Read Rongmei Naga 1 PITAR 4 Bible Online

1 PITAR 4 - Rongmei Naga bible

1 PITAR 4

¹Khrista tei kapumc khou ryanra khaengv kan the. Hei zaeng rui, nangniw ni mi kumhmei lungning tei phungcna, hei tei rui nangniw tuang ricpwan sw nina the. Kalam thu meic pumc khou ryanra khaengv kanpui mei tei paapc khou bam dat mak khe.

²Hei zaeng rui, ntaw khou rui thauna, nangniw tuang nai bammei mbaanv panty hei meic pumc rui kahawmei thei layna lungc dat lak nina the; Ravguangc rui ningmei thei layna lungc nina e.

³Nangniw ni tat kanmei ganv khou tei Zentelmei nunc taanc niimei taanv zaat guay tei taancna lungc kan the. Nangniw panty tei lungcmaanv lungcmowmei khou, nthah boulahmei khou, tu zangvna mba nlaumei khou, chanymei ravmaengc kalummei khou lungc kan the.

⁴Ntaw thu mi kumhmei simei lwnlung khou tei nangniw lay lungc dat ti makpui zaeng rui, kaniw khang kadath dat the, kumna nangniw ta sakasicna sw zak khang sw the.

⁵Tiki theihmei, ringhmei katana ta latzan sw nimei Racguangc latzan hu khou kaniw ni guang ding puni.

⁶Hei zaeng rui, meic pumc khou maansei ta swna latzan sw kan khwan sini, kaniw Ravguangc kumcna bumaengh khou ringh khang, gaychamv hei theihmei kaniw khou ni dinclou kan tuang e.

⁷Ramh guayna luailou nimei ganv ana the. Kum thena ntak nrakna huayney bam o.

⁸Ramh guayna ruc khou, nangniw khat khat ta nzian ntipna nzian bam o. Kalam thu nzianmei rui paapc heizumei ta gumbinlou e.

⁹Nangniw neihla neihlana khat khat ta ginkic phaypamcna lungc o.

¹⁰Meic kathuicna kakhou kakhou tiiloumei kaipat tei Ravguangc tuang siamruaimei swna meic guayna khang gaeng khang sinsw o.

¹¹Chamv dinhmei nunc rui Ravguangc lat tei dinc o; siamruai swmei nunc rui kakhou Ravguangc rui tiiloumei pumtan tei sinswna taanc o. Kumna ramh lam guayna khou Khrista paan rui Ravguangc hym tidaih khang taanc o. Hymdaihmei khatni ngammei hei tingsaeng Jisu Khrista khang e. Amen.

¹²Nzianmeithiu, nchanvmei tuang ryanra daihmei nangniw khou guangpui ganv khou, hei tei nangniw khou kadath datpui tuang guanglou kumcna ning rio.

¹³Mi phaan tei, Khrista tuang hymdaihmei ndauh patpui nungc kiu, nangniw neihlamei rui padik khang, nangniw katuang ryanramei dam lay phungc bam tuang e twna neihla o.

¹⁴Khrista zanc khou meic nunc rui nangniw ta swzaklou e thei, nangniw sangaymei e; hei tei hymdaihmei Bumaengc, Ravguangc Bumaengc nangniw khou bam tina the.

¹⁵Meicdowmei, kaihouhmei, simei taanv taanhmei khatni meickai taanv khou baanh numloumei zaeng rui ryanra khaengvmei thu sw rio.

¹⁶Tiki nangniw Khristamei swpui zaeng rui ryanramei ariw e thei, mi khang tei zak rio; tiki nang ta Khristamei twmei zanc hei kawlou the twna Ravguangc ta thuancku o.

¹⁷Latzan sw nipui ganv guang pw the; kumna Ravguangc mei nunc ta latzan sw rey puni. Latzan hei aniu khou rui kahouh e thei, Ravguangc tuang gaychamv piu makmei nunc ta thu akumh puni tha?

¹⁸“Ravchaptatpui mei ta sini kungc sihna kanlou e thei; ravning makmei paapcmei nunc ta thu akumh puni tha?” twna hylouna nai e.

¹⁹Hei zaeng rui, Ravguangc rui ningmei thei layna ryanra khaengv bammei nunc hei gaymei taancna kaniw bumaengc, kalatryan suai makmei Damcloumeipu khou nsinlou kan dio.