Read Rongmei Naga 1 PITAR 5 Bible Online

1 PITAR 5 - Rongmei Naga bible

1 PITAR 5

¹Ai kahak ni gaanvthaih akhat swna nangniw phwamling gaanthaic guay khou zaenghuay e. Khrista ryanra khaengvmei tuang sakhi, khatni ndauh pat punimei hymdaihmei tei lay laa nimei ai rui nangniw khou zaenghuay e:

²Nangniw khou nsinloumei Ravguangc tuang lauziu pang ta tei gaengc o. Taanc zih zihna taanhmei hamhna, Ravguangc rui kahawpui thei layna taanc niina taanc o. Syan lanv khang rui hamhna, taanclou nii changhna taanc o.

³Nangniw khou nsinloumei lauziu pang ruc khou tei nangniw kaipouc kumcna sw riu, tiki lauziu pang tei rui lay nzeic nuhpui lwnlung swna lungclou o.

⁴Kumna lauziu gaenghmei kapypu tei guang pwkhou, tuai dat lakmei hymdaihmei swanpyrun nangniw laa puni.

⁵Alaucthiu, nangniw ni gaanvthaih guay bangc khou bam o. Nangniw niamh keyna khat khat siamruai sw o. “Daihriw swmei ta Ravguangc nuh mak ge.”

⁶Hei zaeng rui, ngammei Ravguangc baanc pwam bangc khou nangniw niamh key o. Kum e thei kamei rui nuhloupui ganv khou nangniw ta zay kauh thaulou puni.

⁷Nangniw tuang lungh geic kadanmei guay tei kakhou tiilou o; kamei nangniw khang kadanlou bam e.

⁸Nangniw ramhthayna ntak nrakna bam o! Nangniw ta zauczihmei ravsic hei rah bammei kamangliangpui kumcna thowkumhmei ta swluai tow puni cho twna rik tat bam e.

⁹Nangniw lwm ntip bo khatni ravsic ta ding akhaengv o. Lwmmei guay thu mbaanv kapwm khou nangniw ryanra bammei kumcna ryanramei ariw bam muay tuang de twmei nangniw thay e.

¹⁰Matak khat mi kumna ryanra khaengvloumei tangv, Khrista paan rui katuang tingsaeng hymdaihmei laa khang nangniw ta kanloumeipu, zauzian guay Racguangc kamei rui, nangniw ta ti-nthuihlou puni, sw ntiplou puni, titanclou puni, khatni tiding ntiplou puni.

¹¹Ngamv hei kakhang e tingsaeng. Amen

¹²Lwmnuhmei chana akhat re twna ai laa bammei Silbana paan rui mi duimei tatdyn hei ai hy tuang e. Mi hei rui ai nangniw ta katiuloupui tuang e khatni mi hei kalingmei Ravguangc zauzian the. Mi khou hei ding ntipna ding bam o.

¹³Ravguangc rui kapah patloumei, Babilon[4] khou bammeipui rui nangniw khang dwan gay kady e. Anac mpouh Mark rui ni dwan gay kady e.

¹⁴Nzianmei tuang khat khat ta kaputna dwan gay kady kary o. Khristamei nunc nangniw khou chuzaenghmei nai diu.