Read Rongmei Naga JAKOB 3 Bible Online

JAKOB 3 - Rongmei Naga bible

JAKOB 3

¹Achanathiu, nangniw meicgeihna dinhpouc sw nangh e. Kalam thu nchamloumei aniu ta sw nimei latzan hei nthuk diangc puni twmei aniu thay e.

²Aniu meic guayna kalam mpeyna khou nkhuai de. Tiki thow pw ni latsav khou nkhuai makpui mei tei thu nthuihpui mei di the khatni kapumc sinriap ngampui mei di the.

³Aniu rui takuanh ta sinsw nuh khang kamwang khou mwangkhap louna, aniu rui kata titat nii niimei biak thangc titat re.

⁴Rungh ta tei ni kakhanh zauc o. heidi daihmei rungc tei heidi tanhmei mpwan rui thui tat bam sini, maithah launa rui kaguatcna rungh thoumeipu kamei rui titat nii niimei biak titat ngam e.

⁵Baley ni hei tei kumh tuang e. Mi hei meic pumc khou kalaunamei nanw bam khwan sini latdai sa e. Mai kiak na rui ramvpuk kau ngam tuang e twmei ning zauc o!

⁶Baley hei ni mai e. Baley hei aniu pumc khou ravchaptat makmei mbaanv e. Mi rui aniu pumc kapwm ta sw mphuam e. Maikwam mai mi baley khou hei towlouna mi hei rui aniu ringcpaan kapwm tikau e.

⁷Maansei rui khouringh zaat guayna— nwmbangc khouringc, nruayna, nrui khatni dui khouringc kaguayna ta sw nngiu ngam de.

⁸Tiki meic gaanv khat na sini baley ta thu sw nngiu ngam mak ge. Mi hei rei reina bam thay makmei simei akhat re. Kakhou meic theic nuhmei khay rui padik ge.

⁹Mi hei rui aniu Pu Poubauhmei ta thuancku e khatni mi hei rui Ravguangc ta luicna damcloumei maansei ta siang e.

¹⁰Mwang akhat na khou rui thuanhpui lat ni, syang ni pat re. Achanathiu, aniu mi kumc nina hamh e.

¹¹Duipuakkai akhat na khou rui dui ndeihmei ni, nkhucmei ni puak pat di nah cho?

¹²Achanathiu, tadut bang rui Olive thai nthai di nah cho? Drakha luai rui tadut thai nthai di nah cho? Ntey dui puak patmei duipuakckai khou tei rui zangv gaymei dui puak pat mak ge.

¹³Nangniw pang khou ningtyng ntakmei nai bu cho? Hei tei katuang gaymei panty rui, ningtyngna niamhna taanhmei taanv rui lyan o.

¹⁴Tiki nangniw lung khou nkhucna howtimei khatni kakhang khang na ningmei lungning nai e thei, nangniw tuang ningting khang tei gaengh swna nchumhmei ruc khou paapc taanc nangh e.

¹⁵Mi kumhmei ningting tei thu tingkauh thangc rui key tuang hamh e; mbaanv tuang de, ravchaptat makmei tuang de, ravsic tuang de.

¹⁶Kalam thu mamavmei khatni kakhang khang na ningmei tei rui agay agimei khatni simei tipat re.

¹⁷Tiki tingkauh thangc rui keymei ningting thai thu reymei khou nthanmei, chuzaenghmei, lungh zaenghmei, katun khou na tat makmei, nzianthaymei, gaytaanv taanhmei, meickai ta ning kasic makmei khatni gaylwn sw makmei e.

¹⁸Chuzaengh khang karamhmei guay rui chuzaengh khang nrouloumei thai ravchaptatmei nthai e.