Read Rongmei Naga LATZANPOUC NUNC 20 Bible Online

LATZANPOUC NUNC 20 - Rongmei Naga bible

LATZANPOUC NUNC 20

¹Isaraelmei kaguayna dihpy thangc Dan khou rui dihba thangc Beersheba nganv, neihpat biak thangc Gileadmei nganvna guang the. Kaniw Mizpa khou RINGHPOUC hu khou akhat na guang kaduai the.

²Ravguangc tuang mei nunc guang kariumei bamv khou tei Isaraelmei kaikhwang kaguay tuang kapy nunc kazauh the, kumna mi khou tei phay ricmei 400,000 guang bam the.

³Heikumna Isaraelmei kaikhwang guay tei Mizpa khou guang kaduai bam the twmei Benjaminmei kaikhwangmei nunc rui chu the. “Mi tuang simei chanymei taanv kiu akumhna pat kan tuang cho twmei aniw khou raclou o” twna Isaraelmei nunc rui sa the.

⁴Kanow theihmei Levimeipu tei rui sa the, “Ai rui anow ta nduanghna Gibea kaidai khou guang ziplou the.

⁵Gibeamei nunc rui ai bangvloumei kai ta tei dingbinna ata swluai khang sw the. Kaniw rui ata swluai khang swmei tuang e; mi phaan tei kaniw rui anow ta swkasiclouna swluai the.

⁶Ai rui kazanc tei dan lana Isaraelmei kaikhwang 12 khou nzanhloumei tuang the. Mi mei nunc hei rui simei chanymei taanv khatni lungcmaanv lungcmowmei taanv taanc the.

⁷Mi khou hei bammei guayna hei Isaraelmei rana di the. Mi khou hei aniu rui tabui sw nina cho?”

⁸Khoutei meic guayna gaanv khat na kumcna ding thauna sa the, “Aniu meic guayna pheykai khou lunghmei bam ni, kaichangc khou lunghmei bam ni kai tat dat nuh mak khe.

⁹Aniu rui kumna sw puni: san zaucna Gibea ta adowmei khang meic kapah puni.

¹⁰Aniu Isaraelmei kaikhwang kathuic khou rui meic 100 khou gaanv ruh, meic 1000 khou rui meic 100 khatni meic 10,000 khou rui meic 1000 kada patna Gibea khou bammei Benjaminmei guay ta Isaraelmei ruc khou chanymei taanvsic taancloumei zaeng rui dandi tii khang tat pwkhou puk taek phungh khang e.”

¹¹Kumna mi kaidai ta tei adow khang Isaraelmei guay guang kaduai the.

¹²Isaraelmei kaikhwang guay rui Benjamin tuang kaikhwang kathuic khou latdiumei thouclouna sa the, “Nangniw pang khou rui heidi simei chanymei taanv taanclou bammei hei akumhmei tuang cho?

¹³Mi kumhmei simei taanv taanhmei Gibeamei nunc ta kiuc tiipat tho, kaniw ta kiuc swluaina mi kumhmei simei hei Isaraelmei khou rui swmaan puni the.” Tiki kaniw heikumna sa bammei ta tei Benjaminmei nunc rui thouh swlou mak khe.

¹⁴Isaraelmei baihmei guay ta tei adow khang Benjamin tuang kaidai guay khou rui Gibea khou guang kaduai the.

¹⁵Benjaminmei nunc kaniw tuang kaidai guay khou rui meic 26,000 mi nungc tei guang kaduai the. Mi ruc khou rui Gibea khou rui rihphyan meic 700 kadah pat the.

¹⁶Kaniw pang khou tei mbai biak rui taanv swmei 700 ni nai khwan e. Kaniw kathuicna tei samlu akhat na ta nganv ntauh rui siauc zi zat mak ge.

¹⁷Benjamin hamhmei baihmei Isaraelmei guay tei rui ncham tangmei rihphyan 4,00,000 e.

¹⁸Isaraelmei guay tei rui kaniw kalummei bamv Bethel thangc tatna “Benjamin ti hei thow kai kaikhwang rui adow rey nina cho?” twna Ravguangc khou thanv the. “Juda kaikhwang rui adow rey nina e” twna RINGHPOUC rui daw the.

¹⁹Kumna Isaraelmei tei nthuanh lauthwan pat pwkhou kaamc thau the kumna Gibea kaidai daeng khou zypui guang sw the.

²⁰Kaniw tei Benjaminmei ta adow khang tat the, kumna rihmei nunc ta tei mi kaidai khou tei rui how daanhmei bamv khou guang bam the.

²¹Benjaminmei rihphyan nunc tei kaidai khou tei rui pat the, kumna mi nungc tei Isaraelmei ricphyan 22,000 ta swluai the.

²²Tiki Isaraelmei rihphyan guay tei khat khat ta katiu thau datna rihmei nunc tei kaniw neihkhat nungc bammei bamv khou tei guang kaduai bam the.

²³Isaraelmei nunc tei kalummei bamv thangc tatna RINGHPOUC hu khou neihmaryn latluna kapzingc the. Kaniw rui RINGHPOUC khou thanv the, “Aniw chana punav swmei Benjaminmei ta aniw adow tat dat nina ny akumh cho?” “Ngguay” twna RINGHPOUC rui daw the.

²⁴Benjaminmei rihmei nunc ta sw khang kaniw luan neimei swna gut the.

