Read Rongmei Naga LATZANPOUC NUNC 18 Bible Online

LATZANPOUC NUNC 18 - Rongmei Naga bible

LATZANPOUC NUNC 18

¹Mi douc tei Isaraelmei khou guangh nai mak khwan e. Mi douc tei Dan kaikhwangmei kaniw tuang ramv khang phu bam khwan e. Kalam thu Isaraelmei pang khou kaniw tuang nai mak khwan di he.

²Kumna Danmei tei kaniw tuang puinac guay khou rui rihphyan gaanv panguh kadah patna ramv phu khang Zora khatni Estaol khou rui thouc pat the. Kaniw tei Ephraim tuang chyngramv guang tangc pwkhou, Mika kai khou bangvlou the.

³Kaniw bamv khou tei Levimei nggaanvpu khwan tei kaniw chuna mipu khwan tei kaniw thay the. Kumna kaniw rui kadaeng khou guangna, “Nang mi khou hei tabui sw bam cho? Thow rui nang ta mi khou hei nduangh guanglou to cho?” twna thanv the.

⁴Kamei rui daw the, “Mika rui ata katuang amuc khang louna taanvphy tiina bam tuang e.”

⁵Kaniw rui kakhou sa the, “Aniw rui tat bammei chaengkaamv hei guang tangc puni ny guang tangc pu lak ny Ravguangc khou thanvlou o.”

⁶Amuh tei rui daw the, “Nangniw lung ryanra bam khang maek khe. Nangniw tuang chaengkaamv ti hei RINGHPOUC rui zaylouna bam e.”

⁷Mi nunc gaanv panguh tei tat datna Lais kaidai khou guang the. Kaniw tei Sidonmei nunc kumcna lungc bammei ta how the. Kaniw tei nchu nrina reih reina meic gaanv khat na ta sini agi agay tuang maekna khatni ping kadan tuang maekna, ramh gaat tuang maekna lungc bam khwan e. Kaniw tei Sidonmei nunc khou rui ni ducna bam the, kumna meic baih baihmei lev ni alamvmei tuang maek khe.

⁸Kaniw gaanv panguh tei Zora khatni Estaol khou hanc guang dat pwkhou kaniw tabui phutow the cho twna chana punav nunc tei rui guang thanv the.

⁹Kaniw rui daw the, “Aniu Lais kaidai ti hei adow di kho. Kaniw tuang kandic tei ni aniw zauc the, kandih gay the. Nsa khou hei bam ri tho; katumc tho! Gut tho kumna laa tho!

¹⁰Nangniw khou tei gut pwkhou kaniw ramhkhat sini lwmsina chamdaanvmei tuang maek ge twmei how rap puni the. Hei tei ramh daic nganvmei ramv e; mi khou tei ramh kage naimei kaguayna nai the. Mi hei Ravguangc rui aniu khang tiiloumei tuang di the.”

¹¹Danmei rihphianh 600 rih na phungcna Zora khatni Estaol khou rui tat pat the.

¹²Kaniw Juda kandic khou nganghna Kiriath Jearim khou zypui sw the. Kum tina Kiriath Jearim tuang neihkey biak ramv tei ntaw nganvna Mahane Dan twna kaw bam e.

¹³Mi tangv tei kaniw Ephraim tuang chyngramv khou nganghna Mika kai khou guanglou the.

¹⁴Lais kaidai gwanrum tatmei gaanv panguh tei rui kaniw mei nunc khou tei sa the, “Mi khou hei kai akhat khou daandi rui luploumei thing tuang ravmaengc nai e twmei thay bo? Mi khou tei ravmaengc baih baihmei ni ephod ni nai e. Aniu hei tei laa kho cho?”

¹⁵Kumna kaniw Mika kai khou Levimeipu lungc bammei bamv khou tei gut the kumna kamei akumh kumhna bam tu cho twna thanv the.

¹⁶Kum bam khou tei Danmei rih na phunghmei rihphyan 600 tei raenghmun khou ding bam the.

¹⁷Levimei amuh tei mi ricmei pang khou tei ding bam kan khou mi gwanrum tatmei gaanv panguh tei kainung khou gutna daandi tuang racmaengc, baih baihmei ravmaengc guay khatni ephod tei laa the.

¹⁸Mi nunc tei rui Mika kai khou gutna mi kalummei puat guay tei laa bammei ganv khou tei “nangniw tabui sw bam tu cho?” twna amuh tei rui thanv the.

¹⁹Kaniw rui daw the, “Reih reina bam o. Lat sa rio. Aniw thei lay tatna aniw tuang amuh sw tho. Kaikhunh akhat na tuang amuh swmei suangc Isaraelmei kaikhwang akhat tuang amuc nang sw nii makna cho?”

²⁰Mi lat tei chu pwkhou amuh tei neihla the kumna kamei rui kalummei puat guay tei laana kaniw thei lay tat the.

²¹Kaniw nac nunc, kaniw tuang khouringh khounah khatni kaniw tuang puat guay titat huna kaniw guay tei tat kan the.

²²Kaniw Mika kai khou rui ramhbiuc dou duh thangc tat kanmei tangv Mika rui mi nunc ta tei adow khang kakainingmei guay ta khuam kaduai the. Kaniw rui Danmei nunc ta ariw pwkhou

²³kaniw ta kauc the. Danmei nunc tei karih patna Mika khou “Tabui swna cho? Nang tuang kainingmei guay ta nduangh guangmei hei tabui swna cho?” twna thanv the.

²⁴Mika rui daw the, “Tabui swna cho twna sa bammei hei tabui lat cho? Nangniw rui atuang amuc khatni ai rui kasiamhloumei rav nunc ta phungcna tat kan the. Nangniw akhang tabui tuang ganclou duc thena cho?”

²⁵Danmei nunc rui sa the, “Nang lat sa makmei gay e, kum mak ge thei nangniw rui mi mei nunc ti hei tilunghpuamclouna nangniw ta adow pwtu laa niina cho? Kum pwkhou nangniw khatni nangniw kai kaikhunc guay theic mut lam e.”

²⁶Kumlou lana kaniw tei tat kan the. Mika tei kaniw ta tei ngam ni tuang hamh the twmei thay lana kakai hanc dat kan the.

²⁷Danmei nunc tei Mika tuang amuh khatni kalummei tuang puat laana nchu nrina lungc bammei khatni tinggiumei maekna bammei Lais kaidai thangc tei rih sw khang tat kan the. Kaniw rui mi kaidai khou lungc bammei guay ta tei swluai ngam lana kaidai tei mai lou the.

²⁸Lais kaidai hei nzaengc khou Bethrehob kaidai daeng khou khwan e. Lais hei Sidon khou rui mpeyna duc khwan e khatni kaniw lev meic baihmei lev ni alamvna lungh makpui zaeng rui kanlou nimei meic maek khwan e. Danmei nunc rui mi kaidai tei kasiamh thau datna mi khou tei lungc the.

²⁹Kaniw rui mi kaidai zanc tei Lais twbammei khou rui kaniw pupouc Dan zanc khou phuaklou dat the.

³⁰Danmei nunc tei rui kaniw kalum khang mi racmaengc tei lou the, khatni Gershom rui puanhmei, Mousi tou kazanc Jonathan twmeipu rui Dan kaikhwang tuang amuc sw the. Kaniw ta tei ginramdic thangc bangh zay tat mak saanv Jonathan kikta rui kaniw tuang amuc swna lungc bam khwan e.

³¹RINGHPOUC ta kalummei kai rui Shilo khou nai khwan e khatni Mika tuang ravmaengc rui Dan khou nai bam khwan e.