Read Rongmei Naga LATZANPOUC NUNC 2 Bible Online

LATZANPOUC NUNC 2 - Rongmei Naga bible

LATZANPOUC NUNC 2

¹RINGHPOUC tuang baanchara Gilgal khou rui Bokim thangc nganvna ngangh sa the, “Ai rui nangniw ta Izip kandic khou rui phungcpat lana nangniw pupouc nunc khou nrianhloumei kandic khou tei ai rui nangniw ta phungc guanglou the. Kumlana ai rui kaniw khou swlou kanmei latdyng tei ai rui khat sini swbak lak ge.

²Mi kandic khou lungc bammei nunc lev nangniw latdyng khat na sini sw nuh mak ge. Kaniw tuang ravchabamv guay tei nangniw swra nina e, twna salou kan the. Tiki nangniw alat liam the. Tabui zaeng rui nangniw alat liam bam tu cho?

³Hei zaeng rui ai rui nangniw khou sa e mikiu thu mi zaatc baihmei nunc ti hei nangniw khou rui alay ganc dat lak khe. Kaniw tei nangniw khang sauh sw puni the khatni kaniw tuang rav nunc tei nangniw khang phah sw puni the.”

⁴Baanchara tei rui mi lat tei salou pwkhou, Isaraelmei guay tei khwan ranvna kap thau the.

⁵Kum tina mi bamv zanc tei Bokim twna kaw the. Mi khou tei kaniw RINGHPOUC khang khaeng the.

⁶Joshua rui Isaraelmei guay ta tipiangloumei tangv kakhang khang tiiloumei ramv tei laa khang kaamc thau kan the.

⁷Joshua ringc bam saanv tei Isaraelmei nunc tei RINGHPOUC tuang siamruai sw bam khwan e, khatni RINGHPOUC rui taanvdaih taancloumei tei howmei kapy nunc lungc bam saanv kaniw tei kumna RINGHPOUC siamruai swna lungc bam khwan e.

⁸Nun rui puanhmei RINGHPOUC tuang siamruaimei Joshua tei katingkwm 110 khou theic the.

⁹Kata tei katuang ramv Ephraim tuang chyngramv khou Gaas Chyng tuang dihpy khou naimei Timnat Sera khou mbeihlou kan the.

¹⁰Mi meikin guay tei theic ngam kan the, kumna mi tangv lungc guang datmei meikin tei RINGHPOUC ta khatni kamei rui Isaraelmei khang taancloumei taanv guay ta amuc the.

¹¹Khoutei Isaraelmei nunc tei Baal rav ta kalumna RINGHPOUC ruc khou paapc taan the.

¹²RINGHPOUC, kaniw pupouc Ravguangc, khatni kaniw ta Izip khou rui phungc patloumei Ravguangc ta kalum taanna rav baih baihmei, khatni kaniw daeng khou bam nkuay bammei zaatc nunc tuang rav nunc ta kalum thau the. Kaniw rui mi rav nunc ta tei kalumna RINGHPOUC lung tipuamclou the.

¹³Kaniw tei RINGHPOUC ta kalum taanna Baal rav nunc khatni Ashtoret rav nunc ta kalum the.

¹⁴RINGHPOUC rui Isaraelmei ruc khou lunghpuamcna kwamtu kwamzangvmei nunc baanc khou kaniw ta tiipatlou tina kaniw tuang asut laa ngam kan the. Kaniw daeng khou lungc nkuay bammei zaatc nunc ta tei kaniw ruc khou titanclou tina Isaraelmei nunc tei kaniw rana kaniw ta gaek ngam mak khwan the.

¹⁵RINGHPOUC kamei rui kum puni twna saloumei theilayna kaniw rui rih tatmei kathuic RINGHPOUC rui kaniw ta zauczihmei biak liangc kan the. Kumna kaniw tei ryanra sihna bam khwan e.

¹⁶Mi tangv tei RINGHPOUC rui Isaraelmei nunc ta tei mi kumhmei meicsimei nunc baanc khou rui kanlou nimei Latzanpouc nunc tiguang dat khwan e.

¹⁷Kaniw rui kaniw tuang latzanpouc nunc lat nkinglou mak khe. Isaraelmei nunc tei kaling hamhmei rav nunc ta kalum tat kan the. Kaniw pupouc nunc tei RINGHPOUC tuang latdanv guay piu khwan e, mi kathancmei meikin hei rui thu piu taan khwan the.

¹⁸RINGHPOUC rui tii guangmei latzanpouc nunc ta tei RINGHPOUC rui nkhavlouna kamei tei ringh saanv Isaraelmei tei zauczihmei nunc khou rui duakna bam khwan e. Kaniw rairiu akhaengvna ryanrana kaniw rui kauhmei khwan tei chuna RINGHPOUC rui kaniw ta zauc nzianlou khwan e.

¹⁹Tiki mi latzanpouc nunc tei theic dat kan ti thei, meic nunc tei kaniw tuang karaanmei chaeng khou tei hanc datna tat kanmei kin khang tei suangc sini simei taanv taanc khwan e. Kaniw rav baih baihmei ta kalumna kaniw tuang simei chaeng tei ganc nii mak ge.

²⁰Kum pwkhou RINGHPOUC kareic patna kaniw khou sa the, “Kaniw piu khang ai rui kaniw pupouc nunc khou tiiloumei latdyng tei mi meikin hei piu mak khe. Kaniw rui alat piu makpui zaeng rui,

²¹Joshua theihmei tangv mi kandic khou lungc bammei zaatc nunc ti hei ai rui alay ganclou dat lak khe.

²²Kaniw hei kaniw pupouc nunc kumcna alat piu ny piu mak ny twmei zauh khang ai rui zaatc nunc ti hei lou puni the.”

²³Kumna RINGHPOUC rui mi zaat nunc tei mi kandic khou tei lungc bam khang nuhlou the; kamei rui mi zaat nunc ta tei Joshua baanc khou tiilou kan mak khe, khatni Joshua theic kanmei tangv katumcna kaniw alay ganc ngam mak khe.