Read Rongmei Naga LATZANPOUC NUNC 15 Bible Online

LATZANPOUC NUNC 15 - Rongmei Naga bible

LATZANPOUC NUNC 15

¹Kaganv kanakmei tangv Samson tei kanow khang ziuhnac akhat zayna kanow daeng thangc key the. Hei tei gehu taymei ganv khwan e. “Ai anow tuang laengbamv thangc gut nii e” twna Samson rui kanow pu khou sa the. Tiki kata tigut mak khe.

²Kamei rui Samson khou sa the, “Nang rui kata karaeng changh lana khwang di the twna nang champanv now khang tii dat kan the. Kakai nacpui rui kalwn gay diangc de, kata laa lyn tho.”

³Samson rui sa the, “Ntaw thu Philistinmei ti hei sw khang kalam nai the!”

⁴Kumna kamei rui tat lana asacsi 300 nym lana kanei kanei tuang kamai bang kariu raph raplouna bangloumei bamv khou tei mairam nta raph raplou the.

⁵Kamei rui asacsi may khou tei mai ntou raph raplou lana laupuk khou mpatlou the. Kumna lau tayloumei ni taylou makmei ni mai raw ngam kan the. Olive lau nganvna raw the.

⁶Thow rui cho twna phu guang pwkhou Timnameipu rui kanac aluhpui Samson now ta Samson champanv khang tii dat kan tina kamei rui thou tina the twmei Philistinmei tei thay pat the. Kum tina Philistinmei nunc tei nganghna mi pui tei lev kapu kaney ta mai ntei luai kan the.

⁷Samson rui kaniw khou sa the, “Mi tuang khwm hei khangh makna ai taan lak ge!”

⁸Kamei rui kaniw ta adow ranv sihna adow the, kumna meic mpeyna ta swluai the. Mi tangv tei kamei Etam khou tatna khowlang khou dup tat kan the.

⁹Philistinmei rui Juda khou zypui ngangh swna Lehi kaidai ta adow the.

¹⁰“Tabui swna nangniw aniw ta adow bam tu cho?” twna Judamei nunc rui kaniw khou thanv the. Kaniw rui daw the, “Aniw hei Samson ta nym lana kamei rui aniw khou swloumei kumcna kakhou ni swlou dat khang guangmei tuang e.”

¹¹Kum tina Judamei meic 3000 Etam tuang khowlang thangc tatna Samson khou sa the, “Philistinmei rui aniu ta sin bam tuang e twmei nang thay makna cho? Nang rui aniu khou kumna swlou bammei hei tabui tuang cho?” Kamei rui sa the, “Kaniw rui akhou swloumei tei ai rui khangclou datmei tuang de.”

¹²“Nang ta karakcna kaniw khang tii khang aniw guangmei tuang the,” twna kaniw rui sa the. Samson rui sa the, “Nangniw rui ata swluai lak ge twmei latdyng sw o.”

¹³Kaniw rui sa the, “Ngguay, aniw rui nang ta swluai lak ge, karakcna kaniw baanc khou tiilou khang na de.” Kumna kaniw rui kata riang thanh kanei rui karakcna khowlang thangc tei rui zay guang the.

¹⁴Kamei tei Lehi khou guang pwkhou, Philistinmei tei kaucna kabiak thangc pak guang the. Kadyng khou RINGHPOUC tuang pumtan rui kata titanclouna kabaanc karakclou bammei riang tei langhriangna kumcna kadaengh taph tap pat the.

¹⁵Khoutei theic chanahloumei kuanniam khacbaeng rou akhat ariw the. Kamei rui nkhum keyna hei tei khuaic thauna hei tei rui meic 1000 ta swluai the.

¹⁶Samson rui kumna sa the, “Ai rui kuanniam khacbaeng rui meic 1000 swluai e, kuanniam khacbaeng rui ai rui kakhuan kakhuan khuanlou the.”

¹⁷Hei tei sa tangv pwkhou kuanniam khacbaeng tei kaliang ganc kan the. Mi bamv tei Ramat Lehi twna kaw the.

¹⁸Khoutei Samson tei dui mpeyna tari the, kumna kamei rui RINGHPOUC khou kaucna sa the, “Nang rui mi rih ngam dai ngammei hei tiilou the, tiki ai tarina theic nina cho khatni mi rav baihmei ta kalummei gihruamh makmei Philistinmei hei rui ata nym nina cho?”

¹⁹Khoutei Ravguangc rui Lehi khou naimei khunh akhat laanc patna mi khou tei rui dui pat the. Samson rui mi dui tei zangvna kachaengc ringc thau dat the. Kumna mi duipuakkai tei En-Hakkor twna kaw the. Hei tei ntaw ni Lehi khou nai bam e.

²⁰Philistinmei rui Isaraelmei ta sin bammei ganv khou Samson rui tingkwm 20 Isaraelmei tuang kapy swlou khwan e.