Read Rongmei Naga LATZANPOUC NUNC 16 Bible Online

LATZANPOUC NUNC 16 - Rongmei Naga bible

LATZANPOUC NUNC 16

¹Zaeng neihkhat Samson tei Philistinmei tuang kaidai Gaza khou key the. Mi khou tei kapumc zuanhmeipui gaanv khat ta ariwna mi zingbangc tei mipui daeng khou tei zip the.

²Mi khou tei Samson bam the twmei Gazamei nunc tei rui thay lana kaniw rui mi bamv tei dingbinna zingbangc saanvsaengh raenghkat khou nkhwan thangc the. Zingbangc saanvsaengh kaniw rimh rimna “Aniu tinggaanh mak saanv nkhwan puni, tinggaanc pat re thei kata swluai puni” twna kakhanh bam the.

³Tiki Samson tei zipchung khou zip thau datna raengh kaikhamv, katiangc, khatni khamvtaan kaguayna tei phuay pat the. Kamei mi guay tei kabou khou puanc lana chyng twan thangc Hebron kaidai phaengc arwnmei bamv khou kulou the.

⁴Mi tangv tei, Samson tei Sorek nzaengc khou bammei Delila twmeipui ta nzian the.

⁵Philistinmei guangc gaanv panguh rui kadaeng khou guangna sa the, “Kamei hei tabui sw tina heidi tanc bam tu cho khatni akumh e thei aniu rui kata ngamna, karak lana ramh sw dat ngam mak khang ganclou nuh puni cho twmei thay pat khang karamc o. Aniw kathuicna rui daandi pak 1100 tii puni.”

⁶Kum tina Delila rui Samson khou sa the, “Nang heidi tanc bammei hei tabui rui cho? Thowkumhmei rui nang ta karakcna nym nii e thei tabui sw nina cho?”

⁷Samson rui daw the, “Kaniw rui ata thu pairu ringhmei chanei rui karak ti thei ai hei ni meic baih baihmei lev nchamcna suan kan nimei tuang di the.”

⁸Kum tina Philistinmei guangc nunc rui pairu ringhmei chanei laaguang the, kumna Samson now rui kata karakclou the.

⁹Kailangv akhat khou kamei rui Philistinmei ta nkamhlouna “Samson! Philistinmei nunc guang the!” twna kauc the. Samson rui mi pairu guay tei maibwang rui langhriang kahap kumc thaek para pat kan the. Kumna kamei tabui sw tina heikumna tanc bam tu cho twmei kaniw thay mak khe.

¹⁰Delila rui Samson khou sa dat re, “Nang ata kiauc bammei thu tabui tuang cho! Akumhna nang ta karak ngam nina cho twmei akhou dinclou na ro.”

¹¹Samson rui daw the, “Sinsw zat makmei riang thanh rui karak ti thei ai hei ni meic baih baihmei kumcna suan kan nimei tuang di the.”

¹²Delila rui riang thanh laana Samson ta tei karak the. “Samson! Philistinmei guang the!” twna kauc the. Meic nunc tei kailangv akhat khou nkhwanna bam the. Kamei rui kabaanc khou karakcloumei riang tei langhriang thaek tap kumc thaek tap the.

¹³Delila rui Samson khou sa the, “ntaw nganvna latling sa makna ata kiaucna bammei thu tabui tuang cho! Nang ta akumhna karak nina cho twmei dinclou o.” Kamei rui daw the, “Asam banv chanei tei phey khou dakbinlouna hei tei thingtiangc khou bangclou ti thei ai hei meic baihmei kumc muayna suan puni the.”

¹⁴Delila rui kata sw nziplouna kasam banv chanei tei phey khou dakbinlou the. Hei tei thingtiangc khou bangclou lana kauc the, “Samson! Philistinmei guang the!” Tiki kamei rak patna phey khou tei rui kasam tei thaek thuak pat kan the.

¹⁵Kum tina mipui tei rui kakhou sa the, “Nang akhou latling salou makna akumhna nang ata nzian e twna sa nina cho? Nang rui ata kiauc liang kathumh the, kumna tabui rui nang heidi tanc bam tu cho twmei akhou salou mak he.”

