Read Rongmei Naga IBRIMEI 9 Bible Online

IBRIMEI 9 - Rongmei Naga bible

IBRIMEI 9

¹Reymei latdyng khou tei kalum nipui thiak riak khatni mbaanv tuang ravkai nai e.

²Mi kiu thu kalummei pheykai akhat katinghlou khwan e. Mi khou tei reymei kailangv khou thauhmai tiangc khatni Ravguangc khang katloumei tyan khatni kapaeng nai e. Hei tei nthanmei bamv twna kaw e.

³Kaneimei khamthinghphey thei khou tei Nthan Liangmei bamv twna kawmei kailangv nai e.

⁴Mi lungc khou tei agaw nteimei tuang kachaekc ravchabamv khatni kachaekc rui duamloumei Latdyng Khuk nai e. Mi khuk lungc khou tei manna loumei kachaekc laibung, kazik kasatcmei Aron builwang khatni latdanv guay hyloumei tuang taucpaek kanei tei lou e.

⁵Mi khuk ruc khou tei kaswkaeng naimei hymdaihmei tuang kherubim kanei nai e, kumna kaney swkaeng rui zauzian bamv khou tei sungclou bam e. Ntaw mi lam khou hei katuk kalik sa bam ngam mak khe.

⁶Mi kumcna kasiamhloumei khou tei, amuh guay tei tingmik pum tatna kapaengcmei Pheykai khou tei thouh sw e.

⁷Tiki kalungcmei Pheykai khou tei thu tingkuh na, tingkwm khou gut guay na gut re. Hei tei kakhang khatni thay makna taancloumei meic nunc tuang khuay guay kuaklou khang khaengloumei zei tei sin makna gut mak ge.

⁸Mi kumna kapaengcmei Pheykai tei nai bam saanv thu, Nthan Liangmei Bamv khou gut khang chaeng laanclou mak he twmei Bumaengh Nthanmei rui dinc e.

⁹Mi hei ntaw ganv khang taanc lyanlou tuang e. Mi hei rui puatkat khatni kiruai khaengmei rui kalummei nunc tuang lungsyng tei thu sw nthan ngam mak ge twmei lyan tuang e.

¹⁰Kalam thu hei tei tu zangvmei tuang khatni baih baihmei kapaengc tuang khiu nthanmei riak khang na sw bam tuang de. Mi hei nthuihmei riak thanh tii guang makmei dak khou khang na tiilou tuang de.

¹¹Tiki ntaw guang tangclou bammei[8] gay nthuihmei tuang tingkuc swna Khrista guang the. Kumna baanh rui kasiamh makmei, mi kandic tuang hamhmei daic ranv, nthuih ranvmei pheikai khou kamei gut kan the.

¹²Khrista kamei Nthan Liangmei Bamv khou liang guai na gut khou, ziuh khatni guaih zei hamhna, kazei kahak sin gutna aniu khang tingsaeng ringcbamv laalou the.

¹³Ziuh khatni guaichic zei khatni guaihnay nteina khaengmei mbut kazinhloumei rui mphuammei nunc ta sw nthanlou e thei,

¹⁴Khrista tuang zei rui thu adihkamv mbuna sw nthanlou puni tha! tingsaeng Bumaengc paan rui kata nthuihmei ravcha swna Ravguangc khou khaenglou kan the. Theihmei kachap kariak twan lyammei tuang aniu lungning khou phungc bammei chabangc tei kazei rui sw nthanlou puni, kumna aniu ringhmei Racguangc tuang siamruai sw nuh khang e.

¹⁵Hei zaeng rui, Ravguangc rui kawloumei guay nrianhloumei tingsaeng suaihiam laa kan diu khang Khrista rui latdyng thanh swlou the. Reymei latdyng bangc khou taanclou kanmei khuay guay khou rui thuak patlou khang kamei theiclou the.

¹⁶Thowkumhmei rui katuang lanv nsinlou khang hyloumei latdyng tei,

¹⁷mi pu tei theih mak saanv mi latdyng tei nsa di he, kamei theic pwkhou na rui hei tei kabah naimei latdyng sw ni tuang de.

¹⁸Hei zaeng rui reymei latdyng tei ni zei keyna swlou tuang de.

¹⁹Mousi rui Riakdanv tuang latdanv guay tei meic nunc khou kauc pat reyliang khou, kamei rui guaituamchic khatni ziuh zei laana mi khou tei dui louna, hisop thingchiang khou mphaeng louna, mi zei tei khou tei ntinna Riakdanv zy khatni meic guay khou tei kazinhlouna,

²⁰“Mi hei nangniw khang Ravguangc rui tiimei latdyng tuang zei the,” twna sa khwan e.

²¹Hei tei kumcna mi zei tei Pheykai khatni kalummei khou sinswmei puat guay khou tei ni kazinhlou the.

²²Kumna Riakdanv thei layna ramh guayna zei rui sw nthan e. Zei key makna paapc kuaklou mak ge.

²³Tingkauh thangc tuang maengc swmei puat guay ta mi kumna sw nthan nipui thouc nai e. Tiki tingkauh thangc tuang khang thu mi khang suangc gay nthuih ranvmei khaengmei zei kage nai e.

²⁴Kalam thu Khrista gut kanmei Nthan Liangmei Bamv tei thu kamaengc tuang, baanh rui kasiamhmei kai khou hei hamh e. Kamei ntaw aniu khang Ravguangc hu khou gut bam bammei bamv hei thu kalingmei tingkauc kahak khou de.

²⁵Jihudimei tingkuc thu kiruai zei sin lana Nthan Liangmei Bamv khou tei tingkwm pum gut re; tiki Khrista thu mi khou tei gutna kata khaeng dat dat bam khang kage maek ge.

²⁶Kum mak khwan e thei, mbaanv damclou rap khou rui thauna kamei katupcna ryanra khaengv bam ni tuang e. Tiki kapumc kahak khaenglouna paapc kuaklou khang, luan guaina swna, ntaw zuk twan zuk ruai guang pwkhou, kamei guang the.

²⁷Maansei hei theic guai puni, kumna mi tangv kata latzan sw puni twmei hei nai bam tuang the.

²⁸Hei tei kumcna Khrista ni meic mpeyna paap laa ganclou khang luan guaina khaenglou the. Kamei guang dat puni. Hei tei paapc khang taanv swlou dat khang hamh the; kamei guangmei ta nkhwan bammei nunc ta gulou khang e.