Read Rongmei Naga IBRIMEI 7 Bible Online

IBRIMEI 7 - Rongmei Naga bible

IBRIMEI 7

¹Mi Melkhizedek hei Salemmei guangc khatni Kauh Liangmei Racguangc tuang amuc e. Abraham guangh padeih ta rihngamlouna guang dat pwkhou, Melkhizedek rui kata riuna suaihiamlou khwan e.

²Khoutei Abraham rui kamei phungc guangmei guayna tuang kadam ruh tuang akhat kakhang tii khwan e. (Kazanc kabac thu reymei khou “Ravchaptatmei Guangc” tw tuang e, kaneimei kabac rui kamei Salemmei guangc twmei thu “Chuzaenghmei Guangc” tw tuang e.)

³Melkhizedek hei, kapui kapu, kapu kapouc riang, khatni kamei puanhmei, theihmei lam khou hyloumei tuang maekmeipu, Ravguangc Nac Mpouh kumcna tingsaeng amuh sw bammeipu e.

⁴Zauclo, kamei adih daic kan tu cho! Aniu pu pouc Abraham rui kamei rui rih khou rui laa guangmei tuang kadam ruh tuang akhat kakhang tii khwan e.

⁵Kumna Levi kikta amuc nunc ta tei, kaniw Isarael makaamv, Abraham kikta nunc khou rui kadam ruh tuang akhat laa o twna Kariak Latdanv khou kaniw khang latdanv tii khwan e.

⁶Melkhizedek hei Levi kikta hamh e, tiki Ravguangc rui kalatryan tiiloumeipu Abraham khou rui kadam ruh tuang akhat tei laa khwan e, kumna kata suaihiamlou khwan e.

⁷Suaihiamloumei hei thu daihmei rui nthyammei khang suaihiamlou tuang de twmei hei mathiuc rui nuhpui lat re.

⁸Ntaw ruh dam laa bammei Levimei nunc hei thu theic kan nimei nunc de, tiki Abraham khou laamei tei thu nthanmei latrik rui samei kumcna ringc bammeipu e.

⁹Abraham rui kadam ruh tuang tii khou tei, kadam ruh tuang laamei Levi hei ni lay kazauh muay the.

¹⁰Kalam thu mi ganv khou tei kamei Abraham pumc khou nai bam the twna sa nuh the.

¹¹Levimei nunc tuang taanv hei rui nthuih the tw e thei, Aron khou rui hamhmei, amuhlang baihmei Melkhizedek amuclang khou rui amuh kazaat baihmei guang dat khang kage maek kan ni tuang the. Levimei rui amuh sw bammei bangc khou Isaraelmei khang Kariak Latdanv hei tiilou tuang e.

¹²Kumna amuhlang kalaihmei thei layna Riakdanv ni kalaih khang kage nai e.

¹³Ntaw aniu sa bammei amuc hei kaikhwang baihmei de, kumna kakai kaikhwangmei gaanv khat na sini amuh sw zat kan mak ge.

¹⁴Aniu Poubauhmei hei Juda kaikhwang khou puanclou e, kumna Mousi rui amuh lam khou sapui ganv khou mi kaikhwang ti hei sa kahitow mak ge.

¹⁵Aniu rui sa bammei hei nthan thiakna how the— Melkhizedek kumhmei amuc baihmei gaanv khat guang the.

¹⁶Kamei amuh swmei hei kamei maansei swmei tuang kaikhwang suicna kariak thei layna sw tuang hamh e; tiki nganvmei nai dat makna ringhmei pumtan paan rui e.

¹⁷Kalam thu, “Melkhizedek tuang amuclang khou, nang hei tingsaeng amuh sw puni,” twna nthanmei latrik rui sa e.

¹⁸Kalam thu karaanmei latdanv tei pumtan maekpui zaeng rui gaeng mak khena loukey the.

¹⁹Kalam thu Mousi tuang Riakdanv rui nthuihmei tiguanglou ngam mak khe. Ntaw thu aniu Ravguangc daeng guang tuanc nuh khang gay ranvmei rigwnmei tiilou the.

²⁰Mi ruc khou rui, Ravguangc latryan ni mi khou hei nai the. Baihmei guay ta amuhbamv suangloumei hei latryan swlouna suanglou tuang hamh e.

²¹Tiki Jisu ta amuhbamv suangloumei thu latryan kazauhna suanglou tuang de. Mi kumna sa e, “‘Nang tingsaeng amuh sw puni,’ twna Poubauhmei rui latryan sw kan the, kamei mi hei kalaic dat lak khe.”

²²Hei zaeng rui Jisu hei gay ranvmei latdyng tuang swngpouc sw the.

²³Mi amuclang kanei khou hei, reymei khou tei amuh mpeyna nai e, kalam thu theihmei rui kaniw ta amuh tisw suang ngam mak ge.

²⁴Tiki Jisu hei thu theic dat mak khe; tingsaeng amuc di the.

²⁵Hei zaeng rui ntaw ni niauc ni kapaan rui Ravguangc khou guangmei kamv ta kamei rui gulou ngam e. Kalam thu kamei hei kaniw khang huaychalou khang theic dat makna ringc bam e.

²⁶Kalam thu aniu khang mi kumhmei nthuihmei tingkuc nai the. Kamei hei nthanmei e, kakhuay maekmei e, paapcmei pang khou rui kalang patna tingkauh khou tidaicloumeipu e.

²⁷Kamei hei tingkuh baihmei nunc lev nchamc mak ge; tingmik pum kapaap khang khaeng rey lana meic nunc paap khang khaeng bammei tei kumcna sw khang kage maek ge. Kamei kapumc kahak ta meic nunc paap khang tingsaeng khang luan guaina khaenglou kan the.

²⁸Riakdanv rui nthuih makmei maansei ta tingkuh suanglou e; tiki Riakdanv tangv guangmei syangdyng swloumei latryan rui tingsaeng khang ti-nthuihloumei Nac Mpouh ta suanglou e.