Read Rongmei Naga JAKOB 5 Bible Online

JAKOB 5 - Rongmei Naga bible

JAKOB 5

¹Lungcgaymei nunc, nangniw nking o! Nangniw ruc khou keylou punimei ryanra ryanriumei khang tei rui kangiuhna kap la tho.

²Nangniw tuang lanv guay raam ngam the khatni nangniw tuang pheybaan nthumc tu ngam the.

³Nangniw tuang daandi kachaekc sauc ngam the. Kumna mi sauhmei raamv tei rui nangniw khuay ndauh puni, kumna hei tei rui nangniw ta mai kumcna tu puni. Mi nkhamhmei ganv khou hei nangniw lanv peic mpunglou bam the.

⁴Nangniw lau tay phihmei nunc tuang phy tii makna lou bammei lanv tei rui nangniw khuay kauc ndauh bam e, khatni nangniw lau taymei nunc rui kauhmei khwan tei Ngamparimei Poubauhmei nukuanc chu tangc the.

⁵Nangniw mbaanv khou mathac malacna, ramh ningtow makna lungc the. Nangniw rana nangniw ta dowluai nimei khouringc gy kumc bam the.

⁶Nangniw rui nkhuai makmei nunc ta kakhuay nkhamlouna swluai the; kaniw nangniw ta akhangv mak ge.

⁷Hei zaeng rui, achanathiu, Poubauhmei guang mak saanv khaengv thayna bam o. Zauclo, lautaanhmei nunc rui kathai laa khang khaengvthayna tingseimun khatni lauphwnswan ting ta nkhwan bam e.

⁸Nangniw ni khaengvthay nina e. Ding ntip bam o; Poubauhmei guang nimei tingmik ana the.

⁹Chanathiu, nangniw ta latzan sw mak khang, nangniw chana punav khat khat ta khanc lanc bam rio. Zauclo, latzanpouc chaengmun khou ding bam the.

¹⁰Chanathiu, Poubauhmei tuang muczwng nunc ta tei ningtow o. Ryanra khaengvmei khou kaniw kumcna khaengvthay o.

¹¹Aniu rui kaniw ta sangaymei nunc twna kaw e; kalam thu kaniw khaengvthaymei nunc e. Job rui khaengv kanmei tei nangniw chu kan the, khatni nkhamh khou Poubauhmei rui kakhang tiilou dat kanmei tei nangniw thay the. Poubauhmei thu nzianthaymei khatni zauzianthaymeipu e.

¹²Achanathiu, nangniw tingkauh ta pw ni, kandih ta pw ni, baih baihmei ta pw ni zay saancna syangdyng sw rio. Nangniw Ravguangc latzan khou keylou mak khang, kum ni thei “kum ni” khatni kum lak ge thei “kum lak ge” twna sana taan o.

¹³Nangniw pang khou thowkumhmei ryanra bammei nai tu cho? Kamei huayney kan diu. Thowkumhmei neihla bammei nai tu cho? Kamei Ravguangc ta thuancna suan kan diu.

¹⁴Nangniw pang khou thowkumhmei nnau bammei nai tu cho? Poubauhmei zanc khou kakhou thauh teylouna kakhang huayneylou khang phwamling tuang gaanthaic guay ta kaw kan diu.

¹⁵Lwmna huayneymei tei rui kata tigaylou puni; kumna Poubauhmei rui kapumc tigaylou dat puni khatni kamei nkhuaimei taanclou tuang nai e thei kuaklou puni.

¹⁶Nangniw ta suc numei khou rui tigaylou khang, nangniw tuang khuay khat khat khou kalauhna khat khat khang huayney kary o. Ravchaptatmeipu tuang ravsuai rui taanvdaih taanc ngam e.

¹⁷Elija hei ni aniu kumhmei maansei de; tiki kamei rui ting riu mak khang lungh gutna huayney pwkhou, tingkwm kathumh bw charuk ting riu keylou mak khwan e.

¹⁸Kamei rui huayneylou dat pwkhou tingpuk rui ting tikey dat the, kumna kandih khou phunling nthai dat the.

¹⁹Achanathiu, nangniw thowkumhmei chaeng maanvna nchumhmei khou rui ducna tat kanmei ta phungc guanglou dat re thei,

²⁰thow pw ni paapcmei ta katuang nchumh makmei chaeng khou rui phungc guanglou datmei kamei tei rui paapcmei bumaengc[3] ta tei theihmei khou rui kanlou puni khatni kapaap heizumei tei kuaklou puni twmei kamei thay kan diu.