Read Rongmei Naga 1 JAHON 1 Bible Online

1 JAHON 1 - Rongmei Naga bible

1 JAHON 1

¹Puakthau puaksiak khou rui nai bammei ringhmei Lat lam khou aniw rui nangniw khou hy tuang e. Kamei rui sa kahakmei aniw chu the; aniw mik kahak rui kata how the. Ngguay, aniw how the khatni aniw baanc rui kata kahitow the.

²Mi ringhmei hei mik rui howmei khou ndauh pat the, kumna aniw kata how the. Hei zaeng rui aniw kalam khou sa bam tuang e khatni Pu khou naimei aniw khou ndauhloumei ringcsuangmei lam hei nangniw khou dinclou tuang e.

³Aniw rui howmei khatni chumei guay tei aniw rui nangniw khou dinclou tuang e. Mi hei aniu Pu khatni Kanac Mpouh Jisu Khrista khou akhatna swna bammei khou hei nangniw ni lay bam muay khang rui e.

⁴Aniw[1] neihla nthuih khang, mi hei hypui tuang e.

⁵Aniw kakhou rui chuna dinc ndauh bammei chamv kiu mi hei e: Ravguangc thu gaanhmei e, kumna kakhou zinghmei khat sini maek ge.

⁶Aniu kakhou bam the twna sa laki, zinghmei khou lungc bam e thei, aniu lat khou ni, taanv khou ni saraamhmei e.

⁷Kamei gaanhmei khou bammei kumcna aniu ni gaanhmei khou bam e thei, aniu akhatna di the, khatni Kanac Mpouh Jisu zei rui aniu ta paapc guay khou rui sw nthanlou the.

⁸Aniu rui aniu paap maek ge twna sa e thei, aniu rana aniu ta guat tuang e, khatni aniu khou nchumhmei maek ge.

⁹Tiki aniu rui aniu paap Ravguangc khou kalauh ti thei, kamei thu kalat suai makmeipu e, khatni nchumhmei taanhmeipu e; kumna kamei rui aniu paap guay kuaklou puni khatni aniu khuay guay sw nthanlou puni.

¹⁰Aniu paapc taanh mak ge twna sa e thei, aniu rui Ravguangc ta saraamhmei tiswlou the, kumna kalat aniu khou maek ge.