Read Rongmei Naga IBRIMEI 8 Bible Online

IBRIMEI 8 - Rongmei Naga bible

IBRIMEI 8

¹Ntaw aniu rui sa bammei kiu thu, tingkauh khou Ravguangc tuang tik hym daihmei guangcbamvpaeng tuang baanzat khou dungc bammei tingkuc aniu khang nai the twmei hei e.

²Maansei rui hamhna Poubauhmei rui katinghloumei kalingmei kalummei pheykai khou naimei Nthan Liangmei Bamv khou kamei Tingkuh sw bam e.

³Tingkuh kathuic ti hei puatkat kat khang khatni Ravguangc khang khaeng khang suanglou tuang e. Hei zaeng rui aniu tuang Tingkuc hei ni khaengna kat khang kage nai e.

⁴Kamei kandih khou bam khwan e thei, kamei amuh sw ni tu hamh e. Kalam thu Riakdanv thei layna taanc bammei amuc nunc nai de.

⁵Kaniw sw bammei hei tingkauh thangc tuang maengc e. Kalam thu Mousi kamei Pheykai katinghthau ni khou tei, “Nang khou chyngbut khou lyanlou kanmei kahak tei kumcna taanc o,” twna salou khwan e.

⁶Tiki ntaw thu, kaniw tuang khang suangc gay ranvmei amuh taanv Jisu khou tiilou the. Kamei rui Ravguangc lev kamei nunc kak khou swloumei latdyng hei ni gay ranvmei e. Kalam thu mi khou hei gay ranvmei laatow nimei tuang latryan nai the.

⁷Reymei latdyng tei nthuih khwan e thei, kaneimei latdyng kage nai dat lak ni tuang e.

⁸Ravguangc rui kaniw tuang khuay kalauh patna sa e: “Isaraelmei nunc khatni Judamei nunc lev ai latdyng thanh sw dat puni twna Poubauhmei rui sa e.

⁹Hei tei ai rui kaniw baanc zayna Izip khou rui nduangh pat khou, kaniw pupouc nunc khou swlou kanmei tei lev nchamc ni tu hamh e. Ai rui kaniw khou swlou kanmei latdyng tei kaniw ngaek mak khe; mi zaeng rui ai kaniw ta ganclou the.

¹⁰Ai rui Isaraelmei nunc khou swlou nimei latdyng kiu mi hei e twna Poubauhmei rui mi kumna sa e: Ai rui atuang riakdanv guay kaniw lungning khou lou puni khatni kaniw lungthw khou hylou puni. Ai rui kaniw Racguangc sw puni, khatni kaniw amei nunc sw puni.

¹¹Kaniw makaamv khat khat ta ncham dat ni tu hamh the, khatni ‘Poubauhmei ta thay o,’ twna ni sa dat ni tu hamh the. Kalam thu kaniw meic nthyammei khou rui saengc daihmei nganv, meic guayna ata thay puni.

¹²Ai rui kaniw paap guay kuaklou puni kumna kaniw khuay ningtow dat lak khe.”

¹³Mi kumna latdyng thanh lam khou samei hei rui kamei rui reymei latdyng ta tei karaan tiswlou the. Karaan tei thu maan kan ni the.