Read Rongmei Naga 2 PITAR 1 Bible Online

2 PITAR 1 - Rongmei Naga bible

2 PITAR 1

¹Jisu Khrista bangc khatni katuang latdiutatmei Simon Pitar rui — Aniu Racguangc khatni Jisu Khrista ramgai paan rui kunghmei aniu lwmmei tei laatow nchamcmei nunc khou hymei:

²Ravguangc khatni Jisu Khrista ta thaymei paan rui zauzian khatni chuzaenghmei nangniw khou mbu hay hay thau bam di tho.

³Aniu kalingna-ravchaptatmei panty khou lungc ngam khang kage naimei guay Ravguangc tuang pumtan rui aniu khang tiilou the. Mi hei kahym khatni karamgai lay laa khang[1] aniu ta kawloumeipu ta thaymei paan rui laatow tuang e.

⁴Mi kumcna kamei rui aniu khang tii ni twna nrianhloumei daihmei khatni kunghmei kaipat tei aniu khang tiilou the. Aniu ta sw kasic nimei mbaanv tuang simei ta kahawmei khou rui mi paan rui aniu duak patna, Ravguangc tuang lwnlung lay laa ngam khang e.

⁵Mi zaeng rui nangniw khou naimei lwmmei ruc khou kheiliak gaymei; kheiliak gaymei ruc khou thaymei;

⁶thaymei ruc khou pumh sinriapmei; pumh sinriapmei ruc khou khaengvthaymei; khaengvthaymei ruc khou ravningchuymei;

⁷ravningchuymei ruc khou chana punav ta nzianmei; chana punav ta nzianmei ruc khou nzianmei nkimlou khang karamc o.

⁸Mi gunc guay hei nangniw khou nai ni tuang e, kumna mi guay hei nangniw khou mbu thaupui thei layna, nangniw Jisu Khrista ta thaymei tuang thai, mi guay hei rui nangniw khou ti-nthailou ni tuang e.

⁹Tiki mi gunc guay hei nai makpui mei tei thu how duc ngam makpui mei e khatni mik tiatmei e, kumna katuang tat kanmei ganv tuang paap guay tei sw nthanlou kan the twmei kamei ningtow dat mak khe.

¹⁰Mi zaeng rui, achanathiu, nangniw ta kawloumei khatni kadahloumei tei kiuc dyng the twmei lyan khang karamc ranv o. Mi kum pwkhou, nangniw bow dat zat lak khe.[2]

¹¹Kumna aniu Poubauhmei Guloumeipu Jisu Khrista tuang tingsaeng guangcdic khou gut khang giuga dat lak khe.

¹²Mi zaeng rui, mi guay hei nangniw thay tangna, nangniw laaloumei nchumhmei khou tei ntipna ding bam sini, mi guay hei ai nangniw ta tining tow dat dat bam puni.

¹³Ai ringc bamv saanv, mi guay hei nangniw ta tining tow bammei hei athouc e twna ai ning e.

¹⁴Aniu Poubauhmei Jisu Khrista rui akhou dincloumei thei layna, ai mi mbaanv pumc hei mpatlou nimei ganv asaanh mak khe twmei ai thay the.

¹⁵Ai theic kan sini nangniw mi guay hei amuc makna ningtow bam nuh khang ai swlou puni.

¹⁶Aniw rui nangniw khou dincloumei hymdaicna Poubauhmei Jisu Khrista guang nimei latdyn hei maansei lungning khou rui patmei damc duancpui pary hamh e. Katuang hymdaihmei tei aniw mik kahak rui how the.

¹⁷Kamei kapu khou rui champouhmei khatni hymdaihmei laapui ganv khou, Kauh Liangmei Hymdaihmei khou rui, “Mi hei alung kwnmei, ai nzianmei Nac Mpouh e!” twna kauc key khou aniw bam khwan e.

¹⁸Aniw kamei lev nthanmei chyngbut khou bam khou, mi tingkauh thangc rui kauc keymei khwan tei aniw chu the.

¹⁹Mi zaeng rui, muhzwng nunc rui dincloumei lat hei aniu lwm ntip hay hay khang nai the. Nangniw mi khou tei lungh louna bam e thei, nangniw gay puni. Kalam thu mi hei, nangniw khang lauthwan gaanphiu pat mak saanv, tinggaanh mak saanv zinghmei khou gaanc bammei maibungc tei kumh tuang e.

²⁰Rey liangmei khou nangniw thay nimei thu, Nthanmei latrik khou naimei dinc kasuakcloumei guay tuang kabac hei meic gaanv khat na sini karana rui hanc nina hamh e.

²¹Kalam thu muhzwng nunc rui saloumei lat hei maansei lungning khou rui pat tu hamh e; tiki Ravguangc khou rui patmei lat tei Bumaengh Nthanmei rui maansei ta tisa tuang e.