Read Rongmei Naga LATZANPOUC NUNC 17 Bible Online

LATZANPOUC NUNC 17 - Rongmei Naga bible

LATZANPOUC NUNC 17

¹Kaganv akhat khou Ephraim tuang chyngramv khou kazanc Mika twmeipu gaanv khat lungc bam khwan e.

²Mipu tei rui kapui khou sa the, “Daandi paek 1100 houc kanmei ganv khou tei kaihouhmei ta tei nang rui sianglou bammei tei ai chu the. Mi syan tei akhou nai e. Hei tei laamei tei ai rui the.” Kapui rui sa the, “Anacle, RINGHPOUC rui nang ta suaihiamlou diu o!”

³Kamei rui kapui khang syan tei tii dat the. Khoutei kapui rui sa the, “Syang tei anac ruc khou keylou mak khang ai rui mi daandi tei RINGHPOUC khang katgutlou the. Hei tei rui daandi rui duammei thing tuang racmaengc kasiamh puni the. Heikumna ai rui daandi paek tei nang khang tii puni the.”

⁴Kumna kamei rui mi guay tei kapui khang tiilou dat the. Kapui rui daandi paek 200 laana daandi dymeipu khou tiilou the. Mipu tei rui thing tuang ravmaengc kasiamh lana daandi rui luplou the. Hei tei Mika kai khou lou the.

⁵Mika tei katuang rav kalummei bamv nai khwan e. Kamei rui ravmaengc asaekc khatni ephod kasiamh lana kanac gaanv khat ta amuh khang suanglou the.

⁶Mi douc tei Isaraelmei khou guangh maek khwan e; meic kathuicna kamei kamei rui kahawmei taancna lungc bam khwan e.

⁷Mi ganv khou tei Juda tuang Bethlehem khou Juda kaikhwang khou lunghmei Levimei chabwan gaanv khat nai khwan e.

⁸Kamei Bethlehem ganclouna kabamv baih thangc lungh khang phu tat khwan the. Kamei kumna tat bam khou, Ephraim tuang chyngramv khou Mika kai khou guang the.

⁹“Nang tabui thangc rui guang tuang cho?” twna Mika rui kakhou thanv the. Kamei rui daw the, “Ai hei Juda tuang Bethlehem khou bammei Levimei e. Ai lungcloumei bamv khang phuna tat bam tuang e.”

¹⁰Khoutei Mika rui sa the, “Adaeng khou bam tho. Nang apu khatni amuh swna bam tho, kum e thei tingkwm khou daandi paek ruh, taektw khatni pheybaan tii puni.”

¹¹Mi Levimeipu tei Mika kai khou bam khang nuh the kumna kanac akhat kumcna bam the.

¹²Mika rui katuang amuh khang laalouna suanglou the kumna Levimeipu tei katuang amuc swna Mika kai khou lungc the.

¹³“Ntaw thu atuang amuc khang Levimei nai the, RINGHPOUC rui ramh lam guayna khou gayna swlou puni the twmei ai thay the” twna Mika rui sa the.