Read Rongmei Naga 1 PITAR 2 Bible Online

1 PITAR 2 - Rongmei Naga bible

1 PITAR 2

¹Hei zaeng rui karaeng zauczihmei, rouh raengh simei, gaypui khe swmei, howtimei khatni meickai ta sakasicmei kapwmna ganc o.

²Nangniw ngasatna nunc rui noucdui kahawmei kumcna nthanmei bumaengh tuang taektw ta kahaw o. Kumna mi paan tei rui nangniw kanloumei nganv daic thau khang e.

³Kalam thu Poubauhmei zauzian nangniw mbap kan the.

⁴Meic nunc rui thu gancpatloumei, tiki Ravguangc khang thu kadahloumei khatni kunghmei ringhmei tauc Poubauhmei daeng khou ana guang o.

⁵Nangniw ni ringhmei tauc swna guangna bumaengh tuang ravkai swthaumei tauc tei tisw o. Mi khou tei nangniw nthanmei amuc nunc swna Ravguangc rui laalou nuhmei, bumaengh tuang khaengpui taanv Jisu Khrista paan rui taanc bam khang e.

⁶“Zauclo, kadahloumei kunghmei tauc Zaion khou kaikwnpy tauc swna ai rui lou e. Kakhou lwmpui mei ta tei zakmei ti-ariw lak ge,” twna hylouna nai e.

⁷Mi tauc hei lwmmei nangniw khang kunghmei tauc e; tiki lwm makmei nunc khang thu, “Kai swmei nunc rui ganc patloumei tauc tei kaikwnpy tauc sw the.”

⁸Kumna, “Hei tei meic nunc ta tiphaysuy nipui tauc e, kaniw ta tibow nipui tauc e,” twna hyloumei kumcna, kaniw lat tei lwm makpui zaeng rui mi khou tei phaysuy the. Hei tei kaniw dam the.

⁹Tiki nangniw thu, nangniw ta zinghmei khou rui katuang charynmei gaanhmei khou kaw patloumeipu Racguangc tuang charynmei taanv guay dinc ndauh khang rui, Ravguangc rui kadahloupui mei nunc e; guangh tuang amuc nunc e; nthanmei zaat re; Ravguangc tuang mei nunc e.

¹⁰Kahunungc nangniw Ravguangc tuang mei nunc hamh bam khwan e; tiki ntaw thu nangniw kamei nunc di the. Kahunungc nangniw Ravguangc zauzian laatow makmei nunc sw bam khwan e; tiki ntaw thu nangniw kazauzian laatow the.

¹¹Nzianmeithiu, mi mbaanv ramc khou gin swna lungc khanv bammei ai rui nangniw khou zaenghuay e! Bumaengh ta adow bammei meic pumc rui kahawmei khou rui karei pat ro.

¹²Zentelmei nunc hu khou nangniw khei liak gayna lungc o. Kaniw rui nangniw ta meicsimei nunc de twna sa bam pwsini, kaniw nangniw tuang gaymei taanv guay tei howna katuang latzan nungc kiu Ravguangc ta thuanc kan diu.

¹³Nangniw Poubauhmei khang rui kandih tuang ngamv phunghmei guay bangc khou bam o. Ngamv karucsyngmei guanghdaihmei bangc khou ni bam o.

¹⁴Kataanv simei nunc ta dandi tii khang khatni nchumhmei taanhmei nunc ta thuanckulou khang ngamv tiiloumei guanghkhyn nunc bangc khou ni bam o.

¹⁵Mpangmei nunc rui thay makna sakasic bammei lat guay tei nangniw tuang taanv rui munthimloumei hei Ravguangc rui kahawmei e.

¹⁶Nangniw nyngswmei nunc swna lungc o; tiki nyngswmei tei simei taanh khang thu sinsw rio. Ravguangc bangc nunc swna lungc o.

¹⁷Meic guayna ta chakhwang sw o; chana punav ta nzian o; Ravguangc ta ping o; khatni guanghdaihmei ta kangam kaziu sw o.

¹⁸Banghthiu, nangniw kaipouc nunc bangc khou chakhwang champouhna bam o. Nzianthaymeipu bangc khou ni, meicsimeipu bangc khou ni bam chuyna bam o.

¹⁹Meic nunc rui nchumh makna sw kasicna swmei tei nangniw Ravguangc ta thayna khaengvlou e thei, hei tei suaihiam de.

²⁰Tiki nangniw khuay zaeng rui nangniw ta baimei zam suhmei tei thu nangniw khaengv bam sini tabui gaeng tuang naina cho? Tiki nangniw nchumhmei taancna ryanramei khaengvlou e thei, mi khang tei Ravguangc rui suaihiamlou puni.

²¹Ravguangc rui nangniw ta kawloumei hei mi kumcna lungh khang the. Khrista kamei nangniw khang ryanra khaengvlou the kumna kathei lay nzeic khang taanclou the. Mi kiu kakaamv lay kaamh khang the.

²²Kamei paapc taanh mak ge; kamwang khou rui saraamhmei lat khat sini sa pat mak ge.

²³Karuc khou latsic latrouc salou tisini kamei latsic latrouc sa khangc dat mak ge. Kata rai riu tisini, khwm khangc ni twna sa mak ge. Mi phaan tei nchumhmei latzanpouc khou kata nsinlou e.

²⁴Aniu paap khou rui duak patna ravchaptatmei khou lungh khang kamei kahak rui thing ruc khou kapumc khou aniu paap phungclou the. Katuang zam guay tei rui aniu ta tigaylou the.

²⁵Nangniw hei ruan maan tat kanmei lauziu nunc kumc bam khwan the; tiki ntaw thu nangniw bumaengc ta gaengclou nimei khatni gaeklou nimeipu khou guang dat the.