Read Rongmei Naga LATZANPOUC NUNC 14 Bible Online

LATZANPOUC NUNC 14 - Rongmei Naga bible

LATZANPOUC NUNC 14

¹Zaeng neihkhat Samson tei Timna kaidai khou key the, kumna khou tei Philistinmei luc akhat ta howlou the.

²Kamei rui kakai guang datna kapui kapu khou sa the, “Timna khou Philistinmei luc gaanv khat nai e, ai kata kahaw the. Kata tei anow khang kaphianhlou tho.”

³“Tabui swna mi kumhmei rav baihmei ta kalummei gihruamh makmei Philistinmei luc ta nang now khang laa bam nina cho? Nang mei pang khou rui, nang kai kaikhwangmei khou rui phu pat lak khena cho?” twna kapui lev kapu rui daw the. “Ai kata kahawna di the. Kata tei kaphianhlou rap di tho,” twna Samson rui kapu khou sa the.

⁴Mi hei Philistinmei ta rih khaengclou khang RINGHPOUC rui Samson ta katiuloumei tuang e twmei kapui kapu rui thu thay mak khwan e. Kalam thu mi ganv khou tei Philistinmei rui Isaraelmei ta sin bam khwan e.

⁵Samson tei kapui kapu ta nduanghna Timna thangc key khwan the. Kamei rui Timnamei drakha lau tat ruan pat pwki kadyngna khou rui kamangliangpui rahna kamav khou pat the.

⁶Kadyngna khou RINGHPOUC tuang pumtan rui Samson ta titanclouna, ziuhnac ta thaek tap kumc kabaanc nsin rui kamangliangpui ta tei thaek taplou the. Tiki hei tei kamei rui kapui lev kapu khou dinclou mak ge.

⁷Kumna kamei key lana mipui ta tei kachuc the, kumna kamei rui mipui ta kahaw the.

⁸Kaganv kanakmei tangv mi pui ta tei laa khang Samson tei key dat the. Tat keymei chaeng khou, kamei rui swluailou kanmei kamangliangpui ta tei chaengkuaic tat gutna zauc pwki, mi theicloumei kamangliangpui lungc khou tei nkhuaihphic duanclou bammei ta charyn sihna how the.

⁹Kamei rui nkhuaihdui tei kabaanc rui nzac patna kamei tatna tatna tu the. Kamei rui kapui lev kapu khang ni tii the. Kaney tei ni tu the. Hei tei theicloumei kamangliangpui lungc khou rui laamei tuang e twmei Samson rui kaney khou dinclou mak khwan e.

¹⁰Kapu tei mi tunacpui kai thangc tei key the, kumna khou tei Samson rui nowpouc rui swnimei riak naipui theilayna ngay akhat raengclou the.

¹¹Philistinmei rui kata how pwkhou, nggaanv 30 kadaeng khou bam khang thouc guang the.

¹²Samson rui kaniw khou sa the, “Ai rui nangniw khou lat tam puni. Mi nowsuanh ngai zaeng chanei lungc khou hei nangniw rui daw ngam e thei ai rui nangniw khang linen phey 30 khatni pheybaan saplai 30 tii puni.

¹³Tiki nangniw rui daw ngam mak ge thei linen phey 30 khatni pheybaan saplai 30 akhang tii nina e,” “Nang rui tam nimei lat kiu sa zauc tho,” “Nking dikho” twna kaniw rui sa the.

¹⁴“Tumei puat khou rui tumei puat pat; tanhmei khou rui ndeihmei pat twmei kiu tabui cho?” twna kamei rui sa the. Zaeng neih thumh tangc the tiki kaniw daw ngam mak khe.

¹⁵Zaeng padeihmei nungc kaniw rui Samson now khou tei sa the, “kamei rui tam bammei kabac tei thanv lana aniw khou dinclou o. Kum mak ge thei nang pu kai mai thow pwni kumna mi khou tei nangney ta raw binlou puni. Aniw tuang asut khang rui nangney rui aniw ta kaw guangmei tuang dina cho?”

¹⁶Kum tina Samson now rui kapna kagaanv khou guangna sa the, “Nang ata nzian mak ge! Nang ata karaeng lana de! Nang rui apammei nunc khou lat tam lana mi kabac tei akhou dinclou mak ge!” Kamei rui sa the, “Zauc lo, hei tei ai apui apu khou nganvna raclou mak ge. Tabui swna ai nang khou raclou bam nina cho?”

¹⁷Ngaymei zaeng chanei saanvsaengh tei kamei rui mi khang tei kap guang the. Mipui tei rui nthiam ranv langv tina zaeng chaneimei nungc thu mi lat kabac tei kamei rui raclou the. Mipui tei rui hei tei Philistinmei nunc khou tei raclou the.

¹⁸Kumna zaeng chaneimei nungc neihkey makmei hu khou tei mi kaidaimei nunc tei rui kakhou sa the, “Nkhuaihdui suangc tabui rui ndeih mbuna cho? Kamangliangpui suangc tabui rui tanc mbuna cho?” Samson rui daw the, “Atuang guaicnay ta nangniw sinsw mak khwan e thei alat tei nangniw daw ngam ni tuang hamh e.”

¹⁹Dyng mak khou Ravguangc pumtan rui kata titanclouna, kamei Askelon thangc key lana meic gaanv 30 ta swluaina, kaniw tuang pheybaan tei luak lana mi lat dawloumei nunc khang tei tii kan the. Mi khang tei kamei kalungpuamcna kakai hanc dat the.

²⁰Katuang nowsuanh champanv swmeipu khou tei kanow ta tei nsinlou duc kan the.