Read Rongmei Naga 1 JAHON 2 Bible Online

1 JAHON 2 - Rongmei Naga bible

1 JAHON 2

¹Anacthiu, nangniw paapc taanh mak khang mi hei nangniw khang hy tuang e; tiki thowkumhmei paapc taanclou e thei, Pu khou aniu khang huayneylou khang nchumhmei, ravchaptatmei sungpouc Jisu Khrista nai e.

²Kapaan rui aniu paap guay kuaklou tuang e; aniu paap khang na hamh e; mbaanv kapwm paap khang kamei lynlou the.

³Aniu kalatdanv guay piu e thei, aniu kata thay the twmei nthan the.

⁴Thowkumhmei rui kamei kata thay the twna sa laki, kalatdanv guay thu piu makpui mei tei saraamhpui mei e, khatni kakhou nchumhmei maek ge.

⁵Tiki kalat piu bampui mei tei thu kamei Ravguangc ta nzianmei tei ti-nthuihlou bampui mei e. Aniu kakhou bam changh the twmei thay nimei kiu thu mi hei e,

⁶twmei thu: thow pw ni kamei Ravguangc khou bam the twna sapui mei tei Jisu Khrista kumcna lungc nina e.

⁷Nzianmeithiu, mi ai rui nangniw khou hy bammei latdanv hei kathanc hamh e; mi hei thaurey khou na rui nangniw khou tiiloumei latdanv guangc tei de. Latdanv guangc kiu thu nangniw chu tang kanmei tei the.

⁸Tiki ntaw ai nangniw khou hy bammei latdanv hei thu kathanc e. Kalam thu mi tuang kalingmei tei Khrista khou ni, nangniw khou ni how e, kumna gaanhmei ling tei gaanc bam the.

⁹Thow pw ni kamei gaanhmei khou bam the twna sa laki, kachana punav ta karaeng e thei, ntaw nganvna kamei zinghmei khou bam di he.

¹⁰Thow pw ni kachana punav ta nzianpui mei tei gaanhmei khou bam the, kumna kamei rui meickai ta[2] tiphaysuy nipui tuang maek ge.

¹¹Tiki thow pw ni kachana punav ta karaengpui mei tei zinghmei khou bam di he; kamei zinghmei khou tat bam e, kumna kamei tabui thangc tat bam tu cho twmei kamei thay mak ge. Kalam thu zinghmei rui kamik swtiat the.

¹²Anacthiu, ai nangniw khang hy tuang e, kalam thu Khrista paan rui nangniw paap guay kuaklou the.

¹³Puthiu, ai nangniw khang hy tuang e, kalam thu puakthau puaksiak khou rui nai bammeipu ta nangniw thay the. Chabwanthiu, ai nangniw khang hy tuang e, kalam thu nangniw Simeipu ta tei ngam kan the.

¹⁴Anacthiu, ai nangniw khang hy tuang e, kalam thu Pu ta nangniw thay the. Puthiu, ai nangniw khang hy tuang e, kalam thu puakthau puaksiak khou rui nai bammeipu ta nangniw thay the. Chabwanthiu ai nangniw khang hy tuang e, kalam thu nangniw tanc the; Ravguangc lat nangniw khou nai the, khatni nangniw rui Simeipu ta ngam the.

¹⁵Mbaanv khatni mbaanv tuang guay ta nzian rio. Nangniw mbaanv ta nzian e thei, nangniw Pu ta nzian mak ge.

¹⁶Mbaanv tuang guay twmei thu—meic pumc rui kahawmei, mik rui kahawmei, meic nunc rui gaengh sw bammei mbaanv tuang guay hei Pu khou rui guang tu hamh e; mbaanv khou rui de.

¹⁷Mbaanv khatni meic nunc rui kahawmei mi khou naimei guay hei ni maan kan ni de; tiki Ravguangc ningmei taanhpui mei na tei tingsaeng ringc bam e.

¹⁸Anacthiu, mi hei nkhamhmei ganvdak di the! Khrista ta zauczihmeipu guang puni twna nangniw khou dinclou kan the; kumna ntaw thu Khrista ta zauczihmei mei mpeyna pat the. Kumna ntaw thu nkhamhmei ganv ana the twmei aniu thay the.

¹⁹Kaniw aniu pang khou rui tat pat kanmei hei kaniw aniu pang khou kazauhmei hamh tina e. Aniu pang khou kazauhmei nunc khwan e thei, kaniw tat pat makna bam kan ni tuang de. Kaniw tat pat kanmei hei rui kaniw hei aniu pang khou kazauhmei hamh e twmei nthanna lyan the.

²⁰Tiki nangniw thu Nthanmeipu rui bun keymei Bumaengh Nthanmei tei laatowmei nunc the, kumna nangniw thu nchumhmei tei thay the.

²¹Kum thena, nangniw nchumhmei tei thay mak ge twna ai hy bam tu hamh e; tiki nangniw thaypui zaeng rui hy tuang e, khatni nchumhmei khou rui saraamhmei pat mak ge twmei ni nangniw thay e.

²²Kum e thei saraamhpui mei kiu thow tei cho? Jisu hei Khrista hamh e twna sapui mei tei e. Mi kumhpui mei tei Khrista ta zauczihmei the—kamei Pu ta ni, Kanac mpouh ta ni nuh mak ge.

²³Nah Mpouh ta laalou makpui mei tei Pu ta ni laalou mak ge. Nah Mpouh ta laaloupui mei tei Pu ta ni laalou e.

²⁴Nangniw thaurey khou rui chu kanmei latdyn tei nangniw lungc khou lou o. Hei tei nangniw lungc khou nai bam e thei, nangniw Nah Mpouh khatni Pu khou bam bam puni.

²⁵Khrista rui aniu khang tii ni twna samei ringcsuangmei kiu mi hei the.

²⁶Nangniw ta guat khang sw bammei nunc lam khou ai nangniw khou hy bam tuang e.

²⁷Tiki nangniw thu Khrista rui tiimei Bumaengc tei laatowmei nunc di the. Bumaengh tei nangniw khou bam saanv, nangniw ta meic baihmei rui ncham dat bam khang kage maek khe. Kalam thu katuang Bumaengc rui nangniw ta ramh lam katana nchamlou bam tuang di the. Kamei rui nchamloumei tei nchumhmei e; saraamc dat mak khe. Hei zaeng rui, Bumaengh rui dincloumei tei piu o, kumna Khrista khou bam tanh tan o.

²⁸Ngguay, anacthiu, Khrista guangpui Nungc kiu zakna nkamh makna, baucna kata ariw ngam khang kakhou bam tanh tan o.

²⁹Khrista thu nchumhmei e; kumna nchumhmei taanhmei guay Ravguangc nac e twmei thay nina e.