Read Rongmei Naga LATZANPOUC NUNC 13 Bible Online

LATZANPOUC NUNC 13 - Rongmei Naga bible

LATZANPOUC NUNC 13

¹Isaraelmei rui RINGHPOUC ruc khou paapc taanc dat the. Kum tina RINGHPOUC rui Isaraelmei guay ta Philistinmei bangc swna kaniw ruc khou tingkwm 40 tisinlou dat khwan e.

²Mi douc tei Zora kaidaimei kazanc Manoa twmeipu gaanv khat nai khwan e. Kamei tei Dan kaikhwangmei khwan e. Kanow tei ngana puanc mak khwan e.

³RINGHPOUC tuang baanchara guangna kanow khou tei sa the, “Nang hei nakamcpeic di the, tiki nang pumc nritna nah mpouh gaanv khat puanc puni.

⁴Nang hei zouh zangv nuh mak ge, tu lak nimei puat ni tu nuh mak ge,

⁵Nang nac mpouh tei puanc key pwkhou kasam guat nuh mak ge, kalam thu mi nac tei puanc keylou rap nungc rui nazir swna RINGHPOUC khang katlou nina e. Isaraelmei ta Philistinmei baanc khou rui kanloumei taanv hei kamei rui taanc thau puni.”

⁶Mipui tei rui kagaanv khou guangna sa the, “Ravguangc tuang mei akhou guang the, kamei tei Ravguangc tuang baanchara kumcna meic pingmei lwn phungc e. Kamei tabui thangc rui guang tu cho twmei ai thanv mak ge, kamei rui ni kazanc akhou dinclou mak ge.

⁷Tiki kamei rui akhou sa the, Nang nang pumc nritna nah mpouh gaanv khat puanc puni. Kumhpui zaeng rui nang zouh hamh e thei mba nuhmei dui zangv nuh mak ge khatni tu lak nimei puat ni tu nuh mak ge, kalam thu mi nac tei kamei ringh saanv nazir swna Ravguangc khang katlou nina e.”

⁸Khoutei Manoa rui kumna Ravguangc khou huayney the, “He RINGHPOUC, nang rui thouc guangmei Ravguangc tuang mei tei thouc guang datna mi nac tei puanc key e thei tukumhna makuat nina cho twmei dinclou dat ro.”

⁹Manoa rui samei tei Ravguangc rui chulouna mi pui tei ramvpuk khou bammei ganv khou katuang baanchara tei mi pui daeng khou tei guang dat the. Mi ganv khou tei kagaanv Manoa tei kadaeng khou bam mak khwan e.

¹⁰Kumna kamei katumcna kagaanv daeng thangc pak tatna kakhou sa the, “Zauc lo, neih khat nungc akhou lyanloumei baanchara tei guang dat the.”

¹¹Manoa tei thauna kanow thei lay tat the. Kamei rui mipu daeng khou tei guangna thanv the, “Anow khou lat saloumeipu kiu nang cho?” “Kiuc e” twna kamei rui daw the.

¹²Khoutei Manoa rui kakhou thanv the, “Nang rui saloumei guang tangc pwkhou, mi nac kiu rui tabui kheiliak khou lungc nina cho khatni kamei tabui sw khang cho?”

¹³Baanchara tei rui daw the, “Ai rui saloumei guay tei nang now rui suai makna taanc nina e.

¹⁴Darakhaluai khou rui patmei ramhkhat na sini tu lak nina e, kamei zouh zangv lak nina e, tu lak nimei puat ni tu lak nina e. Ai rui kakhou saloumei guay tei kamei taanc nina e.”

¹⁵“Tatlou ri ho, nang khang ziuhnac dowluaina suangclou pw-me” twna Manoa rui sa the.

¹⁶Tiki baanchara tei rui sa the, “Ai bamkey bam sini nang tuang taektw tu ni tuang hamh e. Nang rui tii ni e thei thu rawna RINGHPOUC khang kat ti tho.” Hei tei RINGHPOUC tuang baanchara the twmei Manoa rui thaylou mak ge.

¹⁷“Nang tuang lat hei guang tangc pwkhou nang ta chakhwang sw nuh khang nang zanc dinclou o,” twna Manoa rui sa the.

¹⁸“Nang tabui swna azanc thay niina cho? Meic thay tangh makmei zanc de.”

¹⁹Manoa rui ziuhnac akhat lev nap asaekc laana charynmei taanv taancloumeipu RINGHPOUC khang ntauh ravchabamv ruc khou rawna kat the.

²⁰Ravchabamv khou rui maibwang tei ku pwkhou, RINGHPOUC tuang baanchara tei maibwang khou tei rui tingkauh thangc ku kan the. Hei tei how pwkhou Manoa kai nowpunei tei kandih khou sow nkhum khuak key the.

²¹Baanchara tei rui kakai nowpunei khou tihowlou dat mak khe. RINGHPOUC tuang baanchara ling the twmei mi ganv khou tei Manoa rui thay the.

²²Khoutei Manoa rui, “Anei theic puni muay di the, kalam thu anei Ravguangc ta how the.” twna kanow khou sa the.

²³Khoutei kanow rui daw the, “RINGHPOUC rui anei ta swluai ni e thei thu aney tuang puatkat kamei laalou lak nimei tuang de; mi guay hei kamei rui lyanlou lak ni tuang de khatni mi lat guay hei salou lak ni tuang de.”

²⁴Mipui tei rui nah mpouh gaanv khat puanc the kumna kazanc Samson twna phuaklou the. Mi nac tei daic thau the kumna RINGHPOUC rui suaihiamlou the.

²⁵Kamei Mahane Dan tuang Zora lev Estaol kak khou bammei ganv khou RINGHPOUC tuang bumaengc rui kakhou taanv sw thau khwan the.