Read Rongmei Naga LATZANPOUC NUNC 11 Bible Online

LATZANPOUC NUNC 11 - Rongmei Naga bible

LATZANPOUC NUNC 11

¹Gilead khwangmei Jephtha hei rih khou tancbauhmei e. Kamei hei mangcsangmei luc nac khwan e. Gilead hei Jephtha pu khwan e.

²Kapu rui puanhmei nac mpouh nunc ni nai khwan e. Nah nunc tei daicthau pwkhou “Nang thu mi apu kai khou rui ramhkhat na sini laa nuh mak ge kalam thu nang thu ntumei baihmei nac de” twna kata alay ganc the.

³Jephtha tei kachana nunc khou rui pak tatna Tob kandic thangc lungc tat khwan the. Mi khou tei gaeng mak chuymakpui mei asaekc Jephtha ta ariwna kathei lay tat khwan e.

⁴Kaganv kanakmei tangv Ammonmei rui Isaraelmei ruc khou rihkey khwan e.

⁵Mi ganv khou tei Jephtha ta kaw guang dat khang Gileadmei gaanvthaic nunc Top kandic thangc tat the.

⁶Kaniw rui kakhou “Aniu Ammonmei ta adow khang nang guangna kapy swlou tho,” twna sa the.

⁷Khoutei Jephtha rui daw the, “Nangniw rui ata karaengna apu kai khou rui alay ganc tu hamhna cho? Tabui swna nangniw ryanramei ganv khou akhou guang dat tu cho?”

⁸Kaniw rui Jephtha khou daw the, “Kum sini, ntaw thu aniw nang khou guang datmei tuang di the, Ammonmei ta adow khang guang kazauhlou tho, nang rui Gileadmei guay tuang kapy sw nina di the.”

⁹Jephtha rui kaniw khou sa the, “Nangniw rui ata kaw guang datna RINGHPOUC rui rih tingamlou e thei nangniw tuang kaipouc sw puni.”

¹⁰“Aniw nuh the. RINGHPOUC rui aniw tuang sakhi di the, Nang rui samei kahak tei swlou puni the.” twna kaniw rui daw the.

¹¹Kumna Jephtha tei Gileadmei gaanvthaih nunc thei lay guang the kumna kaniw rui kata kaniw tuang kaipouc khatni kapy tiswlou the. Jephtha tei kamei rui sa nimei lat tei Mizpa khou RINGHPOUC hu khou salou the.

¹²Khoutei Jephtha rui Ammonmei guangc khou latdiumei thouclouna kumna sa the, “Nang rui aniw ruc khou tabui nuh makmei tuang naina cho? Tabui zaeng rui aniw ruc khou rihkey bam tu cho?”

¹³Ammonmei guangc rui Jephtha tuang latdiumei nunc khou sa the, “Isaraelmei rui Izip khou rui guang khou tei Arnon duithuak khou rui Jabbok duithuak lev Jordan duithuak kak khou naimei atuang ramv tei laa kan the. Ntaw hei nchu nzaenghna tiipat dat tho.”

¹⁴Jephtha rui latdiumei nunc Ammonmei guangc khou thouclou datna

¹⁵heikumna daw the, “Moabmei kandic khatni Ammonmei kandic Isaraelmei rui laa mak ge.

¹⁶Hei tei heikumna pat kanmei tuang e: Isaraelmei rui Izip khou rui tat pat khou tei kaniw tazikramv tat kaanna Ntou duipui kaanna Kades khou guang khwan e.

¹⁷Mi khou tei latdiumei thouclouna Edommei guangc ta kaguanghdic tei tat kaan gut khang nuhlou o twna sa khwan e. Tiki mi guangc tei rui nuhlou mak khe. Kum tina Isaraelmei tei Kades khou bamkeylou the.

¹⁸Kumna kaniw tei Edom khatni Moab kandic tei tat nkuayna Moab tuang neihpat biak, Jordan neihpat biak ramv tei guang tangh mak saanv tazikramv khou nkuay tat khwan e. Hei bamv khou tei kaniw guangna zypui swlou the, tiki kaniw Arnon tei kaan pat mak khwan e, kalam thu hei tei Moabmei tuang ramvrei khwan e.

¹⁹Khoutei Amormei guangc Heshbon khou bammei Sihon khou latdiumei thouclouna kaguanghdic tat kaan gut khang nuhlou o twna sa khwan e.

²⁰Tiki Sihon rui hei tei nuhlou mak khe. Kamei rui karicmei guay ta khuam kaduaina Jahaz khou zypui sw lana Isaraelmei ta adow the.

