mpeyna lyanlouna, khatni kamei rui ningmei thei layna Bumaengh Nthanmei tuang kaipat nzanhlouna kaniw lat hei nchumhmei e twmei lyanlou the.

⁵Aniu rui sa bammei guang nimei kandih kathanc tuang kaipouc sw khang Ravguangc rui kauh baanchara nunc ta lou mak ge.

⁶Nthanmei latrik khou mi kumna hylou e: “He Ravguangc, nang rui ningtow bammei maansei hei; kakhang nang rui kadanlou bammei maansei hei akumhpui mei cho?

⁷Nang rui kata matak khat khang kauh baanchara guay suangc ti-analou the; nang rui kakhou hymdaihmei khatni chakhwang pyrun runlou the,[3]

⁸kumna ramh guayna ruc khou kata kaipouc tiswlou the.” Ravguangc rui maansei ta “ramh guayna tuang kaipouc tiswlou the,” twna samei khou hei kabangc khou lou makmei ramh khatna sini maek khe. Tiki maansei rui ramh guayna ruc khou kaipouc sw bammei ta aniu ntaw how mak he.

⁹Tiki Ravguangc zauzian paan rui, kamei meic kathuicna khang theiclou khang, matak khat kauh baanchara guay suangc ana keyloumeipu, kamei theicloumei paan rui hymdaihmei khatni chakhwang kakhou tiiloumeipu Jisu ta aniu how the.

¹⁰Nah mpouh mpeyna ta hymdaihmei khou phungc guanglou khang ringhbamv kaipouc Jisu kamei ryanra khaengvpui paan rui kadwanh ti-nthuihloumei hei ramh katana damcloumei khatni tinailou bammei Racguangc tuang nchumhmei taanv e.

¹¹Sw-nthanloumeipu kamei khatni kamei rui sw nthanloumei nunc hei pu akhatna nac nunc di the. Hei zaeng rui kamei rui kaniw ta chana kaw khang zak dat mak khe.

¹²Hei zaeng rui, “Ai rui nang zanc achana nunc khou kauc ndauh puni; kaniw guang kariupui bamv khou, ai nang ta thuanc puni,” twna kamei rui Ravguangc khou sa e.

¹³Kamei rui, “Ai Ravguangc khou ngangvlou ni,” twna ni sa e. Kumna, “Ravguangc rui akhou tiiloumei nac nunc, ai lev mi khou hei bam e,” twna ni kamei rui sa e.

¹⁴Kamei rui alauc nunc twna sa bammei nunc hei zei lev zanh rui swmei maansei nunc e. Jisu kamei kahak mi nunc hei kumhmei swna maansei lwnlung lay laa the. Mi hei kamei theicloupui paan rui, theihmei pumtan naimei ravsic ta swmaanlouna,

¹⁵panty saanvsaengh, theih khang pingmei rui bangh kumcna bammei nunc ta kanpatlou khang e.

¹⁶Kalam thu kamei rui nkhavloumei hei kauh baanchara nunc ta hamh e; tiki nthanmei latrik rui, “Kamei Abraham kikta guay ta nkhavlou e,” twmei hei kachangcpui lat re.

¹⁷Mi kiu thu, kamei Ravguangc siamruai taanv khou lwmnuhmei khatni zauzianthaymei Tingkuc swna meic nunc paap guay sw nthanlou khang, kalam kathuicna khou kamei kachana guay lev nchamc nipui thouc tina e.

¹⁸Mi kumna kamei ni nthiammei khatni ryanramei ariw la thena, nthiammei akhangv bammei nunc ta kamei nkhavlou ngam e.