Read Rongmei Naga LATZANPOUC NUNC 12 Bible Online

LATZANPOUC NUNC 12 - Rongmei Naga bible

LATZANPOUC NUNC 12

¹Ephraimmei nunc rui kaniw tuang rihphyan guay ta kaw kaduaina Zaphon khou kaan pat lana Jephtha khou sa the, “Aniw ta kaw makna tabui swna ramvrei kaan patna Ammonmei ta adow tu cho? Aniw rui nang kai mailouna nang ruc khou mai ntei key puni the!”

²Khoutei Jephtha rui kaniw khou sa the, “Ai khatni amei nunc hei Ammonmei lev agay ranv sihna agay the. Ai rui nangniw ta kaw the tiki nangniw rui guangna ata nkhavlou mak ge.

³Nangniw rui nkhavlou ni tuang hamh the twmei howna, apanty amaan nimei ta kakhanh makna ramvrei kaan patna adowmei tuang the, kumna RINGHPOUC rui kaniw ta abaanc khou tiilou the. Tiki tabui swna ntaw nangniw ata adow khang guang tu cho?”

⁴Kumna Jephtha rui Gileadmei rihphyan guay ta khuam guangna Ephraimmei ta adowna kaniw ta zaw tisilou the. “Gileadmei nangniw thu Ephraim lev Manase khou rui pak pat kanmei nunc e,” twna Ephraimmei rui sa timei zaeng rui kaniw ta swkeymei tuang e.

⁵Ephraimmei tei pak duak mak khang Gileadmei rui Jordan chaengkat guay dingbin the. Ephraimmei pak duak khang Jordan kaan pat nuh khang sa ti thei “Nang Ephraimmei cho?” twna Gileadmei rui thanv the.

⁶“Kiuc hamh e” twna kaniw rui sa ti thei “Shibbolet” twmei latkaeng hei sa o twna sa the. Khoutei kaniw rui “Sibbolet” twna sa the, kalam thu kaniw tei mi latkaeng tei nthanna sa pat ngam mak ge. Kum pwkhou kaniw rui nym lana Jordan chaengkaanv khou tei dowluai raph rap the. Mi lwan khou tei Ephraimmei meic 42,000 ta dowluai the.

⁷Jephtha tei tingkwm charuk Isarael khou latzanpouc swlou khwan e. Mi tangv tei Gileadmeipu Jephtha tei theicna Gilead kaidai akhat khou mbeihlou the.

⁸Jephtha tangv Bethlehemmei Ibzan rui Isaraelmei ta chaengzayna lungc dat khwan e.

⁹Kanac mpouh gaanv 30 khatni aluh gaanv 30 nai khwan e. Kamei rui kanac aluh nunc ta tei kakai puinac hamhmei khou ti-miclou khwan e, khatni kanah nunc now khang kakai puinac hamhmei luh gaanv 30 laaguang khwan e. Ibzan rui Isaraelmei ta tingkwm chanei chaengzaylouna lungc khwan e.

¹⁰Kamei theicna Bethlehem khou mbeihlou the.

¹¹Ibzan tangv Zebulunmei Elon rui Isaraelmei ta tingkwm ruh chaengzaylou dat khwan e.

¹²Mi tangv tei kamei theicna Zebulun ramv khou Aijalon khou mbeihlou the.

¹³Elon tangv Pirathonmei Hillel nac mpouh Abdon rui Isaraelmei ta chaengzaylou dat khwan e.

¹⁴Kanac mpouh gaanv 40 katou mpouh gaanv 30 nai khwan e. Kaguayna tei kuanniam tuanghmei rana khwan e. Abdon tei Isaraelmei ta tingkwm tachat chaengzaylou khwan e.

¹⁵Mi tangv tei kamei theicna Amalekmei tuang chyngramv khou Ephraim tuang ramv lungc khou Pirathon khou mbeihlou the.