²¹Tiki RINGHPOUC, Isaraelmei Racguangc rui Sihon khatni karicmei nunc ta Isaraelmei baanc khou tiilou the. Kumna mi kandic khou bammei Amormei tuang ramv guay tei Isaraelmei rui laa the.

²²Amormei tuang ramv kaguay dihba biak thangc Arnon duithuak, dihpy thangc Jabbok duithuak, neihpat thangc tazikramv khatni neihkey thangc Jordan duithuak hei guay hei kaniw rui laa the.

²³Kumhpui zaeng rui, RINGHPOUC Isarael Racguangc rui kamei nunc khang Amormei ta alay gancloumei tuang di the. Hei tei laa dat khang nangniw thouc naina cho?

²⁴Nangniw tuang rav Kemos rui tiimei tei nangniw tuang swna bam o. RINGHPOUC aniw Ravguangc rui aniw khang tiiloumei tei aniw tuang sw bam puni.

²⁵Nang hei Moabmei guangc Zippor nac mpouh Balak suangc tanc e twna ningna cho? Kamei Isaraelmei ta khaengc baucna cho? Kamei Isaraelmei ta rih adow baucna cho?

²⁶Tingkwm 300 hei Isaraelmei rui Heshbon khatni Aroer kaidai, mi daeng khou naimei namvdai guay, khatni Arnon duithuak paengc khou naimei kaidai guay ta sin guang the. Hei saanmei hei nangniw tabui swna laagut dat makna bam tu cho?

²⁷Ai rui nangniw ruc khou nkhuailoumei tuang khat na sini maek ge. Nangniw rui aruc khou rih keyna nkhuaimei taanv taanc bam e. RINGHPOUC hei latzan kaipouc e kamei rui Ammonmei lev Isaraelmei kaney kak khou latzan swlou puni.”

²⁸Tiki Jephtha rui sa guangmei lat ti hei Ammonmei guangc rui lat re twna laalou mak khe.

²⁹Khoutei RINGHPOUC tuang bumaengc Jephtha khou keylou the. Kamei rui Gilead kandic khatni Manase kandic khou ruanlou lana Gilead khou naimei Mizpa khou guang datna Ammon thangc tat the.

³⁰Jephtha rui kumna RINGHPOUC khou latdyng sw the: “Nang rui ata Ammonmei ruc khou rih tingamlou pw e thei,

³¹ai rui Ammonmei ta rihngamna hanc guang dat pwkhou akai kaimun khou rui patna ata ariw rey liangmei ta tei ai rui mai nteina RINGHPOUC khang khaeng puni.”

³²Kumna Jephtha rui duithuak tei kaan patna Ammonmei ta adow the, kumna RINGHPOUC rui rih tingamlou the.

³³Aroer kaidai khou rui Minnit kaidai nkuaymei, Abel Keramin nganv khou kaidai 20 ta swmutsutlou the. Khoutei meic dowluai dai dowluai the kumna Isaraelmei rui Ammonmei ta ngamlou the.

³⁴Jephtha tei Mizpa khou kakai khou guang dat pwkhou, kanac aluhpui syamtuaic khuangc hiwna alaamh riu pat the. Hei tei kamei rui puanhmei akhat namei aluhpui e.

³⁵Kamei rui kata tei how pwkhou kalung ryanrana kaphey siatkaekna sa the, “He anac aluhpuile, Nang rui alung swbaklou the! Tabui zaeng rui nang rui alung tiryanralou tu cho? Ai rui RINGHPOUC khou nthukmei latdyng swlou kan the, hei tei ai kalaic dat ngam mak khe!”

³⁶Mipui tei rui kakhou sa the, “Apule, nang rui RINGHPOUC khou latdyng swlou kan e thei thu, nang rui sw ni twna nrianhloumei kiu akhou swlou pu di tho, kalam thu RINGHPOUC rui nang tuang zauczihmei Ammonmei ta khwm khangclou dyng the cho.”

³⁷Tiki kamei rui kapu khou kumna sa dat re, “Ai hei mih makna theic nina di thena arup arianmei nunc lev luangh kuna kap ntamv tat khang bw nei na thu tiilou o.”

³⁸Kata tei tat khang nuhlou the kumna kamei tei bw nei tat kan the. Kamei rui kapammei nunc ta nduanghna luangh kuna kap ntamv tat the, kalam thu kamei mih makna theic puni the.

³⁹Bw nei tangv kamei kapu daeng khou guang dat the. Kamei rui RINGHPOUC khou nrianhlou kanmei tei kamei taanc the, kumna kanacpui tei tunac swna theic kan the.

⁴⁰Gileadmei Jephtha nac aluhpui khang Isaraelmei luh nunc rui tingkwm pum zaeng padeih padeih tat patna latlu bammei hei mi khou tei rui patmei tuang the.