Read Rongmei Naga 1 JAHON 5 Bible Online

1 JAHON 5 - Rongmei Naga bible

1 JAHON 5

¹Thow pw ni Jisu hei Khrista e twna lwmpui mei tei Ravguangc nac the. Pu ta nzianpui mei tei kanac ta ni nzian e.

²Aniu Ravguangc nac nunc ta nzian e twmei aniu thaymei kiu thu: Ravguangc ta nzianmei khatni kalatdanv guay piumei khou nai the.

³Kalam thu aniu rui Ravguangc ta nzianmei twmei hei kalatdanv piumei hei the. Kalatdanv guay hei aniu piu ngam lakpui tuang hamh e.

⁴Kalam thu Ravguangc nac guay thu mbaanv ta ngam the. Kumna lwmmei paan rui aniu mbaanv ta ngam the.

⁵Mbaanv ta ngammei kiu thow tei cho? Jisu hei Ravguangc Nac Mpouh e twna lwmmei nunc tei e.

⁶Jisu Khrista hei dui lev zei rui sakhi swna guang tuang e. Dui na rui hamh e; dui lev zei mi kanei rui e. Mi hei kaling the twmei Bumaengh kahak rui sa the. Bumaengh hei thu nchumhmei e.

⁷Sakhi kathumh nai e.

⁸Mi kiu thu: Bumaengh, dui khatni zei e. Mi kathumh tuang sakhi hei nchamc e.

⁹Aniu maansei tuang sakhi ta lwm e; tiki Ravguangc tuang sakhi thu tanc ran e, kumna kamei rui Kanac Mpouh lam khou katuang sakhi tiilou the.

¹⁰Ravguangc Nac Mpouh khou lwmloumei kathuic lung khou mi sakhi hei nai the; tiki Ravguangc ta lwm makmei guay rui kata saraamhmei tiswlou the. Kalam thu Ravguangc rui Kanac Mpouh lam khou samei ta tei kamei lwm mak ge.

¹¹Sakhi kiu thu mi hei e: Ravguangc rui aniu khang ringcsuangmei tiilou the, kumna mi ringcsuangmei hei Kanac Mpouh khou nai e.

¹²Kanac Mpouh ta laatowmei guay tei mi ringcsuangmei hei laatow the; tiki Ravguangc Nac Mpouh ta laatow makmei guay tei ringcsuangmei laatow mak ge.

¹³Ravguangc Nac Mpouh khou lwmmei nangniw khou ringcsuangmei nai the twmei nangniw thay khang ai hypui tuang e.

¹⁴Aniu Ravguangc hu khou aniu lam khou lwmsi tuang nai dat mak khe, kalam thu aniu rui tabui pw ni kamei ningmei thei layna kakhou ney pwkhou kamei chulou the.

¹⁵Aniu neymei kathuic kamei rui chulou e twmei aniu thaypui zaeng rui, kakhou aniu rui neymei guay tiilou e twmei ni aniu thay e.

¹⁶Nang chana punav rui paapc taanc bammei ta how e thei, kumna hei tei theic nimei paap hamh e thei, kakhang huayneylou nina e. Kum pwkhou kapaap tei theic nimei paap hamh mei khang tei ringhmei tiilou puni. Theic nimei paap nai e; mi khang tei huayney o twna ai sa mak ge.

¹⁷Taanc maanvmei guay paapc e; tiki theic nimei paap hamhmei nai e.

¹⁸Ravguangc nac nunc thu paapc taancna bam mak ge twmei aniu thay e. Kalam thu Ravguangc Nac Mpouh rui kaniw ta gaeklou bam e, kumna simeipu rui kaniw ta sw kasic ngam mak ge.

¹⁹Mbaanv kapwm Simeipu baanc bangc khou bam sini, aniu thu Ravguangc tuang e twmei aniu thay e.

²⁰Ravguangc Nac Mpouh lungc guang the, kumna kalingmei Racguangc ta thay khang, aniu khou kabah thaymei tiilou the twmei aniu thay e. Kanac Mpouh Jisu Khrista khou bammei paan rui aniu kalingmei Racguangc khou bam the. Kalingmei Racguangc kiu mi hei the, khatni ringcsuangmei kiu mi hei the.

²¹Anacthiu, ravmaengc khou rui rei pat ro!