¹⁶Kamei rui mi lat tei tingmik kathuic thanvna bam the. Kamei rui kumna rahna bammei tei nuh liat lak guang the,

¹⁷Kumna nkhamh khou kamei rui kakhou tei latling tei raclou the. Kamei rui sa the, “Asam hei tiap zat mak ge, kalam thu ata puanclou rap khou rui nazir swna Ravguangc khang katloumei tuang the. Asam hei tiap ganc ti thei apumtan maek kan ni the, kumna meic baih baihmei lev nchamcna nsuan kan ni the.”

¹⁸Kamei latling samei tuang di the twmei Delila rui thay pwkhou, kamei rui latpaumei Philistinmei guangc nunc khou tei thouclouna sa the, “Nangniw guang dat guai ho. Kamei rui latling akhou salou the.” Khoutei kaniw tei syan phungcna guang the.

¹⁹Delila rui kata kapam khou nthiam nziplou lana meic kaw the. Kumna mipu tei rui Samson samban chanei tei tiap ganc the. Kumlana mipui tei rui Samson ta rai thau the, kalam thu Samson tei kapumtan maek khe.

²⁰Khoutei, “Samson! Philistinmei guang the!” kamei tei rak patna kakhanh the, “Ai tat pat lana duak ni the.” RINGHPOUC rui kata mpatlou the twmei kamei thay mak khwan e.

²¹Philistinmei rui kata nym the kumna kamikthw kanei tei lat ganc the. Kaniw rui kata Gaza thangc phungc keyna tanzinc kangriang rui bangclou the, kumna kangkai khou napriaktauc titak the.

²²Kum bammei dak khou tei kasam tei thau dat the.

²³Philistinmei guangc nunc tei Dagon rav khang khaengna ngay khang guang kaduai the. “Aniu tuang rav rui Samson ta aniu baanc khou tiilou the” twna kaniw rui lu swna suan the.

²⁴Meic nunc tei rui kata how pwkhou kaniw rav ta thuancna kumna sa the, Aniu ta zauczihmeipu, aniu tuang kandih sw kasicna aniu heizumei ta swluaimeipu ta aniu tuang rav rui aniu baanc khou tiilou the.

²⁵Kaniw tei kaniw zaeng gaylangvna kumna sa the, “Samson ta kaw guang o kata ntanvna talic kho.” Kaniw rui Samson ta kangkai khou rui zaypat lana ntiangh kak khou tidinglouna ntan the.

²⁶Samson rui kabaanc zay tat bammei nggaanv nacpu khou tei sa the, “Mi kai ti hei tung ding bammei tiangdaic nei tei tikahilou o. Ai ngangv nii e.”

²⁷Mi kai tei ntumei, nggaanvmei rui padik the. Philistinmei guangc panguh tei ni mi khou tei bam the. Samson ta ntanvna nuicna bammei ta tei zaucna bammei ntumei, nggaanvmei meic 3000 dou kainam thangc bam khwan e.

²⁸Khoutei Samson rui huayney the, “He Kauh Liangmeipu RINGHPOUC, ata ningtowlou o; Philistinmei ti hei amik kanei lat ganhmei tuang khwm hei khangclou dat khang. He Ravguangc, apumtan tiilou guai na dat ro.”

²⁹Kumna mi kai tei du bammei kachungmei tiangdaic kanei tei Samson rui hou the. Ntiangh kanei khou tei kabaanc akhat khat thuilou lana

³⁰“Ai hei Philistinmei guay lev theic nchamc kan ni the” twna Samson rui sa the. Kapumtan kaguay patna kamei rui ntiangh tei thui the, kumna mi kai tei rui guangh panguh khatni mi khou bammei guay ta tei pangvbin the Samson tei kamei ringcbam khou swluaimei suangc theih khou swluaimei sing rui geic the.

³¹Kapumc tei laa khang kachana nunc khatni kakai kaikhunhmei guay key the. Kaniw rui phungc guang datna Zora lev Estaol kak khou naimei kapu Manoa tuang tarou khou mbeihlou the. Kamei tingkwm 20 Isaraelmei tuang kapy swlou khwan e.