²⁵Benjaminmei nunc tei Gibea khou rui pat dat muay the, kumna rih khang nchamlou tangmei Isaraelmei ricphyan 18,000 ta swluai dat the.

²⁶Kum tina kaniw Bethel khou guangna latluna RINGHPOUC hu khou kap the. Mi nungc tei kaniw munthiangc zingc the khatni rawna khaengmei khatni alamvpuatkat tiina khaeng the.

²⁷Isaraelmei nunc tei RINGHPOUC khou lat khwan nkingna thanv dat di he. Mi douc tei Ravguangc tuang latdyng khuk tei Bethel khou nai bam khwan e.

²⁸Mi douc tei Aron tou Eleazer rui puanhmei Phinehas rui RINGHPOUC siamruai swbam khwan e. Meic nunc tei rui RINGHPOUC khou thanv the, “Aniw chana punav swmei Benjaminmei ta adow tat dat nina ny hamh e thei nthaekc nina cho? RINGHPOUC rui sa the, adow tho, nthuanh thu ai rui kaniw ta nangniw baanc khou tiilou puni the.”

²⁹Kumna Isaraelmei rui rihmei nunc ta Gibea kaidai khou tidup nkuaylou the.

³⁰Kumna zaeng neih thumhmei nungc kaniw tei Benjaminmei ricmei nunc ta adow khang guang the kumna kahu thangc sw kanmei tei kumcna mi kaidai how daanhmei bamv khou kaniw tuang ricmei nunc tei guang bam the.

³¹Benjaminmei nunc tei kaniw ta adow khang pat the kumna kaidai khou tei rui zay duc sihna zay pat the. Kahu thangc sw kanmei tei kumcna Isaraelmei gaanvsaekc ta Bethel chaeng khou khatni Gibea chaeng khou dowluai the. Kaniw rui Isaraelmei 30 dou ta swluai the.

³²“Kahu thangc tei kumna aniu rui kaniw ta ngam the” twna Benjaminmei nunc rui sa the. Tiki Isaraelmei tei pakna kaniw ta mi kaidai khou tei rui nduangh duc pat khang swmei tuang khwan e.

³³Isaraelmei rihmei guay tei Baaltamar khou guang kaduai dat the, Gibea ta tei bam nkuay bammei nunc tei kaniw dup bammei ntauh ramv khou tei rui pak pat geic the.

³⁴Isaraelmei pang khou rui kadahloumei meic 10,000 rui Gibea ta adow the kumna adow ranv sihna adow the. Benjaminmei nunc tei kaniw ta swkamut kamailou puni the twmei kaniw thay mak khwan e.

³⁵RINGHPOUC rui Benjaminmei nunc ta Isaraelmei baanc khou tiilou the. Mi nungc tei Benjaminmei meic 25,100 ta swluai the.

³⁶Khoutei kaniw ta ngam the twmei thay the. Isaraelmei rihmei kakang daihmei tei Benjaminmei nunc hu khou pak the kalam thu Gibea daeng khou dup bam duc kanmei nunc khou tei lwm khwan e.

³⁷Mi nunc tei katumcna Gibea khou pak guangna kaidai lungc khou pak phak lik sikh sik lana meic naimei guayna ta dowluai the.

³⁸Rihbamv khou tatmei khatni dupbam duhmei kaniw kak khou tei maikhou rui lat thay alamv khang swlou the. Mi kaidai khou tei rui maikhou tiangc daihmei khou thau pwkhou

³⁹rihbamv khou bammei Isaraelmei nunc tei adow gut dat nina khwan the. Ntaw thu Benjaminmei rui Isaraelmei 30 ta tei swluai the. “Ngguay, neih khat khat tei kumcna aniu rui kaniw ta ngam the” twna kaniw rui kaniw rana khou sa the.

⁴⁰Khoutei mi kaidai khou tei maikhou muangh kumcna khou ku pu the. Benjaminmei rui thei ziangrih pat pwki kaniw tuang kaidai tei maibwang rana bam khwan the.

⁴¹Khoutei Isaraelmei tei karih kadatna akhangv pat dat the, khoutei kaniw ta swmutlou puni the twmei thay lana ramh swthau swguang dat khang thay mak khe.

⁴²Kaniw tei Isaraelmei khou rui hanc lana ramhchaeng biak thangc pak tat the, tiki kaniw pak duak ngam mak khe. Rihbamv khou tatmei khatni dupbam duhmei kang kanei tei rui ding kachipna kaniw ta swmutsutlou the.

⁴³Kaniw rui Benjaminmei ta dingbinna chiw nana kadakc lana neihpat biak Gibea daeng khou kuak the.

⁴⁴Benjaminmei tuang tancbauhmei rihmei 18,000 ta swluai the.

⁴⁵Baihmei asaekc rui Rimmon khow thangc pak kan the. Mi pang khou tei rui chaeng khou meic 5,000 ta dowluai the. Baihmei gaanvsaekc ta ruina Gidom nganv nthau keyna meic 2,000 dow ta swluai the.

⁴⁶Mi nungc tei Benjaminmei tancbauhmei rihmei rana meic 25,000 ta swluai the.

⁴⁷Tiki meic 600 dou thu Rimmon khow khou paklouna bw padeih bamlou the.

⁴⁸Isaraelmei rui baih baihmei guay ta tei ni ntumei, nggaanvmei, alauc, khouringh khounah kaguayna ta swluai the. Mi ramc khou tei naimei namvdai guay tei mailou the.