Read Rongmei Naga LATZANPOUC NUNC 19 Bible Online

LATZANPOUC NUNC 19 - Rongmei Naga bible

LATZANPOUC NUNC 19

¹Isarael khou guangh maekmei douc, Ephraim tuang chyngramv kwn akhat thangc Levimeipu gaanv khat lungc bam khwan e. Kamei rui Juda tuang Bethlehemmei luc akhat ta laamvnow khang laa khwan e.

²Mipui tei rui kata lunghpuamcna kapu kai Bethlehem thangc pak tatna bw padeih bam tat kan khwan e.

³Kata tei kaw guang dat khang kagaanv tei kabangc ta nduanghna kuanniam kanei zayna tat khwan e. Kamei rui kanowpu kai thangc guang the kumna kanowpu rui kata how pwkhou neihlana laalou the.

⁴Kapouc rui neih keylou o twna sa ranv bam tina kamei zaeng neih thumh neih keylou the. Kakai nowpu nei tei tu nchamc, zangv nchamc, zip nchamcna bamlou the.

⁵Zaeng padeihmei nungc lauthwan kanei tei thau zaicna thau lana tat khang chamdaanv the. Hei khou tei kapouc tei rui kakhou sa the, “Nang tu zangv tangna nzaengna tat ro.”

⁶Kumna kamei kapouc lev dungc kariuna tu nchamc zangv nchamclou the. “Aseic thu neihlouna bam zuh zulou la ho” twna kapouc rui sa the.

⁷Levimeipu tei tat khang ding thau the tiki kapouc tei rui sa ranv langv tina zingbangc akhat zipkeylou dat the.

⁸Zaeng panguhmei nungc lauthwan kaney tei tat khang sw thau the. Khoutei kapouc tei rui sa the, “Tu zangv tangna kalaanv neihdyng tangv rui laih laina tat ro.” Kumna kanei tei tu nchamclou the.

⁹Kakai nowpu nei khatni kabangcpu tei tat thau khang sw thau dat pwkhou kapu rui sa the, “Ntaw thu tingzyn key kan ni the, zip keylou dat tho. Asaanh mak khou zingc kan ni the, bamkeyna nthaekc zuh zulou la ho. Nthuanh kiu rui thau zaicna tat tho.”

¹⁰Kum e tiki mipu tei zipkey dat ni mak khe kumna kakai nowpu nei tei kaney bangcpu khatni kuanniam nei ta zayna kaamc thau the.

¹¹Kaniw tei Jebus (Jerusalem ta e)daeng khou guang pwkhou nyan sih the. Kum tina kabangcpu tei rui kakhou sa the, “Aniu mi Jebusimei tuang kaidai khou hei nthaekclouna ziplou damc the cho?”

¹²Kakaipouc tei rui daw the, “Isaraelmei tuang kaidai hamhmei khou ziplou mak ge. Aniu pat khat tulana Gibea khou zip kho.”

¹³Kabangcpu khou tei sa dat di he, “Aniu tat pat khat tulana Gibea hamh e thei Rama khou ziplou di kho.”

¹⁴Kumna kaniw Jebus tat kaanna tat pat the. Kaniw Benjamin ramv guang tangcna Gibea kaidai guang tangc pwkhou neih key the.

¹⁵Kaniw khou tei ziplou khang nthaekc key the. Kaniw rui mi kaidai khou tei gutna sanghbamv khou dungc bam the, tiki kaniw ta guang ziplou khang kawloumei meic maek khe.

¹⁶Kaniw mi khou tei bam bam ki karapouc gaanv khat taanv bamv thangc rui guang pu the. Mipu tei kadilung thu Ephraim tuang chyngramv thangc rui e, tiki mi ganv khou tei thu kamei Gibea khou lungc bam khwan the. Mi kaidai khou tei bammei baih baihmei guay thu Benjamin kaikhwangmei khwan e.

¹⁷Mipu tei rui kaniw ta how lana “Nangniw tabui thangc rui guangmei nunc cho? Tabui thangc tatlou nina cho?” twna thanv the.

¹⁸Levimeipu tei rui daw the, “Aniw Juda tuang Bethlehem thangc tat lana e, ntaw thu Ephraim tuang chyngramv lungc thangc tat dat khang tat bammei tuang e. Aniw bangvloumei bamv khang maekna bam tw e.

¹⁹Aniw tuang kuanniam taek phungc de, aniw guay khang ntyan ni drakhadui ni nai de. Aniw khang ramh kaguayna nai ngam de.”

²⁰Karapouc tei rui sa the, “Akai khou guang bangv tho! Ai rui nangniw khang zauclou puni; tabui swna nangniw sanghbamv khou bam nina cho?”

²¹Kumna kamei rui kaniw ta kakai khou nduangh gutna kaniw tuang kuanniam ta titulou the. Gin nunc tei kaniw phay khiuna tu zangv the.

²²Kaniw neihlana bammei ganv khou tei mi kaidai khoumei meicsimei nunc guang lana kaikhamv hiw thau the. Mi nunc tei rui karapouc khou tei sa the, “Nang kai khou nang thei lay guang kanmeipu ta tei aniw khang tii pat ro! Aniw kata zip nduangh nii e!”

²³Khoutei karapouc tei kaizaengc khou pat lana kaniw khou sa the, “Kiuc hamh e, champanv nuncle. Hei kumhmei mphuammei taanv hei taanclou rio. Mipu hei atuang gin e.

²⁴Kanow khatni anac tunac nai e. Kaney ta tei tii pat puni the. Kaney ta tei nangniw ning sw tat tho. Tiki mipu khou hei thu mi kumhmei chanymei tuang taanv hei taanclou rio!”

²⁵Tiki mi nunc tei rui kalat tei nkinglou mak khe. Kumna Levimeipu tei rui kanow ta kaniw khou tei tii pat the. Kaniw rui mipui ta tei nymna zip nduangh thangclou the.

²⁶Khwanpaengc mipui tei guang datna kagaanv bangv bammei kai kaimun khou tei bow keylou the. Tinggaanc pat pwkhou nganvna mipui tei mi khou tei bam the.

²⁷Mi nungc lauthwan tei kagaanv tei tat dat khang kaikhamv laanc pat pwki kanow tei kabaanc kaimun ngaengv tei guang houlouna zip bam khwan the.

²⁸“Thau tho, tat di kho” twna kamei rui sa the. Tiki lat daw mak khe. Kumna katuang kuanniam khou puanc thauna mbaenglouna tat the.

²⁹Kamei rui kakai guang tangc pwkhou, baeng laana kanow pumc tei kadwm 12 khang dim pat lana Isaraelmei kaikhwang 12 khou tei kadwm akhat akhat nzanhlou the.

³⁰Hei tei howmei kathuic rui sa the, “Mi kumhmei chamv hei aniu chu zat mak ge the! Isaraelmei rui Izip khou rui tat pat rap khou rui thauna mi kumhmei hei pat zat kan mak ge! Aniu mi khou hei ramhkhat swlou nina de. Tabui tuang sw kho cho sa tho.”