Read Rongmei Naga LATZANPOUC NUNC 10 Bible Online

LATZANPOUC NUNC 10 - Rongmei Naga bible

LATZANPOUC NUNC 10

¹Abimelek theic kanmei tangv Isaraelmei ta kanduaklou khang Pua nac mpouh, Dodo tou kazanc Tola twmeipu lungc pat khwan e. Kamei tei Isakar kaikhwangmei e khatni Ephraim tuang chyngramv khou Shamir khou lunghmeipu e.

²Kamei tingkwm 23 Isaraelmei tuang latzanpouc swlou khwan e. Mi tangv tei kamei theicna Shamir khou mbeihlou kan the.

³Tola tangv Gilead khou rui Jair lungc pat dat khwan e. Kamei rui Isaraelmei ta tingkwm 22 kapy swna lungclou khwan e.

⁴Kanac mpouh kuanniam tuanghmei rana gaanv 30 nai khwan e. Gilead kandic khou kaniw tuang namvdai 30 nai khwan e, hei tei ntaw nganvna Jair tuang namv pang twna kaw bam e.

⁵Jair tei theic the kumna Kamon khou mbeihlou kan the.

⁶Isaraelmei nunc tei rav baih baihmei Baal, Ashtarot khatni Siriamei, Sidonmei, Moabmei, Amonmei khatni Philistin mi tuang rav nunc ta kalumna RINGHPOUC ruc khou paapc taanc dat khwan e. Kaniw RINGHPOUC ta mpatlouna kata kalum taan khwan e.

⁷Kum tina RINGHPOUC rui Isaraelmei ruc khou lunghpuamcna kaniw ta Philistinmei khatni Amonmei baanc khou tiipatlou khwan e.

⁸Jordan tuang neihpat Gilead kandic khou Amormei nunc tuang ramv khou lungc bammei Isaraelmei nunc ta kaniw rui tingkwm 18 lungcbinna raina lungc bam khwan e.

⁹Amormei nunc tei Jordan paengc nganv kaan patna Juda, Benjamin khatni Ephraim kaikhwang ta adow bam khwan e. Heikumna Isaraelmei tei ryanrana lungc bam khwan e.

¹⁰Mi ganv khou tei Isaraelmei rui Ravguangc khou heikumna kauc the, “He Ravguangc aniw nang ruc khou paapc taanc the, kalam thu aniw rui nang ta ganclouna Baal rav ta kalum tat dyng the.”

¹¹RINGHPOUC rui heikumna daw the: “Izipmei, Amormei, Ammonmei, Philistinmei,

¹²Sidonmei, Amalekmei, Maonmei, hei nunc rui nangniw ta rai bammei douc tei nangniw rui akhou kauc khwan e. Khoutei ai rui nangniw ta kanlou kan makna cho?

¹³Kum tisini nangniw ata ganclouna rav baih baihmei ta kalum tat dat bammei zaeng rui, ai rui nangniw ta kanlou dat lak khe.

¹⁴Nangniw rui kalum bammei rav nunc khou tei sa ti tho. Nangniw ryanramei ganv khou kaniw rui nangniw ta kanlou pw diu tho.”

¹⁵Tiki Isaraelmei rui RINGHPOUC khou sa the, “Aniw paapc taanc dyng the. Nang rui sw nii niimei thak swlou di tho. Tiki aseic thu aniw ta kan patlou nina di the.”

¹⁶Kumna kaniw rui rav baih baihmei ta mpat lana RINGHPOUC ta kalum dat the. Kumna Isaraelmei nunc ryanra bammei khou tei kamei akhaengvna bam ngam mak khwan the.

¹⁷Khoutei Amormei nunc tei rihkey khang chamdaanvna Gilead khou zypui swna bam the. Isaraelmei rihphyan guay ni guang kaduaina Gilead ramv khou Mizpa khou zypui swna bam the.

¹⁸Khoutei Isaraelmei nunc tei kaniw tuang kaikhwang tuang kapy nunc tei lev twna khat khat khou kumna thanv the, “Ammonmei ta adow khang thow rui kapy sw nina cho? Khoutei kapy swmei tei rui Gilead khou bammei meic guayna tuang kapy sw nina e.”