Read Rongmei Naga 1 JAHON 4 Bible Online

1 JAHON 4 - Rongmei Naga bible

1 JAHON 4

¹Nzianmeithiu, Bumaengh rui e twmei guayna tei lwm riu. Hei tei Ravguangc Bumaengc khou rui ny, kiuc hamh ny nchanv zauc o. Kalam thu guatmei muczwng nunc mbaanv khou tat pat kan the.

²Ravguangc Bumaengc khou rui e twmei nangniw thay nimei thu mi hei e: Jisu Khrista maansei guanhna lungc guang e twna samei kathuic tei Ravguangc Bumaengc rui e.

³Mi hei nuh makmei guay thu Ravguangc Bumaengc rui hamh e. Mi hei Khrista ta zauczihmei bumaengc khou rui de. Mi hei guang puni twmei nangniw chu kan the, kumna ntaw ni mbaanv khou guang bam tuang the.

⁴Tiki anacthiu, nangniw thu Ravguangc tuang e, kumna nangniw rui guatmei muczwng guay ta ngamlou kan the. Kalam thu nangniw khou bammei Bumaengc hei mbaanv mei nunc khou bammei bumaengc suangc tanc e.

⁵Mi guatmei muczwng nunc tei mbaanv tuang lat sa e; kum tina mbaanv mei rui kaniw lat nking e. Kalam thu kaniw mbaanv tuang e.

⁶Tiki aniu thu Ravguangc tuang de. Ravguangc ta thaymei guay aniu lat nking e; Ravguangc tuang hamhmei guay thu aniu lat nking mak ge. Kalingmei Bumaengc khatni guatmei bumaengc ta thay nimei kiu mi hei the.

⁷Nzianmeithiu, aniu khat khat ta nzian kho. Kalam thu nzianmei hei Ravguangc khou rui guang tuang e. Kakhou nzianmei naipui mei tei thu Ravguangc nac e, kumna kamei Ravguangc ta thay e.

⁸Kakhou nzianmei maekpui mei tei thu Ravguangc ta thay makpui mei de. Tabui cho tiki Ravguangc thu nzianmei e.

⁹Kapaan rui aniu ringhmei laa kan diu khang Kanac Mpouh kalu akhat namei ta mbaanv khou ndiu guangna Ravguangc rui aniu ta nzianmei lyanlou e.

¹⁰Aniu rui Ravguangc ta nzian tuang hamh e; tiki Ravguangc rui aniu ta nzianpui zaeng rui aniu paap guay tikuaklou khang rui Kanac Mpouh ta ndiu guang the. Nzianmei kiu mi hei the.

¹¹Nzianmeithiu, Ravguangc rui aniu ta mi kumcna nzian e thei, aniu ni khat khat ta nzian nipui thouc e.

¹²Meic gaanv khat na sini Ravguangc ta how zat mak he; tiki aniu khat khat ta nzian e thei, Ravguangc aniu khou bam the, kumna karam zian aniu khou tipadiklou the.

¹³Aniu Ravguangc khou bam the khatni kamei aniu khou bam the twmei aniu nthanna thay the. Kalam thu kamei rui katuang Bumaengc aniu khou tiilou the.

¹⁴Mbaanv ta kanlou khang Ravguangc rui Kanac Mpouh ta ndiu guangmei ta aniw how the, kumna meic nunc khou ni dinclou the.

¹⁵Jisu hei Ravguangc Nac Mpouh e twna sa ndauhpui mei tei Ravguangc khou bampui mei the khatni Ravguangc kakhou bam the.

¹⁶Ravguangc rui aniu ta nzianmei ramzian hei aniu kahak thay the khatni lwm the. Ravguangc thu nzianmei e, kumna nzianmei khou lungc bampui mei tei Ravguangc khou bam the khatni Ravguangc kakhou bam the.

¹⁷Latzan Nungc kiu aniu baucna ding ngam khang, aniu khou nzianmei ti-nthuihlou the. Aniu bauc ngam the, kalam thu mi mbaanv khou aniu Khrista kumcna lungc the.

¹⁸Nzianmei khou pingmei maek ge; nthuihmei nzianmei rui pingmei timaanv e. Hei zaeng rui pingmei naipui mei khou tei thu nzianmei ti-nthuihlou mak khe. Kalam thu pingmei hei dandi zaeng rui e.

¹⁹Ravguangc rui aniu ta nzian reypui zaeng rui aniu nzian tuang e.

²⁰Thowkumhmei rui kamei Ravguangc ta nzian e twna sa laki kachana punav ta karaeng e thei kamei saraamhmei e. Kalam thu howmei kachana punav ta nzian makna, kamei how makmei Racguangc ta akumhna nzian ngam nina cho?

²¹Khrista rui aniu khang tiimei latdanv thu: Ravguangc ta nzianpui mei tei kachana punav ta ni nzian nina e twmei hei e.