Read Rongmei Naga JAKOB 1 Bible Online

JAKOB 1 - Rongmei Naga bible

JAKOB 1

¹Ravguangc khatni Poubauhmei Jisu Khrista bangc Jakob ai rui, ginramdic thangc lungc phak tat kanmei kaikhwang ruhna kanei khou hymei: dwan gay kady e.

²Achanathiu, nchanvmei kazaat kazaat nangniw khou guang pwkhou sangaymei e twna neihla o.

³Kalam thu mi kumcna nangniw ramlum ta nchanvmei hei rui nangniw ta sw ntiplou e twmei nangniw thay e.

⁴Nangniw tuang khaengvthaymei tei kachanh dat makna khaengv suak go; kumna ramh gaat tuang maekna nthuihmei sw khang sw o.

⁵Tiki nangniw thowkumhmei khou ningting maek ge thei, neihlana tiilou punimeipu Ravguangc khou ney o; nzav tuang maekna tii puni.

⁶Kamei lwmsi tuang maekna, lwmna ney nina e. Lwmsipui mei tei thu duipui khou mpwan rui phungc pat phungc gut tat bammei dui luat tei kumh tuang de.

⁷Mi kumhpui mei, kachwn pat pat gut gut bampui mei, kalung kadyng ding makpui mei tei thu Poubauhmei khou rui ramhkhat sini laatow ni tu hamh e.

⁹Lungcsimei Khristian chana tei kata Ravguangc rui zay kauh thauloumei khou tei neihla bam kan diu,

¹⁰khatni lungcgaymei Khristian chana tei Ravguangc rui kata ti-nthyam keyloumei khou tei kamei neihla bam kan diu. Kalam thu lungcgaymei tei puc pwang kumcna tuai nuangc kan ni de.

¹¹Neih thiu tei mai kumc chaengc pat pwkhou, pucbwan guay tei ngguaih key kan the; kapwang guay tuai kan the; kumna karamgai maan kan the. Hei tei kumcna, lungcgaymeipu tei ni lanv ntaanvna ntaanvna tuai kan ni de.

¹²Nchanvmei khou ding ngampui mei tei sangaymei e. Kalam thu Ravguangc rui kata nzianmei guay khang nrianhloumei swanpyrun—ringcsuangmei tei kamei laa puni.

¹³Nchanvna nthiammei guang pwkhou, “Mi nthiammei hei Ravguangc rui e,” twna sa lak nina e. Kalam thu Ravguangc ta thu simei taanh khang nthiam ngam mak ge; kamei rui ni meic gaanv khat na ta sini simei taanh khang nthiam mak ge.

¹⁴Tiki meic gaanv khat ta nthiammei hei kalung khou naimei kahawmei tei rui nthiam pat tuang e.

¹⁵Mi kumna kahawmei tei ngguam lana paapc puanc the, paapc tei daic thauna theihmei puanc the.

¹⁶Nzianmei chanathiu, nangniw ta tiguat rio.

¹⁷Gaymei khatni nthuihmei kaipat guay hei tingkauh thangc rui, bw neih, gaanchuangcna damcloumeipu, kalaic bammei sung rui tizingc dat makmeipu Ravguangc rui tii keymei kaipat re.

¹⁸Kamei rui aniu ta katuang nchumhmei lat tei rui, kamei rui ningmei thei layna puanclou the. Mi hei kamei rui damcloumei katana ruc khou aniu hei nthai rey liangmei thai sw khang e.

¹⁹Nzianmei chanathiu, mi hei ningtow o! Meic kathuicna chumei khou katumc o; tiki samei khou khatni lungh puamhmei khou nzaeng o.

²⁰Kalam thu lungh puamhmei rui nchumhmei, Ravguangc rui ningmei taanc ngam mak ge.

²¹Hei zaeng rui, mphuammei lwnlung khatni simei kheiliak guay ganc o, kumna nangniw lung khou lingclou kanmei, nangniw ta kanlou nimei lat tei niamh keyna laalou o.

²²Nangniw rana nangniw ta guatna lat tei chu nana taanh makmei sw rio. Mi guay tei piuna taanc o.

²³Lat tei chu lana taanh makpui mei tei thu maengzau khou kazaw zauclouna taanmei tei kumh tuang de.

²⁴Kamei kazaw zauclou lana tat pat dat kan e thei, kalwn akumh cho twmei kamei amuc dat the.

²⁵Tiki thow pwni, meic nunc ta tinyngswloumei nthuihmei Ravguangc lat hei chakuth tancna kathai lana, hei tei thaylouna taanmei na hamhna, mi khou tei kalung gutlouna piu bampui mei ta tei kataanv guay khou tei Ravguangc rui suaihiamlou puni.

²⁶Thowkumhmei rui kamei ravchaptatmei e twna ning laki kabaley sinriap ngam mak ge thei, katuang ravchap ramtat tei nsa de; karana kata guat bam tuang de.

²⁷Pu Ravguangc khang nthanmei khatni kalingmei ravchaptatmei kiu thu: nruna nunc khatni swmmay nunc ta kaniw ryanra zaucloumei khatni mi mbaanv rui kata sw mphuam makmei hei e.