Read Rongmei Naga 1 JAHON 3 Bible Online

1 JAHON 3 - Rongmei Naga bible

1 JAHON 3

¹Zauclo, Pu rui aniu ta adih nzian cho! Kamei rui aniu ta heidikamv nzianna aniu ta Ravguangc nac nunc twna kawlou the— aniu Kanac nunc changh the! Hei zaeng rui Ravguangc ta thay makmei mbaanv rui aniu ta thay mak ge.

²Nzianmeithiu, aniu hei Ravguangc nac nunc the; tiki aniu tabui kumc puni cho twmei ntaw nthanna thay mak he. Tiki Khrista guang pwkhou kiu, aniu kakumc puni the twmei aniu thay e. Kalam thu kalwnlung kahak tei aniu how puni the.

³Mi kumcna Khrista khou rigwnmei naimei kathuic tei, Khrista nthanmei kumcna nthanna bam puni.

⁴Thow pw ni paapc taanhpui mei tei Ravguangc Latdanv piu makmei e, kalam thu paapc hei thu latdanv piu makmei e.

⁵Paapc guay[3] laa ganclou khang Khrista guang tuang e, kumna kakhou paapc maek ge twmei nangniw thay e.

⁶Hei zaeng rui, Khrista khou bampui mei rui paapc taancna bam mak ge; paapc taanc bampui mei tei thu kata how mak ge, kata thay ni thay mak ge.

⁷Anacthiu, nangniw ta tiguat rio! Thow pw ni nchumhmei taanhpui mei tei, Khrista ravchaptatmei kumcna kamei ni ravchaptatmei e.

⁸Paapc taanc bampui mei tei thu ravsic tuang de. Kalam thu ravsic hei thaurey khou na rui paapc taanc the. Hei zaeng rui, ravsic tuang taanv guay swmaan khang Ravguangc Nac Mpouh guang tuang e.

⁹Ravguangc nac swna puanc kanmei guay thu paapc taanc bam dat mak khe. Kalam thu Ravguangc lwnlung kakhou nai the. Kamei Ravguangc nac lapui zaeng rui paapc taanc bam ngam mak ge.

¹⁰Thow tei Ravguangc nac cho, thow tei ravsic nac cho twmei thay nimei kiu mi hei e. Nchumhmei taanh makpui mei khatni kachana punav ta nzian makpui mei tei Ravguangc nac hamh e.

¹¹Thaurey khou na rui nangniw chu kanmei latdyn kiu thu: aniu khat khat ta nzian nina e twmei hei e.

¹²Aniu Kain kumc nina hamh e. kamei Simeipu tuang mei swna kakainac kahak Abel ta swluai kan e. Tabui zaeng rui Kain kakainac ta dowluai tu cho? Kalam thu kataanv tei si khwan e; kakainac tuang taanv rui nchumhmei khwan e.

¹³Chana punavthiu, mbaanv rui nangniw ta karaeng pwkhou ngak rio.

¹⁴Aniu thu theihmei ta ganclouna ringhmei khou kaan pat tuang di the twmei aniu thay e. Kalam thu aniu chana punav ta nzian the. Nzian makpui mei tei thu theihmei pumtan bangc khou bam di he.

¹⁵Kachana punav ta karaengpui mei tei meicdowmei e; kumna meicdowpui mei khou ringcsuangmei maek ge twmei nangniw thay e.

¹⁶Nzianmei kiu mi hei e: Khrista rui aniu khang kapanty tii pat the. Hei tei kumcna aniu ni aniu chana punav guay khang aniu panty tii pat nipui thouc e!

¹⁷Naimeipu gaanv khat rui kachana punav lungc ryanrana bammei ta how sini kakhou nzianmei pat mak ge thei, kamei Ravguangc ta nzian e twna akumhna sa ngam nina cho?

¹⁸Anacthiu, aniu lat na rui nzian ri kho; tiki nzian changhmei tei taanv rui lyan kho.

¹⁹Aniu nchumhmei khou bam the twmei thay nimei kiu mi hei the; aniu rouh tuang maekna Ravguangc hu khou guang ngammei kiu mi hei the.

²⁰Aniu lungning rui aniu ta nkhuai e twna sa pwsini, Ravguangc thu aniu lungning khang suangc mbumei de, kumna kamei ramh guayna thay e.

²¹Hei zaeng rui, nzianmeithiu, aniu lungning rui aniu ta nkhuai e twna salou mak ge, aniu Ravguangc hu khou rouh dat khang maek khe.

²²Aniu katuang latdanv guay piu tipui zaeng rui khatni kamei ningmei taanc tipui zaeng rui aniu kakhou ney neymei laatow e.

²³Katuang latdanv kiu thu Kanac Mpouh ta lwm o khatni Khrista tuang latdanv kumcna khat khat ta nzian o twmei hei e.

²⁴Ravguangc latdanv piumei guay tei Ravguangc khou bam the khatni Ravguangc kakhou bam the. Ravguangc aniu khou bam the twmei kamei rui aniu khou tiiloumei Bumaengc paan tei rui aniu thay e.