Read Rongmei Naga LATZANPOUC NUNC 1 Bible Online

LATZANPOUC NUNC 1 - Rongmei Naga bible

LATZANPOUC NUNC 1

¹Joshua theic kan pwkhou Isaraelmei nunc rui RINGHPOUC khou thanv the, “Kanaanmei nunc ta adow nimei hei thow kai kaikhwang rui chaeng huna adow gut nina cho?”

²Khoutei RINGHPOUC rui daw the, “Juda kaikhwang rui chaeng hu gut nina e. Kalam thu ai rui mi kandic tei kaniw baanc khou tiilou kan the.”

³Khoutei Judamei nunc rui Simeon kaikhwangmei nunc khou sa the, “Aniw khang tiiloumei ramv khou tei aniu gut ncham kho, kumna aniu kariuna Kanaanmei ta adow di kho. Mi tangv rui nangniw khang tiiloumei ramv khou tei ni aniu kariuna gut dat di kho.” Heikumna Simeon kaikhwangmei lev

⁴Juda kaikhwangmei kanei kariuna rih gut the. RINGHPOUC rui Kanaanmei nunc khatni Perizimei ta kaniw baanc khou tiilou tina Bezek twna kawmei bamv khou kaniw rui meic gaanv 10,000 ta dowluai the.

⁵Khoutei kaniw Adonibezek ta ariwna kaniw lev adow the.

⁶Khoutei pak tat kanmei kata kaniw rui nthauna nym lana kaphay kabaanc zungkui guay dan ganc the.

⁷Khoutei Adonibezek rui sa the, “Kaphay kabaanc zungkui guay dan gancloumei guangh 70 rui atuang kuakpaeng bangc khou tu kathowloumei tikhuaic kan the. Ai rui kaniw khou swlou kanmei tei ntaw thu Ravguangc rui akhou swlou datmei tuang di the.” Kata tei Jerusalem khou phungc guangna kamei mi khou tei theiclou kan the.

⁸Judamei nunc rui Jerusalem ta adowna laa the. Kaniw rui mi kaidai khou lungc bammei meic guay ta tei dowluaina mi kaidai tei mailou the.

⁹Mi tangv tei chyngramv khou, chyng phay ramv khou, khatni dihba biak ramvkaeng ramv khou lungc bammei Kanaanmei nunc ta adow khang tat the.

¹⁰Hebron kaidai (Kiriath Arba twna kaw bam khwan e) khou lungc bammei Kanaanmei nunc ruc khou rihkeyna Sheshai, Ahiman, khatni Talmai ta rih ngamlou khwan e.

¹¹Judamei nunc tei mi bamv khou tei rui mi douc tei Kiriath Sepher twna kawmei Debir kaidai khou rihkey the.

¹²Kaleb twna kawmeipu gaanv khat rui “Kiriath Sepher kaidai ta ngam ngammei now khang kanac aluhpui Aksa ta tii puni” twna kauc pat the.

¹³Kumna Kaleb kainac Kenaz rui puanhmei Othniel rui mi kaidai tei laa the kumna kanow khang Aksa ta tii the.

¹⁴Aksa ta kapu khou rui ramv ney o twna Othniel rui kakhou now suanhmei nungc sa the. Aksa tei kuanniam khou rui kandih khou key pwkhou, kamei tabui kahawna cho twna kapu Kaleb rui kakhou thanv the.

¹⁵Kamei rui kapu khou sa the, “Nang rui akhang dihba thangc ramv tiilou the kumna akhang duikhunc ni tiilou dat ro.” Khou tei kapu rui karucmei khatni kabangcmei duikhunc tei kakhang tiilou the.

¹⁶Mousi nowpu kiktamei Kenmei zaat ni tadanvbang kaidai Jeriko khou rui Judamei nunc thei laylouna Juda kandic Arad tuang dihba khou naimei ramvkaeng ramv khou guang tangc the. Mi khou tei kaniw Amelekmei nunc lev lungc the.

¹⁷Judamei nunc tei Simeonmei nunc lev twna tat nchamc guangna kaney kariuna Zephat kaidai khou bammei Kanaanmei nunc ta rih ngam the. Kaniw rui mi kaidai tei swmutsutlou the kumna mi zanc tei Horma twna phuaklou the.

¹⁸Judamei nunc rui Gaza Askelon khatni Ekron, mi nunc tuang kaidai guay khatni kadaeng khou naimei guay laa khwan e.

