Read Rongmei Naga 1 PITAR 1 Bible Online

1 PITAR 1 - Rongmei Naga bible

1 PITAR 1

¹Jisu Khrista tuang latdiutatmei Pitar rui—Ponta, Kappadokia, Asia, khatni Bithunia kandic khou ginswna lungc bammei Ravguangc rui kapahloumei mei nunc,

²Jisu Khrista lat piu khang khatni kazei rui sw nthanlou khang Pu Ravguangc tuang raeng thei layna kapahlouna Bumaengh rui nthanmei mei tiswloumei nunc khou hymei: Zauzian khatni chuzaenghmei nangniw khou padikna tiilou mbu hay hay bam kan diu.

³Aniu Poubauhmei Jisu Khrista Racguangc khatni Pu ta aniu thuanc kho! Kalam thu kamei rui aniu ta heidikamv nzianna, Jisu Khrista ta tiringcthaulou datmei paan tei rui, maan dat lakmei rigwn khou aniu ta puanclou the.

⁴Kum thena Ravguangc rui tingkauh thangc nangniw khang lou bammei maan dat lakmei, kasic dat lakmei khatni kamv key dat lakmei ringhmei tei nangniw laa puni the.

⁵Hei tei nkhamhmei tingmik nungc ndauh pat punimei kanloumei tei tangh mak saanv lwmpui paan rui Ravguangc pumtan rui gaeklou bammei nangniw khang the.

⁶Nchanvmei kazaat azuh ariwna matak khat khang nangniw ryanra bam pwsini, mi khang hei rui nangniw neihla bam o.

⁷Mi nchanvmei hei thu nangniw ramlum tei kalyng bammei tuang e. Maan kan nimei kachaekc ta sini kalingmei pat khang mai ntei e. Hei tei kumcna kachaekc khang suangc kunghmei nangniw ramlum tei kalingmei sw khang kalyng ni tina di the. Mi hei Jisu Khrista ta ndauh patpui nungc kiu thuanckuloumei, hymdaihmei khatni champouhmei nangniw laatow khang e.

⁸Nangniw kata how mak he, tiki nangniw kata nzian the, khatni ntaw nangniw kata how mak sini nangniw kakhou lwm the, kumna sa pat khang thay makmei hymdaihmei ramneila nangniw neihla bam e.

⁹Kalam thu nangniw kakhou lwmmei thai nangniw bumaengc ta kanloumei nangniw laatow the.

¹⁰Nangniw khang tiilou nimei kaipat lam hei dinc kasuakcloumei muczwng nunc mi kanloumei lam hei phu mincna kathai khwan e.

¹¹Khrista ryanra khaengv nimei khatni hymdaic nimei lam khou kaniw lungc khou bammei Khrista Bumaengc rui dinc kasuakclou pwkhou, mi kiu thow puni cho khatni tabui ganv khou pat puni cho[1] twmei kaniw kathai khwan e.

¹²Tingkauh thangc rui ndiu keymei Bumaengh Nthanmei paan rui, gaychamv dinhmei nunc rui ntaw nangniw khou dincloumei chamv hei, kaniw dinc kasuakc bammei tei kaniw khang hamh e, nangniw khang e twmei Ravguangc rui kaniw khou ndauhlou khwan e. Tingkauh baanchara nunc thay niimei kiu ni mi hei the.

¹³Hei zaeng rui nangniw lungning sianlangv langv o; ntak nrak bam o; Jisu Khrista guangpui nungc kiu nangniw khang tiilou nimei suaihiam khang tei rigwn bam o.

¹⁴Nangniw latpiumei nac nunc sw o; ramhthay makna bammei douc tei kumcna meic pumc rui kahawmei rui nangniw kheiliak kasiamh dat ri tho.

¹⁵Nangniw ta kawloumeipu hei thu nthanmeipu e. Hei zaeng rui nangniw kheiliak guay hei ni nthan nina e.

¹⁶“Nangniw nthan nina e, kalam thu ai hei nthanmei e,” twna hylouna nai e.

¹⁷Zawkhu zawru zauh makna, meic guayna ta kataanv kataanv thei layna latzan swmeipu ta nangniw rui “Apu” twna kaw e thei, nangniw mi mbaanv khou ginswna lungc bammei panty khou hei kata pingna lungc o.

¹⁸Nangniw ta, nangniw pupouc nunc khou rui laamei tuang gaeng makmei panty lwnlung khou rui thuakpatloumei hei maan kan nimei daandi kachaekc rui hamh e twmei nangniw thay e.

¹⁹Mi hei khanvbamv maekmei, hiaksuimei lauziunac kumhmei Jisu Khrista tuang kunghmei zei rui e.

²⁰Mbaanv damh mak khou rui kata kadahlou tang the; tiki nangniw khang rui mi nkhamhmei ganv khou hei ndauh patpui tuang e.

²¹Kata tiringcthaulouna kahym tidaicloumeipu Racguangc khou nangniw kapaan rui lwm the. Kum thena nangniw lwmmei khatni rigwnmei Ravguangc khou nai the.

²²Ntaw thu nchumhmei lat tei piupui paan rui nangniw ta sw nthanlou the. Kumna nangniw chana punav khat khat ta nzian changhna lungc nipui tuang di the. Kum thena, nangniw lungsyng khou rui[2] khat khat ta nzianna lungc o.

²³Kalam thu ringhmei khatni maan dat lakmei Ravguangc lat paan rui, nangniw ta theic dat makna ringc bammeipu nac nunc swna puanclou the.

²⁴Kalam thu, “Maansei hei thu pucbwan kumh tuang de, kaniw tuang tik gunc guay tei ni mwnpwang na kumh tuang de. Pucbwan guay tei theic e, mwnpwang guay tuai e;

²⁵tiki Ravguangc lat thu tingsaeng nai bam e.” twna nthanmei latrik rui samei lat kiu nangniw khou dincloumei gaychamv hei the.