¹⁹Judamei nunc ta RINGHPOUC rui nduanghloumei paan rui chyngramv guay tei laagut ngam khwan e tiki nzaengc ramv khou lungc bammei nunc ta thu alay ganc ngam mak he kalam thu mi bamv khou lungc bammei nunc tei ntanh tuang gari nai geic khwan e.

²⁰Hebron kaidai khou lungc bammei Anak kiktamei kaikhwang kathumh ta Kaleb rui alay ganc kan the, kumna Mousi tuang latdanv theilayna Hebron kaidai tei Kaleb khang tii kan the.

²¹Tiki Benjamin kaikhwangmei nunc rui Jerusalem khou lungc bammei Jebusimei nunc ta alay ganh mak khwan e, kumna Jebusimei nunc tei mi kaidai khou tei Benjamin kaikhwangmei nunc lev hei khou tei rui thauna lungc guang the.

²²Josep kaikhwangmei nunc rui Bethel ta adow khang ngangh the kumna kaniw ta Ravguangc rui nduanghlou khwan e.

²³Kaniw rui Bethel (thaureydouc Luz twna kaw khwan e )thangc gwanrummei asaekc ndiulou the.

²⁴Mi kaidai khou tei bammei gaanv khat ta kaniw rui ariwna “Mi kaidai khou hei gut khang aniw khou chaeng dinclou o, kum e thei aniw rui nang ta nzianna swlou puni de” twna kaniw rui kakhou sa the.

²⁵Mipu tei rui kaniw khou chaeng dinclou the kumna Josep kaikhwangmei nunc rui mi kaidai khou bammei meic kaguayna ta swluai ngam the, chaeng dincloumeipu khatni kakai kaikhuncmei langv ta thu nsaekclou the.

²⁶Mipu tei Hittimei kandic thangc tatna, hei khou tei kaidai akhat kasiamh thau datna mi zanc tei Luz twna phuaklou the, kumna ntaw ni mi zanc tei kawna bam the.

²⁷Beth, Shan, Taanak, Dor, Ibleam, Megiddo kaidai guay khatni kadaeng daeng khou nai nkuay bammei namvdai guay khou lungc bammei nunc ta Manasemei nunc rui alay ganh mak khwan e. Kenmei nunc tei mi khou tei kumna lungc bam the.

²⁸Isaraelmei nunc lungc tanc thau pwkhou, Kanaanmei nunc ta tei nymna kaniw bangc tisw khwan e, tiki kaniw meic guayna ta tei alay thu alay ganh mak khwan e.

²⁹Gezer kaidai khou lungc bammei Kanaanmei nunc ta ni Ephraimmei kaikhwang rui alay ganh mak khwan e, kumna khou tei Kanaanmei nunc kaniw pang khou kumna lungc bam khwan e.

³⁰Kitron khatni Nahalal kaidai khou lungc bammei nunc ta Zebulun kaikhwangmei rui alay ganc ngam mak khwan e, kumna Kanaanmei nunc tei mi khou tei lungcna Isaraelmei rui kaniw ta sin binna kaniw tuang taanv titaanc khwan e.

³¹Akko, Sidon, Ahlab, Akzip, Helba, Aphek, khatni Rehob kaidai khou lungc bammei nunc ta Aser kaikhwangmei rui alay ganh mak khwan e.

³²Asermei nunc tei mi khou bammei nunc ta tei alay ganc lamakmei zaeng rui mi khou tei lungc bammei Kanaanmei nunc lev lungc nchamc bam khwan e.

³³Beth Shemes khatni Bethanat kaidai khou lungc bammei nunc ta Naphtali kaikhwangmei rui alay ganh mak khwan e. Kumna Naphtalimei nunc tei mi khou tei bammei Kanaanmei nunc tei lev lungc kariu bam khwan e, tiki kaniw rui mi nunc ta tei nymna kaniw taanv titaanc khwan e.

³⁴Amormei nunc rui Dan kaikhwangmei nunc ta chyngramv thangc alay ganclouna kaniw ta tei nzaengc khou tikey mak khe.

³⁵Amormei nunc tei Aijalon, Shalbim khatni Heres Chyng khou lungc bam khwan e, tiki Ephraim khatni Manasemei nunc rui mi nunc ta tei kaniw bangc khou louna kaniw taanv titaanc khwan e.

³⁶Amormei nunc tuang ramvrei tei Sela tuang dihpy biak thangc Akrabbim chaeng nganv khwan e.